ନୂଆଦିଲ୍ଲୀ: ଶତକୀୟ ଟେଷ୍ଟ୍‌ରେ ୯ ୱିକେଟ୍‌ ସଫଳତା ପାଇବା ପରେ ଭାରତୀୟ ଅଫ୍‌ ସ୍ପିନର ରବିଚନ୍ଦ୍ରନ ଅଶ୍ବିନ ଆଇସିସି ପୁରୁଷ ଟେଷ୍ଟ୍‌ ବୋଲିଂ ମାନ୍ୟତାରେ ଶୀର୍ଷ ସ୍ଥାନ ବଜାୟ ରଖିଛନ୍ତି। ପୂର୍ବତନ ୧ ନମ୍ବର ଯଶପ୍ରୀତ୍‌ ବୁମ୍‌ରା ଅଷ୍ଟ୍ରେଲିଆର ଜୋସ୍ ହାଜଲଉଡ୍‌ଙ୍କ ସହ ଦ୍ବିତୀୟ ସ୍ଥାନ ବାଣ୍ଟିଥିଲା ବେଳେ କୁଲଦୀପ ଯାଦବ ୧୫ଟି ସ୍ଥାନ ଉପରକୁ ଉଠି ଷୋଡ଼ଶ ସ୍ଥାନରେ ପହଞ୍ଚିଛନ୍ତି। ସେହିପରି ଭାରତୀୟ ଅଧିନାୟକ ରୋହିତ ଶର୍ମାଙ୍କ ବ୍ୟାଟିଂ ମାନ୍ୟତାରେ ମଧ୍ୟ ଭଲ ଉନ୍ନତି ହେବା ସହ ସେ ୫ଟି ସ୍ଥାନ ଉପରକୁ ଉଠି ଷଷ୍ଠ ସ୍ଥାନରେ ରହିଛନ୍ତି।

Advertisment

‌ଟେଷ୍ଟ୍‌ ଶୃଙ୍ଖଳାରେ ଖେଳି ନଥିବା ବିରାଟ କୋହଲି ଗୋଟିଏ ସ୍ଥାନ ତଳକୁ ଖସି ନବମକୁ ଆସିଛନ୍ତି। ତେବେ ଯୁବ ପ୍ରତିଭା ଯଶସ୍ବୀ ଜୟସ୍ବାଲ୍‌ ବ୍ୟାଟର୍‌ଙ୍କ ମଧ୍ୟରେ ଦୁଇଟି ସ୍ଥାନରେ ଉନ୍ନତି ଦେଖାଇ ଅଷ୍ଟମ ସ୍ଥାନ କବ୍‌ଜା କରିଛନ୍ତି। ଶୁବମନ ଗିଲ୍‌ ମଧ୍ୟ ୧୧ଟି ସ୍ଥାନ ଡେଇଁ ୨୦ତମ ସ୍ଥାନରେ ପହଞ୍ଚିଛନ୍ତି। ଅଲରାଉଣ୍ଡରଙ୍କ ମଧ୍ୟରେ ରବୀନ୍ଦ୍ର ଜାଡ଼େଜା ଶୀର୍ଷ ସ୍ଥାନରେ ସୁରକ୍ଷିତ ଅଛନ୍ତି। ତାଙ୍କ ପଛକୁ ଅଶ୍ବିନ ୧୨୨ ରେଟିଂ ପଏଣ୍ଟ ପଛରେ ରହିଛନ୍ତି।