ସିଡନି : ଅଷ୍ଟ୍ରେଲିଆରେ ଚାଲିଥିବା ଟି-୨୦ ବିଶ୍ବକପରେ ବିଭିନ୍ନ ପ୍ରକାରର ପରିଚାଳନାଗତ ସମସ୍ୟା ଦେଖିବାକୁ ମିଳିଛି । କେଉଁଠାରେ ଖେଳାଳିଙ୍କୁ ନିମ୍ନମାନର ଖାଦ୍ୟ ଦିଆଯାଉଥିବାବେଳେ ଆଉ କେଉଁଠି ହୋଟେଲଠାରୁ ଷ୍ଟାଡିୟମ ବହୁ ଦୂରରେ ରହିଲାଣି । ଏହାକୁ ନେଇ ଟିମ ଇଣ୍ଡିଆ ଅସନ୍ତୋଷ ପ୍ରକଟ କରିଛି ।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ଦଳ ରହୁଥିବା ହୋଟେଲଠାରୁ ସିଡନି ଗ୍ରାଉଣ୍ଡ ୪୨ କିଲୋମିଟର ଦୂର ହୋଇଥିବାରୁ ଭାରତୀୟ ଦଳ ବୁଧବାର ହେବାକୁ ଥିବା ଅଭ୍ୟାସ ବାତିଲ କରିଛି । ଅଭ୍ୟାସ ପାଇଁ ଏତେ ବାଟ ନ ଯିବାକୁ ଭାରତୀୟ ଖେଳାଳିମାନେ ରାଜି ନ ହେବାରୁ ଅଭ୍ୟାସକୁ ବାତିଲ କରାଯାଇଥିଲା ।
ଗତ ମଙ୍ଗଳବାରଦିନ ଅଭ୍ୟାସ ସେସନ ପରେ ପରଶାଯାଇଥିବା ନିମ୍ନମାନର ଖାଦ୍ୟକୁ ନେଇ ଭାରତୀୟ ଦଳ ଅସନ୍ତୋଷ ପ୍ରକଟ କରିଥିଲା । କଠିନ ଅଭ୍ୟାସ ପରେ ଗରମ ଖାଦ୍ୟ ବଦଳରେ ଥଣ୍ଡା ସାଣ୍ଡଓ୍ବିଚ୍ ଦିଆଯିବାକୁ ନେଇ ଖେଳାଳିମାନେ ଅସନ୍ତୋଷ ପ୍ରକଟ କରିଥିଲେ ଓ ନ ଖାଇ ହୋଟେଲରେ ଖାଇଥିଲେ ।
ଭାରତୀୟ କ୍ରିକେଟ ଦଳର ସଦସ୍ୟମାନଙ୍କୁ ଖରାପ ଖାଦ୍ୟ ଦିଆଯିବା ପ୍ରସଙ୍ଗ ଆଇସିସି ନିକଟରେ ପହଞ୍ଚିଛି । ଭାରତୀୟ ଟିମ ମ୍ୟାନେଜମେଣ୍ଟ ପକ୍ଷରୁ ଏ ନେଇ ଅଭିଯୋଗ କରାଯିବା ପରେ ଆଇସିସି ପକ୍ଷରୁ କୁହାଯାଇଛି ଯେ ଖୁବଶୀଘ୍ର ଏହି ସମସ୍ୟାର ସମାଧାନ କରିଦିଆଯିବ ।
ସୂଚନାଯୋଗ୍ୟ ଯେ, ଦ୍ବିପାକ୍ଷିକ ସିରିଜରେ ଆୟୋଜକ ଦେଶ ହୋଟେଲ ଓ ଖାଦ୍ୟ ଆଦି ଆୟୋଜନ କରିଥାଏ । କିନ୍ତୁ ଆଇସିସି ଟୁର୍ଣ୍ଣାମେଣ୍ଟରେ ଏସବୁ ଆୟୋଜନ ଆଇସିସି କରିଥାଏ ।