ହାରାରେ : ଜିମ୍ବାଓ୍ବେ ଗସ୍ତରେ ଥିବା ଭାରତୀୟ କ୍ରିକେଟ ଦଳ ହାରାରେଠାରେ ଜାତୀୟ ପତାକା ଉତ୍ତୋଳନ କରି ସ୍ବାଧୀନତା ଦିବସ ପାଳନ କରିଛି । ଭାରତୀୟ ଦଳ ରହୁଥିବା ହୋଟେଲଠାରେ ମୁଖ୍ୟ କୋଚ ଭି.ଭି.ଏସ ଲକ୍ଷ୍ମଣ, ଅଧିନାୟକ କେ.ଏଲ.ରାହୁଲ, ଉପ-ଅଧିନାୟକ ଶିଖର ଧଓ୍ବନ ଓ ଦଳର ଅନ୍ୟ ସଦସ୍ୟଙ୍କ ଉପସ୍ଥିତିରେ ପତାକା ଉତ୍ତୋଳନ କରାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ଏହି ସ୍ବାଧୀନତା ଦିବସ ପାଳନର ଏକ ଭିଡିଓ କେ.ଏଲ.ରାହୁଲ ନିଜର ଇନଷ୍ଟାଗ୍ରାମ ଆକାଉଣ୍ଟରେ ସେୟାର କରିଥିବାବେଳେ ଶିଖର ଧଓ୍ବନ ନିଜ ଇନଷ୍ଟାଗ୍ରାମ ଆକାଉଣ୍ଟରେ ଏକ ଭିଡିଓ ବାର୍ତ୍ତା ସେୟାର କରିଛନ୍ତି । ଅନ୍ୟପକ୍ଷରେ ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର ମୁମ୍ବାଇଠାରେ ନିଜ ଘରେ ପତାକା ଉତ୍ତୋଳନ କରିଛନ୍ତି ।
ଜିମ୍ବାଓ୍ବେ ଗସ୍ତରେ ଥିବା ଭାରତୀୟ ଦଳ ୧୮ରୁ ୨୨ ମଧ୍ୟରେ ୩ଟି ଦିନିକିଆ ମ୍ୟାଚ ଖେଳିବ । ଏହି ୩ଟି ଯାକ ମ୍ୟାଚ ହାରାରେଠାରେ ଅନୁଷ୍ଠିତ ହେବ । ଏହା ପରେ ଭାରତୀୟ ଦଳ ଏସିଆ କପ ଖେଳିବାକୁ ୟୁଏଇ ଯିବ ।
ଗତ ସପ୍ତାହରେ କେ.ଏଲ. ରାହୁଲଙ୍କୁ ଜିମ୍ବାଓ୍ବେ ଗସ୍ତ ପାଇଁ ଅଧିନାୟକ ନିଯୁକ୍ତ କରାଯାଇଥିଲା । ତାଙ୍କୁ ବିସିସିଆଇର ମେଡିକାଲ ଟିମ ଫିଟ ଘୋଷଣା କରିବା ପରେ ଦଳରେ ଅନ୍ତର୍ଭୁକ୍ତ କରାଯାଇଥିଲା । ପୂର୍ବରୁ ଶିଖର ଧଓ୍ବନଙ୍କୁ ଭାରତୀୟ ଦଳର ଅଧିନାୟକ ଘୋଷଣା କରାଯାଇଥିବାବେଳେ ଏବେ ତାଙ୍କୁ ଉପଅଧିନାୟକ କରାଯାଇଛି । ସେହିପରି ଭି.ଭି.ଏସ ଲକ୍ଷ୍ମଣଙ୍କୁ ଏହି ଗସ୍ତ ପାଇଁ ମୁଖ୍ୟ କୋଚ ନିଯୁକ୍ତ କରାଯାଇଛି ।