ସୋସିଆଲ୍‌ ମିଡିଆରେ ଶୁଭମନ୍‌ ଗିଲ୍‌ଙ୍କ ଭଉଣୀଙ୍କୁ ଘେରିଲେ କୋହଲିଙ୍କ ପ୍ରଶଂସକ

ନୂଆଦିଲ୍ଳୀ: ଗୁଜୁରାଟ ଟାଇଟନ୍ସ ଟିମ୍‌ଠାରୁ ପରାଜିତ ହୋଇ ଆଇପିଏଲ୍‌-୨୦୨୩ରୁ ରୟାଲ୍‌ ଚ୍ୟାଲେଞ୍ଜର୍ସ ବାଙ୍ଗାଲୋର ବାଦ୍‌ ପଡ଼ିବା ପରେ ଏବେ କ୍ରିକେଟ୍‌ର ବିରାଟ କୋହଲିଙ୍କ ପ୍ରଶଂସକମାନଙ୍କ ଟାର୍ଗେଟକୁ ଆସିଛନ୍ତି କ୍ରିକେଟର୍‌ ଶୁଭମନ ଗିଲ୍‌ଙ୍କ ଭଉଣୀ। ଗୁଜୁରାଟ ଟାଇଟାନ୍ସ ଓପନିଂ ବ୍ୟାଟ୍ସମ୍ୟାନ୍ ଶୁଭମନ ଗିଲ୍‌ ଏବର୍ଷର ଇଣ୍ଡିଆନ ପ୍ରିମିୟର ଲିଗରେ ଦ୍ବିତୀୟ କ୍ରମାଗତ ଶତକ ହାସଲ କରିଥିବା ବେଳେ ତାଙ୍କ ସଫଳତାରେ ହାରି ଯାଇଛି ବିରାଟ କୋହଲିଙ୍କର ଆର୍‌ସିବି ଟିମ୍‌।

ହାରିବା ଓ ଜିତିବା ‌ଖେଳର ଏକ ଅଂଶ ହୋଇଥିବା ବେଳେ ସୋସିଆଲ୍‌ ମିଡିଆରେ କୋହଲିଙ୍କର ପ୍ରଶଂସକ ଦଳ ଶୁଭମନ ଗିଲ୍‌ ଓ ତାଙ୍କ ପରିବାର ଲୋକଙ୍କୁ ଟାର୍ଗେଟ କରିଛନ୍ତି। କିଛି ସୋସିଆଲ୍‌ ମିଡିଆ ବ୍ୟବହାରକାରୀ ଶୁଭମନ୍‌ ଗିଲ୍‌ଙ୍କ ଭଉଣୀ ଶାହନିଲ୍‌ ଗିଲ୍‌ଙ୍କୁ ତାଙ୍କ ପୋଷ୍ଟ୍‌ରେ ଆଡୁସାଡୁ କମେଣ୍ଟ୍‌ କରିଛନ୍ତି। ବିଶେଷ କରି ମ୍ୟାଚ୍‌ ସରିବା ପରେ ଶାହନିଲ୍‌ ଯେଉଁ ପୋଷ୍ଟ୍‌ କରିଛନ୍ତି ସେଥିରେ ତାଙ୍କୁ ଅନେକ ଘୃଣା ମିଳିଛି।

ଶାହନିଲ୍‌ ମ୍ୟାଚ୍‌ର କିଛି ଫଟୋ ସେୟାର୍‌ କରି ଏକ ପୋଷ୍ଟ୍‌ କରିଥିବା ବେଳେ ଅନେକ ପ୍ରଶଂସକ ସେ ଗିଲ୍‌ଙ୍କ ଭଉଣୀ ହୋଇଥିବାରୁ ତାଙ୍କୁ ଆଘାତ ଦେବା ପରି କମେଣ୍ଟ୍‌ କରିଛନ୍ତି। ତେବେ ଘୃଣା କମେଣ୍ଟ୍‌ କରିଥିବା କିଛି ବ୍ୟବହାରକାରୀଙ୍କୁ ନିନ୍ଦା କରିଛନ୍ତି ଗିଲ୍‌ଙ୍କ ପ୍ରଶଂସକ।

ଉଲ୍ଲେଖଯୋଗ୍ୟ, ଚଳିତ ଆଇପିଏଲ୍‌ର ଗ୍ରୁପ୍ ପର୍ଯ୍ୟାୟ ରବିବାର ଶେଷ ହୋଇଥିବାବେଳେ ବିରାଟ କୋହଲିଙ୍କ ଟ୍ରଫି ଜିତିବା ଆଶା ଧୂଳିସାତ ହୋଇଛି । ବ୍ୟକ୍ତିଗତ ଭାବେ କୋହଲି ଶତକ ହାସଲ କରିଥିବାବେଳେ ବେଙ୍ଗାଲୁରୁରେ ହିଁ ଆର୍‌ସିବିକୁ ୬ ୱିକେଟ୍‌ରେ ହରାଇ ଦେଇଥିଲା ଗୁଜରାଟ ଟାଇଟନ୍ସ। ଏହି ପରାଜୟ ସହ ମୁମ୍ବାଇ ଇଣ୍ଡିଆନ୍ସର ପ୍ଲେ ଅଫ୍ ପ୍ରବେଶ ମଧ୍ୟ ନିଶ୍ଚିତ ହୋଇଯାଇଥିଲା। ମଙ୍ଗଳବାର କ୍ବାଲିଫାୟାର-୧ରେ ଗୁଜରାଟ ଟାଇ‌ଟନ୍ସ-ଚେନ୍ନାଇ ସୁପରକିଙ୍ଗ୍ସ ଏବଂ ବୁଧବାର ଏଲିମିନେଟରରେ ମୁମ୍ବାଇ ଇଣ୍ଡିଆନ୍ସ-ଲକ୍ଷ୍ନୌ ସୁପର ଜାଏଣ୍ଟସ୍‌ ମୁକାବିଲା ହେବ।