ଟେଷ୍ଟରେ ପରାଜୟ ପରେ ଟିମ ଇଣ୍ଡିଆକୁ ଏହି ଝଟକା ଦେଲା ଆଇସିସି

ମୁମ୍ବାଇ: ସେଞ୍ଚୁରିଅନ୍ ଟେଷ୍ଟରେ ସମ୍ପୂର୍ଣ୍ଣ ହାତ ଟେକି ଆତ୍ମସମର୍ପଣ କରିଥିଲା ଭାରତ। ଦ୍ରୁତ ବୋଲରଙ୍କ ଦାୟିତ୍ବହୀନ ବୋଲିଂ ପରେ ବ୍ୟାଟରଙ୍କ ଦୟନୀୟ ପ୍ରଦର୍ଶନ ଭାରତକୁ ଦକ୍ଷିଣ ଆଫ୍ରିକାରେ ଲଜ୍ଜାଜନକ ପରାଜୟ‌ ଦେଇଛି। ଘରୋଇ ଦଳ ମାତ୍ର ୩ ଦିନ ଭିତରେ ଏକ ପାଳି ଓ ୩୨ ରନ୍‌ରେ ଜିତି ୨ ମ୍ୟାଚ୍‌ ଶୃଙ୍ଖଳାରେ ୧-୦ରେ ଆଗୁଆ ହୋଇଯାଇଛି। ଭାରତର ପ୍ରଥମ ପାଳି ୨୪୫ ଜବାବରେ ଘରୋଇ ଦଳ ୪୦୮ ରନ୍‌ କରିଥିଲା। କିନ୍ତୁ ଭାରତ ଦ୍ବିତୀୟ ପାଳିରେ ମାତ୍ର ୧୩୧ ରନ୍‌ରେ ଅଲଆଉଟ୍‌ ହୋଇଯାଇଥିଲା। ଫଳରେ ୩୧ ବର୍ଷ ପରେ ଭାରତର ଦକ୍ଷିଣ ଆଫ୍ରିକାରେ ଟେଷ୍ଟ ଶୃଙ୍ଖଳା ଜିତିବାର ସ୍ବପ୍ନ ପୁଣି ଅଧୁରା ରହିଯାଇଥିଲା । ତେବେ ଏହି ପରାଜୟ ପରେ ଟିମ୍ ଇଣ୍ଡିଆକୁ ଆଉ ଏକ ଝଟକା ଲାଗିଛି । ବାସ୍ତବରେ ମନ୍ଥର ଓଭର ବୋଲିଂ ପାଇଁ ଆଇସିସି ଭାରତୀୟ ଦଳ ଉପରେ ଜରିମାନା ଲଗାଇଛି ।

ଟିମ୍ ଇଣ୍ଡିଆ ଉପରେ ମ୍ୟାଚ୍ ଫି’ର ୧୦ ପ୍ରତିଶତ ଜରିମାନା ଲଗାଯାଇଛି | ପରାଜୟ ପରେ ଭାରତୀୟ ଦଳ ମଧ୍ୟ ବିଶ୍ୱ ଟେଷ୍ଟ ଚାମ୍ପିୟନଶିପ୍‌ର ଦୁଇଟି ପଏଣ୍ଟ ହରାଇଛି। ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଟେଷ୍ଟ ସିରିଜର ପ୍ରଥମ ମ୍ୟାଚ୍ ସେଞ୍ଚୁରିଅନରେ ଖେଳାଯାଇଥିଲା | ଏହି ମ୍ୟାଚ୍‌ରେ ରୋହିତ ଶର୍ମାଙ୍କ ଅଧିନାୟକତ୍ୱରେ ଟିମ୍ ଇଣ୍ଡିଆ ଦୁଇ ଓଭର କମ୍ ବୋଲିଂ କରିଥିଲା। ଏହି କାରଣରୁ ଟିମ୍ ଇଣ୍ଡିଆର ବିଶ୍ୱ ଟେଷ୍ଟ ଚାମ୍ପିଅନସିପରୁ ୨ ପଏଣ୍ଟ କଟାଯାଇଛି। ଏହା ସହିତ ଆଇସିସି ମ୍ୟାଚ୍ ଫିସର ୧୦ ପ୍ରତିଶତ ଜରିମାନା ମଧ୍ୟ ଲଗାଇଛି | ଆଇସିସି ନିୟମ ଅନୁଯାୟୀ, ଯଦି ଦଳ ନିର୍ଦ୍ଦିଷ୍ଟ ସମୟ ମଧ୍ୟରେ ଏକ ନିର୍ଦ୍ଦିଷ୍ଟ ସଂଖ୍ୟକ ଓଭର ବୋଲିଂ କରିବାରେ ଅସମର୍ଥ, ତେବେ ଏହା ଏକ ମନ୍ଥର ଓଭର ବୋଲିଂ ବୋଲି ଧରାଯାଏ।

ଏଭଳି ପରିସ୍ଥିତିରେ ଖେଳାଳିଙ୍କୁ ପ୍ରତ୍ୟେକ ଓଭର ପାଇଁ ମ୍ୟାଚ୍ ଫି ର ୫ ପ୍ରତିଶତ ଜରିମାନା କରାଯାଏ। ଦକ୍ଷିଣ ଆଫ୍ରିକା ବିପକ୍ଷରେ ଟିମ୍ ଇଣ୍ଡିଆ ୨ ଓଭର କମ୍ ବୋଲିଂ କରିଥିଲା। ଏହି କାରଣରୁ ତାଙ୍କ ଉପରେ ମ୍ୟାଚ୍ ଫି ର ୧୦ ପ୍ରତିଶତ ଜରିମାନା ଲଗାଯାଇଛି | ସୂଚନା ଥାଉ କି ଯେ ବିଶ୍ୱ ଟେଷ୍ଟ ଚାମ୍ପିଅନସିପର ପଏଣ୍ଟ ଟେବୁଲରେ ଟିମ୍ ଇଣ୍ଡିଆ ବର୍ତ୍ତମାନ ଷଷ୍ଠ ସ୍ଥାନରେ ରହିଛି। ଦକ୍ଷିଣ ଆଫ୍ରିକା ଶୀର୍ଷରେ ଅଛି | ପାକିସ୍ତାନ ଦ୍ୱିତୀୟ ଓ ନ୍ୟୁଜିଲ୍ୟାଣ୍ଡ ତୃତୀୟ ସ୍ଥାନରେ ଏବଂ ବାଂଲାଦେଶ ଚତୁର୍ଥ ସ୍ଥାନରେ ରହିଛି। ଅଷ୍ଟ୍ରେଲିଆ ବିଷୟରେ କହିବାକୁ ଗଲେ ଏହା ପଞ୍ଚମ ସ୍ଥାନରେ ରହିଛି।