ହରାରେ : ଦକ୍ଷିଣ ଆଫ୍ରିକାକୁ ୪ ମ୍ୟାଚ୍ ବିଶିଷ୍ଟ ଶୃଙ୍ଖଳାରେ ୩-୧ରେ ପରାସ୍ତ କରିବା ପରେ ଜିମ୍ବାୱେ ଗସ୍ତ କରିଥିବା ପାକିସ୍ତାନ କ୍ରିକେଟ୍ ଦଳ ଶୁକ୍ରବାର ପରାଜୟର ସାମ୍ନା କରିଛି। ଘରୋଇ ଦଳ ବିପକ୍ଷ ପ୍ରଥମ ଟି-୨୦କୁ ୧୧ ରନ୍ରେ ଜିତି ନେଇଥିବା ଶକ୍ତିଶାଳୀ ପାକିସ୍ତାନ କମ୍ ସ୍କୋର୍ ବିଶିଷ୍ଟ ଦ୍ବିତୀୟ ଟି-୨୦କୁ ୧୯ ରନ୍ରେ ହାରିଯାଇଛି। ଜିମ୍ବାୱେ ଦେଇଥିବା ୧୧୯ ରନ୍ର ଛୋଟିଆ ଲକ୍ଷ୍ୟକୁ ପିଛା କରିଥିବା ପାକିସ୍ତାନ ଶେଷ ବଲ୍ ପୂର୍ବରୁ ୯୯ ରନ୍ରେ ସମସ୍ତ ୱିକେଟ୍ ହରାଇଥିଲା। ଘାତକ ବୋଲିଂ କରିଥିବା ଘରୋଇ ଦଳର ଲୁକେ ଜଙ୍ଗ୍ୱେ (୩.୫-୦-୧୮-୪) ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ। ପରସ୍ପର ମଧ୍ୟରେ ଗତ ୧୫ ଟି-୨୦ ମ୍ୟାଚ୍ରେ ଜିମ୍ବାୱେର ଏହା ପ୍ରଥମ ବିଜୟ।
Sambad is now on WhatsApp
Join and get latest news updates delivered to you via WhatsApp
ଟସ୍ ଜିତି ବାବର ଆଜମ୍ଙ୍କ ଦଳ ପ୍ରଥମେ ବୋଲିଂ ନେଇଥିଲା। ମହମ୍ମଦ ହାସ୍ନେନ୍ (୨/୧୯), ଦାନିସ ଆଜିଜ୍ (୨/୨୯), ଅର୍ସାଦ୍ ଇକ୍ବାଲ (୧/୧୬), ହାରିସ୍ ରଫ୍ (୧/୧୦), ଉସ୍ମାନ କାଦିର (୧/୨୮) ଓ ଫହିମ ଅର୍ସଫ୍ (୧/୧୦) ଭଲ ବୋଲିଂ କରିବାରୁ ଜିମ୍ବାୱେ ପାଳି ୧୧୮/୯ରେ ସୀମିତ ରହିଥିଲା। କାମୁନହୁକୁମେ ୩୪, ଚକଭା ୧୮, ମାଧେଭେରେ ୧୬, ମୁରୁମାନି ଓ ମୁସାକାନ୍ଦା ୧୩ ରନ୍ ଲେଖାଏଁ କରିଥିଲେ। ଜବାବରେ ଅଧିନାୟକ ବାବର ଆଜମ୍ (୪୧), ଦାନିସ ଆଜିଜ୍ (୨୨) ଓ ମହମ୍ମଦ ରିଜ୍ୱାନ୍ (୧୩)ଙ୍କ ଦୁଇ ଅଙ୍କ ବିଶିଷ୍ଟ ସ୍କୋର୍ ସତ୍ତ୍ବେ ପାକିସ୍ତାନ ୧୯.୫ ଓଭରରେ ୯୯ ରନ୍ କରି ସବୁ ୱିକେଟ୍ ହରାଇଥିଲା। ଦୁଇଟି ରନ୍ ଆଉଟ୍ ସାଙ୍ଗକୁ ଜଙ୍ଗ୍ୱେଙ୍କ ୪, ରିୟାନ୍ ବୁର୍ଲ (୨/୨୧), ବ୍ଲେସିଙ୍ଗ୍ ମୁଜାରବାନି (୧/୨୪) ଓ ରିଚାର୍ଡ ଏନ୍ଗାରାଭା (୧/୧୦)ଙ୍କ କମାଲ ବୋଲିଂ ଯୋଗୁଁ ଜିମ୍ବାୱେ ଜବରଦସ୍ତ ବିଜୟ ହାସଲ କରିଥିଲା। ଏହି ବିଜୟ ସହିତ ୩ ମ୍ୟାଚ୍ ବିଶିଷ୍ଟ ଶୃଙ୍ଖଳା ଏବେ ୧-୧ ସ୍ଥିତିରେ ପହଞ୍ଚିଯାଇଛି।