ସିଲହଟ୍ : ବାଂଲାଦେଶ ‘ଏ’ ବିପକ୍ଷ ଦ୍ବିତୀୟ ତଥା ଶେଷ ଅଣଔପଚାରିକ ଟେଷ୍ଟ୍ରେ ଭାରତ ‘ଏ’ ଏକ ପାଳି ଓ ୧୨୩ ରନ୍ରେ ବିଜୟୀ ହୋଇଛି। ଏଥିସହିତ ଅଭିମନ୍ୟୁ ଈଶ୍ବରନଙ୍କ ଭ୍ରମଣକାରୀ ଭାରତୀୟ ଦଳ ୨ ମ୍ୟାଚ୍ ଶୃଙ୍ଖଳାକୁ ମଧ୍ୟ ୧-୦ରେ ଜିତିନେଇଛି। ଶୁକ୍ରବାର ଦ୍ବିତୀୟ ଟେଷ୍ଟର ଅନ୍ତିମ ଦିବସରେ ସୌରଭ କୁମାରଙ୍କ ସ୍ପିନ୍ ଯାଦୁରେ ଭାରତ ବିଜୟୀ ହୋଇପାରିଥିଲା। ପ୍ରଥମ ପାଳିରେ ୩୧୦ ଅଗ୍ରଣୀ ରହିଥିବା ଭାରତ ପାଇଁ ସୌରଭ ୬ ୱିକେଟ୍ ସଫଳତା ପାଇଥିଲେ। ବାଂଲାଦେଶ ଏକଦା ୧୧୦/୩ରେ ଥିବାରୁ ମ୍ୟାଚ୍କୁ ଅମୀମାଂସିତ ରଖିପାରିବ ବୋଲି ବିଶ୍ବାସ ହେଉଥିଲା। ସୌରଭ କୁମାର (୩୦-୧୦-୭୪-୬) କିନ୍ତୁ ବାଂଲାଦେଶ ପାଳିକୁ ବିଗାଡି ଦେବାରୁ ଘରୋଇ ଦଳ ଏହାର ଶେଷ ୭ ୱିକେଟ୍ ୭୭ ରନ୍ ବିନିମୟରେ ହରାଇ ପରାଜୟ ବରଣ କରିଥିଲା।
Sambad is now on WhatsApp
Join and get latest news updates delivered to you via WhatsApp
ସୌରଭଙ୍କ ବ୍ୟତୀତ ଦୁଇ ଅଭିଜ୍ଞ ଦ୍ରୁତ ବୋଲର ଉମେଶ ଯାଦବ ଏବଂ ନଭଦୀପ ସୈନି ୨-୨ ୱିକେଟ୍ ବାଣ୍ଟି ନେଇଥିଲେ। ପ୍ରାରମ୍ଭିକ ବ୍ୟାଟର୍ ସଦମ୍ୟାନ୍ ଇସଲାମ (୯୩*, ୨୩୦ ବଲ୍) ଶେଷ ପର୍ଯ୍ୟନ୍ତ ଲଢ଼ିଥିଲେ ମଧ୍ୟ ସାଥିହରା ହୋଇ ଦଳକୁ ବଞ୍ଚାଇ ପାରିନଥିଲେ। ବାଂଲାଦେଶ ଦ୍ବିତୀୟ ପାଳି ୧୮୭ ରନ୍ରେ ଶେଷ ହୋଇଯାଇଥିଲା। ପୂର୍ବରୁ ବାଂଲାଦେଶର ପ୍ରଥମ ପାଳି ୨୫୨ ରନ୍ ଜବାବରେ ଭାରତ ୫୬୨/୯ରେ ଘୋଷଣା କରିଥିଲା। ବାଂଲାଦେଶ ପ୍ରଥମ ପାଳିରେ ମୁକେଶ କୁମାର ୬ ୱିକେଟ୍ ଏବଂ ଭାରତ ପାଳିରେ ଅଧିନାୟକ ଅଭିମନ୍ୟୁ ଈଶ୍ବରନ୍ (୧୫୭) ଶତକ ହାସଲ କରିବା ଉଲ୍ଲେଖନୀୟ ଥିଲା।