ସୁଲ୍ତାନ ଜୋହର କପ୍ ହକି: ଭାରତ ୫-ଅଷ୍ଟ୍ରେଲିଆ ୫
ଜୋହର: ଚଳିତ ସୁଲ୍ତାନ ଜୋହର କପ୍ ହକି ପ୍ରତିଯୋଗିତାର ଦଶମ ସଂସ୍କରଣରେ ଭାରତୀୟ କନିଷ୍ଠ (୨୧ ବର୍ଷରୁ କମ୍) ହକି ଦଳ ଚତୁର୍ଥ ମ୍ୟାଚ୍ରେ ପଏଣ୍ଟ ଭାଗ କରିଛି। ମାଲେସିଆକୁ ୫-୨ ଗୋଲ୍ରେ ପରାସ୍ତ କରି ଅଭିଯାନ ଆରମ୍ଭ କରିଥିବା ଭାରତ ଦକ୍ଷିଣ ଆଫ୍ରିକା ନିକଟରୁ ଦ୍ବିତୀୟ ମ୍ୟାଚ୍ ହାରିଯାଇଥିଲା। ହେଲେ ତୃତୀୟ ମ୍ୟାଚ୍ରେ ଜାପାନକୁ ୫-୧ ଗୋଲ୍ରେ ପରାସ୍ତ କରି ବିଜୟ ଧାରାକୁ ଫେରିଥିଲା। ଏହାପରେ ବୁଧବାର ଶକ୍ତିଶାଳୀ ଅଷ୍ଟ୍ରେଲିଆ ସହ ୫-୫ ଗୋଲ୍ରେ ମ୍ୟାଚ୍ ଅମୀମାଂସିତ ରଖି ପଏଣ୍ଟ ତାଲିକାର ଦ୍ବିତୀୟ ସ୍ଥାନରେ ଅବିଚଳିତ ରହିଛି। ଭାରତ ୨ ବିଜୟ, ୧ ପରାଜୟ ଓ ୧ ଅମୀମାଂସିତ ସହ ୭ ପଏଣ୍ଟ ପାଇଥିଲା ବେଳେ ଅଷ୍ଟ୍ରେଲିଆ ୩ ବିଜୟ ଓ ୧ ଅମୀମାଂସିତ ସହ ୧୦ ପଏଣ୍ଟ ପାଇଁ ଶୀର୍ଷରେ ରହିଛି। ଶୁକ୍ରବାର ଭାରତ ତା’ର ପଞ୍ଚମ ତଥା ଶେଷ ଲିଗ୍ ମ୍ୟାଚ୍ ବ୍ରିଟେନ ସହ ଖେଳିବ।
Sambad is now on WhatsApp
Join and get latest news updates delivered to you via WhatsApp
ବୁଧବାର ମ୍ୟାଚ୍ରେ ଭାରତ ପକ୍ଷରୁ ବିବି ସିଂହ ଧାମୀ (୨ ମିନିଟ୍), ଶାରଦାନନ୍ଦ ତିୱାରୀ (୮ ଓ ୩୫ ମିନିଟ୍), ଅରିଜିତ ସିଂହ ହୁଣ୍ଡାଲ (୧୮ ମିନିଟ୍) ଓ ଅମନଦୀପ (୬୦ ମିନିଟ୍) ଗୋଲ୍ ସ୍କୋରର୍ ରହିଥିଲା ବେଳେ ଅଷ୍ଟ୍ରେଲିଆ ପକ୍ଷରୁ ଲିଆମ୍ ହାର୍ଟ (୩ ମିନିଟ୍), ଜାକ୍ ହୋଲାଣ୍ଡ (୮ ମିନିଟ୍), ଜୋସୁଆ ବ୍ରୁକ୍ସ (୨୦ ଓ ୪୧ ମିନିଟ୍) ଓ ଜାକେ ଲାମ୍ବେଥ୍ (୪୯ ମିନିଟ୍) ଗୋଲ୍ ସ୍କୋରର୍ ରହିଥିଲେ। ଏହି ମ୍ୟାଚ୍ର ପ୍ରଥମ କ୍ବାର୍ଟର ୨-୨, ମଧ୍ୟାନ୍ତର ୩-୩, ଚତୁର୍ଥ କ୍ବାର୍ଟର ୪-୪ ଏବଂ ନିଦ୍ଧାରିତ ସମୟ ୫-୫ ଗୋଲ୍ରେ ବରାରବ ରହିଥିଲା। ଏଥି ସହିତ ୧୦ ଗୋଲ୍ ବିଶିଷ୍ଟ ଏହି ଉତ୍କଣ୍ଠାପୂର୍ଣ୍ଣ ମ୍ୟାଚ୍ରେ ଉଭୟ ଦଳ ଗୋଟିଏ ଲେଖାଏଁ ପଏଣ୍ଟ ବାଣ୍ଟି ନେଇଥିଲେ।