ଭୁବନେଶ୍ବର : ଥାଇଲାଣ୍ଡର ପଟାୟାରେ ଚାଲିଥିବା ଥାଇଲାଣ୍ଡ ପାରା ବ୍ୟାଡ୍‌ମିଣ୍ଟନ ପ୍ରତିଯୋଗିତାର ମିଶ୍ରିତ ଯୁଗଳରୁ ବିଦାୟ ନେଇଛନ୍ତି ଓଡ଼ିଶାର ପ୍ରମୋଦ ଭଗତ। ମନୀଷା ରାମଦାସଙ୍କୁ ସାଥୀ କରି ମିଶ୍ରିତ ଯୁଗଳ ଖେଳୁଥିବା ପ୍ରମୋଦ ଶୁକ୍ରବାର ପ୍ରିକ୍ବାର୍ଟର ଫାଇନାଲ୍‌ରେ ଇଣ୍ଡୋନେସିଆ ଯୋଡ଼ି ହିକ୍‌ମତ ରାମଦାନି ଓ ଲିଆନି ରାତ୍ରୀଙ୍କଠାରୁ ୧୦-୨୧ ଓ ୧୬-୨୧ରେ ହାରିଯାଇଛନ୍ତି। ତେବେ ପ୍ରମୋଦ ଏକକ ଏବଂ ଯୁଗଳରେ କ୍ବାର୍ଟର ଫାଇନାଲ୍‌ ସ୍ଥାନ ସୁରକ୍ଷିତ କରିଛନ୍ତି। ଶୁକ୍ରବାର ଏକକ ପ୍ରିକ୍ବାର୍ଟର ଫାଇନାଲ୍‌ ମୁକାବିଲାରେ ସେ ଚୀନ୍‌ର ଚେନ୍‌ ଜିଆଓୟୁଙ୍କୁ ସିଧାସଳଖ ୨୧-୧୧ ଓ ୨୧-୧୩ରେ ପରାସ୍ତ କରିଛନ୍ତି। କ୍ବାର୍ଟର‌ ଫାଇନାଲ୍‌ରେ ପ୍ରମୋଦଙ୍କ ମୁକାବିଲା ୟୁକ୍ରେନ୍‌ର ଓଲେକ୍‌ଜାନ୍ଦ୍ର ଚିର୍‌କୋଭଙ୍କ ସହ ହେବ। ସେହିପରି ଯୁଗଳ ପ୍ରିକ୍ବାର୍ଟର ଫାଇନାଲ୍‌ରେ ପ୍ରମୋଦ ଓ ତାଙ୍କ ସାଥୀ ସୁକାନ୍ତ କଦମ ସିଧାସଳଖ କ୍ବାର୍ଟର ଫାଇନାଲ୍‌ ପ୍ରବେଶ କରିଛନ୍ତି।

Advertisment

ଯୁଗଳ କ୍ୱାର୍ଟରରେ ଦୀପରଞ୍ଜନ
ପ୍ରମୋଦଙ୍କ ଭଳି ଅନ୍ୟତମ ଓଡ଼ିଆ ତାରକା ଦୀପରଞ୍ଜନ ବିଶୋଇ ମଧ୍ୟ ଯୁଗଳ କ୍ବାର୍ଟର ଫାଇନାଲ୍‌ ସ୍ଥାନ ପକ୍କା କରିଛନ୍ତି। ଶୁକ୍ରବାର ପ୍ରିକ୍ବାର୍ଟର ଫାଇନାଲ୍‌ରେ ଦୀପରଞ୍ଜନ ଓ ମନୋଜ ସରକାର ଯୋଡ଼ି ନିଜ ଦେଶ ଭାରତର ବିଟ୍ଟୁ କୁମାର ଓ ହେମନ୍ତ ଠାକୁର ଯୋଡ଼ିକୁ ୨୧-୬ ଓ ୨୧-୧୦ରେ ପରାସ୍ତ କରିଛନ୍ତି। କ୍ବାର୍ଟର ଫାଇନାଲ୍‌ରେ ଦୀପରଞ୍ଜନ-ମନୋଜଙ୍କ ମୁକାବିଲା ଇଣ୍ଡୋନେସିଆ ଯୋଡ଼ି ଦ୍ବି‌ୟୋକୋ-ଫ୍ରେଡି ସିତିଆୱାନ୍‌ଙ୍କ ସହ ହେବ।