ଲଣ୍ଡନ : ଦୁଇ ନୂଆବଲ୍ ଦ୍ରୁତ ବୋଲର ସାମ୍ କରନ (୫/୪୮) ଓ ଡେଭିଡ୍ ୱିଲି (୪/୬୪)ଙ୍କ ଘାତକ ବୋଲିଂ ପରେ ଓପ୍ନର ଜାସନ୍ ରୟ, ଜୋ ରୁଟ୍ ଓ ଅଧିନାୟକ ଇଅନ୍ ମୋର୍ଗାନ୍ଙ୍କ ଅର୍ଦ୍ଧଶତକୀୟ ପାଳି ବଳରେ ଘରୋଇ ଇଂଲଣ୍ଡ ଦ୍ବିତୀୟ ଦିନିକିଆ ମ୍ୟାଚ୍ରେ ଭ୍ରମଣକାରୀ ଶ୍ରୀଲଙ୍କାକୁ ୮ ୱିକେଟ୍ରେ ପରାସ୍ତ କରିଦେଇଛି। ଏଥି ସହିତ ୨-୦ରେ ଆଗୁଆ ରହି ୩ ମ୍ୟାଚ୍ ବିଶିଷ୍ଟ ଶୃଙ୍ଖଳାକୁ ଜିତିନେଇଛି ଇଂଲଣ୍ଡ। ୫ ୱିକେଟ୍ ସଫଳତା ହାସଲ କରିଥିବା ସାମ୍ କରନ୍ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ।
Sambad is now on WhatsApp
Join and get latest news updates delivered to you via WhatsApp
ଗୁରୁବାର ରାତିରେ କେନିଙ୍ଗ୍ଟନ୍ ଓଭାଲ ପଡ଼ିଆରେ ଖେଳାଯାଇଥିବା ଏହି ମ୍ୟାଚ୍ରେ ଟସ୍ ହାରି ବ୍ୟାଟିଂ ପାଇଥିବା ଶ୍ରୀଲଙ୍କା ୯ ୱିକେଟ୍ ବିନିମୟରେ ୨୪୧ ରନ୍ କରିପାରିଥିଲା। ଧନଞ୍ଜୟ ଡି’ସିଲ୍ଭା ୯୧ ରନ୍ କରିଥିଲେ। ଜବାବରେ ଜାସନ୍ ରୟ (୬୦, ୫୨ ବଲ୍, ୧୦ ଚୌକା) ଓ ଜନି ବେୟାରଷ୍ଟୋ (୨୯, ୩୬ ବଲ୍, ୩ ଚୌକା, ୧ ଛକା) ପ୍ରଥମ ୱିକେଟ୍ରେ ୭୬ ରନ୍ ଯୋଡ଼ିଥିଲେ। ଦଳୀୟ ସ୍କୋର୍ ୧୦୪ ବେଳକୁ ଉଭୟ ପାଭିଲିୟନ୍ ଫେରିଯାଇଥିଲେ। ଏହାପରେ କିନ୍ତୁ ଶ୍ରୀଲଙ୍କା ବୋଲରଙ୍କୁ ନିରାଶ କରିଥିଲେ ରୁଟ୍ ଓ ମୋର୍ଗାନ୍। ଦୁହେଁ ଅସମାପ୍ତ ତୃତୀୟ ୱିକେଟ୍ରେ ୧୪୦ ରନ୍ ଯୋଡ଼ି ଇଂଲଣ୍ଡକୁ ୭ ଓଭର ପୂର୍ବରୁ ୮ ୱିକେଟ୍ର ଅତି ସହଜ ବିଜୟ ଭେଟି ଦେଇଥିଲେ। ରୁଟ୍ ୬୮ (୮୭ ବଲ୍, ୫ ଚୌକା) ଓ ମୋର୍ଗାନ୍ ୭୫ (୮୩ ବଲ୍, ୮ ଚୌକା, ୧ ଛକା) ରନ୍ରେ ଅପରାଜିତ ରହିଥିଲେ। ଦଳ ୪୩ ଓଭରରେ ୨୪୪/୨ କରିନେଇଥିଲା। ଆସନ୍ତା ରବିବାର ତୃତୀୟ ତଥା ଶେଷ ଦିନିକିଆ ବ୍ରିଷ୍ଟଲ୍ରେ ଖେଳାଯିବ।