/sambad/media/agency_attachments/2024-07-24t043029592z-sambad-original.webp)
ବ୍ୟାଙ୍କକ୍ : ଭାରତୀୟ ମିଶ୍ରିତ ଯୁଗଳ ଯୋଡ଼ି ସାତ୍ବିକସାଇରାଜ ରାଙ୍କିରେଡ୍ଡୀ ଓ ଅଶ୍ବିନୀ ପୁନପ୍ପା ବୁଧବାର ଜୀବନର ବଡ଼ ବିଜୟ ପାଇଛନ୍ତି। ଏହି ଭାରତୀୟ ଯୋଡ଼ି ଚଳିତ ଥାଇଲାଣ୍ଡ୍ ଓପନ୍ ବ୍ୟାଡ୍ମିଣ୍ଟନ୍ ପ୍ରତିଯୋଗିତାରେ ଅଲିମ୍ପିକ୍ ରୌପ୍ୟ ବିଜେତା ଚାନ୍ ପେଙ୍ଗ ସୁନ୍ ଓ ଗୋ ଲିଉ ୟିଙ୍ଗ୍ଙ୍କୁ ହରାଇ ବିପର୍ଯ୍ୟୟ ସୃଷ୍ଟି କରିଛନ୍ତି। ୨୩ ମାନ୍ୟତାପ୍ରାପ୍ତ ସାତ୍ବିକ-ଅଶ୍ବିନୀ ୨୧-୧୮, ୧୮-୨୧, ୨୧-୧୭ରେ ପଞ୍ଚମ ମାନ୍ୟତାପ୍ରାପ୍ତ ଏହି ମାଲେସିଆ ଯୋଡ଼ିଙ୍କୁ ପରାସ୍ତ କରି ବିଦାୟ ରାସ୍ତା ଦେଖାଇଥିଲେ। ସେହିଭଳି ପ୍ରଣବ ଜେରି ଚୋପ୍ରା ଓ ଏନ୍ ସିକ୍କି ରେଡ୍ଡୀ ୨୧-୧୬, ୨୧-୧୩ରେ ଜାପାନର କୋହୋଇ ଗୋଣ୍ଡୋ ଓ ଆଇନେ କୁରୁହିରାଙ୍କୁ ହରାଇଥିଲେ। ଦ୍ବିତୀୟ ପର୍ଯ୍ୟାୟରେ ସାତ୍ବିକ-ଅଶ୍ବିନୀ ଇଣ୍ଡୋନେସିଆର ଅଲ୍ଫିଆନ୍ ଇକୋ ପ୍ରାସିତ୍ୟା-ମାର୍ସିଲା ଗିଶ୍ଚାଙ୍କୁ ଏବଂ ପ୍ରଣବ-ସିକ୍କି ହଂକଂର ଟାଙ୍ଗ୍ ଚୁନ୍ ମାନ୍-ସି ୟିଙ୍ଗ୍ ସୁଏଟ୍ଙ୍କୁ ଭେଟିବେ।
ପୁରୁଷ ଏକକରେ ପଞ୍ଚମ ମାନ୍ୟତାପ୍ରାପ୍ତ କିଦାମ୍ବି ଶ୍ରୀକାନ୍ତ ୨୧-୧୩, ୧୭-୨୧, ୨୧-୧୯ରେ ଚୀନ୍ର ରେନ୍ ପେଙ୍ଗ ବୋଙ୍କୁ, ଏଚ୍ଏସ୍ ପ୍ରଣୟ ୨୧-୧୬, ୨୨-୨୦ରେ ହଂକଂର ୱଙ୍ଗ୍ ୱିଙ୍ଗ୍ କି ଭିନ୍ସେଟ୍ଙ୍କୁ, ପରୁପଲ୍ଲୀ କାଶ୍ୟପ ୧୮-୨୧, ୨୧-୮, ୨୧-୧୪ରେ ମିସା ଜିଲବର୍ମନଙ୍କୁ ଏବଂ ବି ସାଇ ପ୍ରଣିତ ୧୭-୨୧, ୨୧-୧୭, ୨୧-୧୫ରେ ଥାଇଲାଣ୍ଡର କାନ୍ତାଫୋନ ୱାଙ୍ଗଚାରେନ୍ଙ୍କୁ ହରାଇ ଦ୍ବିତୀୟ ପର୍ଯ୍ୟାୟରେ ସ୍ଥାନ ସୁରକ୍ଷିତ କରିଛନ୍ତି। ସେହିପରି ମହିଳା ଏକକରେ ସପ୍ତମ ମାନ୍ୟତାପ୍ରାପ୍ତ ସାଇନା ନେହୱାଲ ୨୧-୧୭, ୨୧-୧୯ରେ ଥାଇଲାଣ୍ଡର ଫିତାୟାପର୍ନ ଚାଇୱାନ୍ଙ୍କୁ ପରାସ୍ତ କରିଥିଲେ। ତେବେ ପୁରୁଷ ଏକକରେ ସୌରଭ ବର୍ମା ଏବଂ ସମୀର ବର୍ମାଙ୍କ ସହ ମହିଳା ଏକକରେ ସାଇ ଉତ୍ତେଜିତା ରାଓ ଚୁକା ନିଜ ନିଜ ମ୍ୟାଚ୍ ହାରି ପ୍ରଥମ ପ୍ରର୍ଯ୍ୟାୟରୁ ବିଦାୟ ନେଇଛନ୍ତି।
