୪୦୦ କୋଟି ଲାଭ ତ କରୁଛ, ଚିନ୍ତା କାହିଁକି କରୁଛ: ଏଭଳି କହି ସଞ୍ଜୀବ ଗୋଏଙ୍କାଙ୍କୁ ଟାର୍ଗେଟ କଲେ ସେହୱାଗ

ନୂଆଦିଲ୍ଲୀ: ଆଇପିଏଲ୍ ୨୦୨୪ରେ ଗତ ବୁଧବାର ଲଖନଉ ସୁପର ଜାଏଣ୍ଟସ୍ ଏବଂ ସନରାଇଜର୍ସ ହାଇଦ୍ରାବାଦ ମଧ୍ୟରେ ଏକ ମ୍ୟାଚ୍ ହୋଇଥିଲା | ଏହି ମ୍ୟାଚରେ ଲଖନଉ ପରାଜୟର ସ୍ୱାଦ ଚାଖିଥିଲା | ପ୍ରଥମେ ବ୍ୟାଟିଂ କରି ଲଖନଉ ମାତ୍ର ୧୬୫ ରନ୍ ସଂଗ୍ରହ କରିଥିଲା। ଏହାର ଜବାବରେ ହାଇଦ୍ରାବାଦ ୧୦ ଓଭର ମଧ୍ୟରେ ମ୍ୟାଚ୍ ଜିତିଥିଲା। ମ୍ୟାଚ୍ ପରେ ଲଖନଉ ସୁପର ଜାଏଣ୍ଟସ୍ ମାଲିକ ସଂଜୀବ ଗୋଏଙ୍କା କ୍ଷୁବ୍ଧ ଭାବରେ ଅଧିନାୟକ କେ.ଏଲ୍ ରାହୁଲଙ୍କ ସହିତ କଥାବାର୍ତ୍ତା କରୁଥିବା ଦେଖିବାକୁ ମିଳିଥିଲା। ଭାଇରାଲ୍ ଭିଡିଓରେ କେ.ଏଲ୍ ରାହୁଲ ସଞ୍ଜୀବ ଗୋଏଙ୍କାଙ୍କ ସମ୍ମୁଖରେ ଠିଆ ହୋଇ ସବୁକିଛି ଶୁଣୁଥିଲେ। ଆଉ ଗୋଏଙ୍କା ତାଙ୍କୁ ଗଲି କରୁଥିଲେ | ଯାହାକୁ ନେଇ ଅନେକ କ୍ରିକେଟ ସମୀକ୍ଷକଙ୍କ ସହ କେଏଲ ରାହୁଲଙ୍କ ପ୍ରଶଂସକ ଗୋଏଙ୍କାଙ୍କୁ ତୀବ୍ର ସମାଲୋଚନା କରିଥିଲେ | ତେବେ ବର୍ତ୍ତମାନ ସଞ୍ଜୀବଙ୍କ ଏଭଳି ଆଚରଣ ପାଇଁ ପୂର୍ବତନ ଭାରତୀୟ କ୍ରିକେଟର ବୀରେନ୍ଦ୍ର ସେହୱାଗ ସଞ୍ଜୀବ ଗୋଏଙ୍କାଙ୍କୁ ସମାଲୋଚନା କରିଛନ୍ତି |

ସେହୱାଗଙ୍କ କହିବା ଅନୁଯାୟୀ ସଞ୍ଜୀବ ୪୦୦ କୋଟି ଟଙ୍କା ଲାଭ କରୁଛନ୍ତି, ତେଣୁ ତାଙ୍କୁ ସେ କାହିଁକି ଚିନ୍ତା କରୁଛନ୍ତି? ବୀରେନ୍ଦ୍ର ସେହୱାଗ କହିଛନ୍ତି, "ସେମାନେ ସମସ୍ତେ ବ୍ୟବସାୟୀ ଏବଂ ସେମାନେ କେବଳ ଲାଭ ଏବଂ କ୍ଷତିର ଭାଷା ବୁଝନ୍ତି । କିନ୍ତୁ ଏଠାରେ କୌଣସି କ୍ଷତି ନାହିଁ, ତେବେ ତାଙ୍କର କଣ ଅସୁବିଧା ହେଉଛି? ସେ ୪୦୦ କୋଟି ଟଙ୍କା ଲାଭ କରୁଛନ୍ତି। ଏହା ଏମିତି ଏକ ବ୍ୟବସାୟ ଯେଉଁଠାରେ ସେମାନେ କିଛି କରିବା ଆବଶ୍ୟକ କରନ୍ତି ନାହିଁ। ଫଳାଫଳ ଯାହା ହେଉନା କାହିଁକି ସେମାନେ ଲାଭ କରୁଛନ୍ତି।" ସେହୱାଗ କହିଛନ୍ତି, "ଜଣେ ମାଲିକଙ୍କ କାମ ହେବା ଉଚିତ ଯେ ଯେତେବେଳେ ସେ ସାମ୍ବାଦିକ ସମ୍ମିଳନୀରେ କିମ୍ବା ଡ୍ରେସିଂ ରୁମରେ ଖେଳାଳିଙ୍କୁ ଭେଟନ୍ତି, ସେତେବେଳେ ସେ ସେମାନଙ୍କ ମନୋବଳ ବଢ଼ାଇବାକୁ ଚେଷ୍ଟା କରିବା ଉଚିତ୍। କିନ୍ତୁ ଯେତେବେଳେ ମାଲିକ ଆସି ନିର୍ଦ୍ଦିଷ୍ଟ ଖେଳାଳିଙ୍କ ଉପରେ ପ୍ରଶ୍ନ ଉଠାଇବା ଆରମ୍ଭ କରନ୍ତି, ତାହା ଭୁଲ | ବଡ କଥା ଯେ ଖେଳାଳି ଓ କୋଚ ଦଳକୁ ଚଳାନ୍ତି | ଏଣୁ ଦଳର ପ୍ରଦର୍ଶନ କିମ୍ବା ଖେଳାଳିଙ୍କ ଉପରେ ପ୍ରଶ୍ନ ଉଠାଇବା ମାଲିକମାନଙ୍କ ପାଇଁ ଠିକ ନୁହେଁ |