‘ଶ୍ରୀଶାନ୍ତଙ୍କ ପୋଷ୍ଟର ପ୍ରତିକ୍ରିୟା ଦେବା ପାଇଁ ମୋ ପାଖରେ ଶବ୍ଦ କି ସମୟ ନାହିଁ’: ଗମ୍ଭୀର

ନୂଆଦିଲ୍ଲୀ: ଲିଜେଣ୍ଡ୍‌ସ ଲିଗ୍‌ କ୍ରିକେଟ୍‌ (ଏଲ୍‌ଏଲ୍‌ସି)ରେ ଇଣ୍ଡିଆ କ୍ୟାପିଟାଲ୍ସ ଓ ଗୁଜରାଟ ଜାଏଣ୍ଟସ୍‌ ମଧ୍ୟରେ ଖେଳାଯାଇଥିବା ମ୍ୟାଚ୍‌ ସମୟରେ ଗମ୍ଭୀର ଓ ପୂର୍ବତନ ଦ୍ରୁତ ବୋଲର ଏସ୍‌ ଶ୍ରୀଶାନ୍ତଙ୍କ ମଧ୍ୟରେ ଯୁକ୍ତିତର୍କ ଲାଗିଥିଲା।

ଏହି ଘଟଣାର ଏକ ଭିଡିଓକୁ ଶ୍ରୀଶାନ୍ତ ସାମାଜିକ ଗଣମାଧ୍ୟମରେ ସେୟାର କରିବା ସହ ଗମ୍ଭୀର ବାରମ୍ବାର ତାଙ୍କୁ ‘ଫିକ୍ସର’ କହି ସମ୍ବୋଧନ କରୁଥିବା କହିଥିଲେ।

ଶ୍ରୀଶାନ୍ତଙ୍କ ଏଭଳି ପୋଷ୍ଟକୁ ନେଇ ଗମ୍ଭୀରଙ୍କୁ ନିକଟରେ ପ୍ରଶ୍ନ କରାଯିବାରୁ ସେ କହିଥିଲେ, ‘ଏହି ଘଟଣାକୁ ନେଇ କିଛି କହିବାକୁ ମୋ ପାଖରେ ଶବ୍ଦ ନାହିଁ। ମୁଁ ଏଠାକୁ ଏକ ଭଲ କାମ ପାଇଁ ଆସିଛି। ତେଣୁ ଅଯଥା କଥାକୁ ନେଇ ସମୟ ନଷ୍ଟ କରିବାକୁ ଚାହୁଁ ନାହିଁ।’

ଏଲ୍‌ଏଲ୍‌ସିରେ ଇଣ୍ଡିଆ କ୍ୟାପିଟାଲ୍ସ ଓ ଗୁଜରାଟ ଜାଏଣ୍ଟସ୍‌ ମଧ୍ୟରେ ଖେଳାଯାଇଥିବା ମ୍ୟାଚ୍‌ ସମୟରେ ଗମ୍ଭୀର ଓ ପୂର୍ବତନ ଦ୍ରୁତ ବୋଲର ଏସ୍‌ ଶ୍ରୀଶାନ୍ତଙ୍କ ମଧ୍ୟରେ ଲାଗିଥିବା ଝଗଡ଼ାର ଭିଡିଓ ସେୟାର କରି ଗମ୍ଭୀରଙ୍କ ବିରୋଧରେ ଅଭିଯୋଗ ଆଣି କହିଥିଲେ, ‘ଗମ୍ଭୀର ଲାଇଭ ଟିଭରେ ‘ଫିକ୍ସର’ ‘ଫିକ୍ସର’ କହି ଚିଡ଼ାଉଥିଲେ।

ସେତେବେଳେ ମୁଁ କେବଳ ଗମ୍ଭୀରଙ୍କୁ କ’ଣ କହୁଛନ୍ତି ବୋଲି ପଚାରିବା ସହିତ ସ୍ମିତହାସ୍ୟ ଦେଇଥିଲି। ହେଲେ ଗମ୍ଭୀର ମୋତେ ପଡ଼ିଆରେ ଚିଡ଼ାଇଥିଲେ। ଆମ ଦୁହିଁଙ୍କ ଝଗଡ଼ା ଦେଖି ଅମ୍ପାୟାର ଦୌଡ଼ି ଆସିଥିଲେ। ଏହି ସମୟରେ ଗମ୍ଭୀର ଅମ୍ପାୟାରଙ୍କ ସହିତ ଉଚ୍ଚସ୍ବରରେ କଥା ହେବା ସହିତ ଯୁକ୍ତିତର୍କ ମଧ୍ୟ କରିଥିଲେ ।