ଭୁବନେଶ୍ବର: ପ୍ୟାରିସ୍ ଅଲିମ୍ପିକ୍ସ ବଂଧୁକଚାଳନା ଇଭେଣ୍ଟ ପାଇଁ ଯୋଗ୍ୟତା ଅର୍ଜନ କରି ସାରିଥିବା ଓଡ଼ିଆ ଝିଅ ଶ୍ରୀୟଙ୍କା ଷଡ଼ଙ୍ଗୀ ଶୁକ୍ରବାର ଆଉ ଏକ ଅନ୍ତର୍ଜାତୀୟ ସଫଳତା ପାଇଛନ୍ତି। ପୋଲାଣ୍ଡ୍‌ରେ ଅନୁଷ୍ଠିତ ଅନ୍ତର୍ଜାତୀୟ ସୁଟିଂ ଗ୍ରାଁ ପ୍ରିର ୫୦ ମିଟର୍‌ ରାଇଫଲ୍ ଥ୍ରୀ ପୋଜିସନ୍ (୩ପି)ରେ ଶ୍ରୀୟଙ୍କା ରୌପ୍ୟ ପଦକ ଜିତିଛନ୍ତି। ଆଇଏସ୍‌ଏସ୍‌ଏଫ୍‌ର ରୋଡ୍‌ ଟୁ ପ୍ୟାରିସ୍ ୨୦୨୪ ଅଭିଯାନ ଅନ୍ତର୍ଗତ ଏହି ପ୍ରତିଯୋଗିତାରେ ଶ୍ରୀୟଙ୍କା ଚମତ୍କାର ପ୍ରଦର୍ଶନ କରି ଦ୍ବିତୀୟ ସ୍ଥାନ ଦଖଲ କରିଥିଲେ। ସୂଚନା‌ଯୋଗ୍ୟ ୫୦ ମିଟର୍ ରାଇଫଲ୍ ଥ୍ରୀ ପୋଜିସନ୍‌ରେ ଶ୍ରୀୟଙ୍କା ପ୍ୟାରିସ୍ ଟିକେଟ୍ ଅର୍ଜନ କରିସାରିଛନ୍ତି। ୧୯୮୪ ମସିହାରେ ଏ‌ହି ଇଭେଣ୍ଟ୍‌ ପଦାର୍ପଣ କରିଥିବା‌ବେଳେ ପ୍ୟାରିସ୍‌ରେ କଡ଼ା ପ୍ରତିଦ୍ବନ୍ଦ୍ବିତା ହେବାର ସମ୍ଭାବନା ରହିଛି। ତଥାପି ଶ୍ରୀୟଙ୍କାଙ୍କ ସହ କାଜାକସ୍ତାନର ଆରିନା ଅଲଟୁକୋଭା ଓ ସ୍ବିଜରଲାଣ୍ଡ୍‌ର ଟୋକିଓ ଅଲିମ୍ପିକ୍ ସ୍ବର୍ଣ୍ଣ ବିଜେତା ନିନା କ୍ରିଷ୍ଟେନ୍‌ ଶୀର୍ଷ ୩ ଦାବିଦାର ରହିଛନ୍ତି। ବିଶ୍ବ ରେକର୍ଡଧାରୀ ଭାରତର ସ୍ବିଫ୍ଟ କଉର୍ ସାମରା ଓ ବ୍ରିଟେନ୍‌ର ପୂର୍ବତନ ବିଶ୍ବ ରେକର୍ଡଧାରୀ ତଥା ବର୍ତମାନ ବିଶ୍ବର ଏକ ନମ୍ବର ଖେଳାଳି ‌ସେଓନୈଡ ମ୍ୟାକଣ୍ଟସ୍‌ ମଧ୍ୟ ପଦକ ଦୌଡ଼ରେ ଆହ୍ବାନ ସୃଷ୍ଟି କରିବେ। କିଟ୍‌ ଛାତ୍ରୀ ଶ୍ରୀୟଙ୍କାଙ୍କୁ ଏହାର ପ୍ରତିଷ୍ଠାତା ସାଂସଦ ଅଚ୍ୟୁତ ସାମନ୍ତ ଅଭିନନ୍ଦନ ସହ ଶୁଭକାମନା ମଧ୍ୟ ଜଣାଇଛନ୍ତି।