ଲଣ୍ଡନ୍‌: କେନିଙ୍ଗଟନ୍‌ ଓଭାଲରେ ଗୁରୁବାରଠାରୁ ଆରମ୍ଭ ହୋଇଯିବ ଭାରତ-ଇଂଲଣ୍ଡ ପଞ୍ଚମ ତଥା ଅନ୍ତିମ ଟେଷ୍ଟ୍‌। ପ୍ରଥମ ସଂସ୍କରଣ ଆଣ୍ଡରସନ୍‌-ତେନ୍ଦୁଲକର ଟ୍ରଫିର ବିଜେତା ଭାଗ୍ୟ କ’ଣ ହେବ ପରବର୍ତ୍ତୀ ୫ ଦିନ ଭିତରେ ସ୍ପଷ୍ଟ ହୋଇଯିବ। ଶୃଙ୍ଖଳାରେ ଭାରତ ୧-୨ରେ ପଛୁଆ ଥିବାରୁ କେବଳ ଡ୍ର’ ରଖି ସମ୍ମାନ ଭାଗ ପକାଇପାରିବ। ନଚେତ୍‌ ଇଂଲଣ୍ଡ ବାଜି ମାରିନେବ। କାରଣ ମ୍ୟାଚ୍‌ ଡ୍ର’ ହେଲେ ବି ଇଂଲଣ୍ଡ ଜିତିଯିବ  ଆଣ୍ଡରସନ୍-ତେନ୍ଦୁଲକର ଟ୍ରଫି। ୫ ମ୍ୟାଚ୍‌ ଶୃଙ୍ଖଳା ଦୃଷ୍ଟିରୁ ଉଭୟ ଦଳର ଖେଳାଳି କ୍ଲାନ୍ତ ହୋଇପଡ଼ିଥିଲେ ବି ଶୃଙ୍ଖଳାର ଭାଗ୍ୟ ଫଏସଲା ହୋଇ ନଥିବାରୁ ପୁଣି ଏକ କଡ଼ା ମୁକାବିଲା ଦେଖିବାକୁ ମିଳିବ ବୋଲି ଆଶା କରିଛନ୍ତି ପ୍ରଶଂସକ। ଟେଷ୍ଟ୍‌ କ୍ରିକେଟ୍‌ର ଖାସ୍‌ ପ୍ରଶଂସକଙ୍କ ପାଇଁ ଏହି ଶୃଙ୍ଖଳା ବେଶ ମନୋରଂଜନଭରା ରହିଛି। କାରଣ ପୂର୍ବ ୪ଟି ଯାକ ଟେଷ୍ଟ୍‌ ପଞ୍ଚମ ଦିନର ଶେଷ ଅଧିବେଶନ ପର୍ଯ୍ୟନ୍ତ ଲମ୍ବିଛି ଏବଂ ଫଳାଫଳ ରୋମାଞ୍ଚଭରା ରହିଛି। ହେଡିଂଲେରେ ଇଂଲଣ୍ଡ ଜିତିବା ପରେ ଏଜ୍‌ବାଷ୍ଟନ୍‌ରେ ଭାରତ ବାଜି ମାରିଥିଲା। ଲର୍ଡସରେ ଭାରତ ହାରିଯିବା ପରେ ଓଲ୍ଡ ଟ୍ରା‌ଫୋର୍ଡରେ ନାଟକୀୟ ପ୍ରତ୍ୟାବର୍ତ୍ତନ ସହ ଭାରତ ଡ୍ର’ ଅର୍ଜନ କରିଛି। ଶୁବମନ ଗିଲ୍‌ଙ୍କ ଜବରଦସ୍ତ ଫର୍ମ, ବୁମ୍‌ରାଙ୍କ ଇନ୍ ଆଉଟ୍‌, ବେନ୍‌ ଷ୍ଟୋକ୍ସଙ୍କ ଅଲରାଉଣ୍ଡ୍ ପ୍ରଦର୍ଶନ, ଋଷଭ ପନ୍ତ୍‌ଙ୍କ ଉଭୟ ପାଳି ଶତକ ଓ ଆହତ, ମାଞ୍ଚେଷ୍ଟର୍‌ରେ ମହାନାଟକ ପରେ ଓଭାଲ୍ ଟେଷ୍ଟ୍ ପୂର୍ବରୁ ଗମ୍ଭୀର-କ୍ୟୁରେଟର୍ ମୁହାଁମୁହିଁ ହେବା ଆଉ ଏକ ଉତ୍କଣ୍ଠାପୂର୍ଣ୍ଣ ଲଢ଼େଇର ପ୍ରତିଶ୍ରୁତି ରଖୁଛି।

Advertisment

ଭାରତୀୟ ଦଳ ପାଇଁ ଯଶପ୍ରୀତ୍ ବୁମ୍‌ରାଙ୍କ ଖେଳିବା ନ ଖେଳିବା ଏବେ ମୁଖ୍ୟ ପ୍ରସଙ୍ଗ ରହିଛି। ତାଙ୍କ ଉପରେ ପଡ଼ୁଥିବା କାର୍ଯ୍ୟଭାର ପରିଚାଳନା ଦୃଷ୍ଟିରୁ ବୁମ୍‌ରା ତିନିଟି ଟେଷ୍ଟ୍ ଖେଳିବେ ବୋଲି ପୂର୍ବରୁ କୁହାଯାଇଥିଲା। ସେ ୩ଟି ଟେଷ୍ଟ୍ ମଧ୍ୟ ଖେଳି ସାରିଛନ୍ତି। କିନ୍ତୁ ଭାରତ ଏବେ ସୁରକ୍ଷିତ ସ୍ଥିତିରେ ନଥିବାରୁ ତାଙ୍କ ବିନା ପଡ଼ିଆକୁ ଓହ୍ଲାଇବା କେତେ ସମୀଚୀନ ହେବ ଚିନ୍ତାଜନକ ରହିଛି। ଅନ୍ୟପକ୍ଷରେ ବୁମ୍‌ରାଙ୍କ ଗତିରେ ହ୍ରାସ ଏବଂ ଲୟ ବିଗିଡ଼ିବା ଲକ୍ଷ୍ୟ କରାଯାଉଥିବାରୁ ତାଙ୍କୁ ଖେଳାଇବା ମଧ୍ୟ ବିପଦଜନକ ହୋଇପାରେ ବୋଲି ବିଚାର କରାଯାଉଛି। ଦଳୀୟ ସୂତ୍ରରୁ ମିଳିଥିବା ସୂଚନା ଅନୁସାରେ ବୁମ୍‌ରାଙ୍କ ବଦଳରେ ପୁନଃଫିଟ୍‌ ଘୋଷିତ ହୋଇଥିବା ଆକାଶ ଦୀପ ଖେଳିବେ। ସେହିଭଳି ଆହତ କାରଣରୁ ବାଦ୍‌ ପଡ଼ିସାରିଥିବା ଋଷଭ ପନ୍ତ୍‌ଙ୍କ ବଦଳରେ ଧ୍ରୁବ ଜୁରେଲ ଖେଳିବା ନିଶ୍ଚିତ ହୋଇଛି। ମାଞ୍ଚେଷ୍ଟର୍‌ରେ ସମ୍ମାନରକ୍ଷାକାରୀ ଶତକ ସହ ଦ୍ବିଶତକ ଭାଗୀଦାରି କରିଥିବା ରବୀନ୍ଦ୍ର ଜାଡ଼େଜା ଓ ୱାସିଂଟନ୍ ସୁନ୍ଦର ବି ଶୀର୍ଷ ୬ ଭିତରେ ରହିବା ନିଶ୍ଚିତ। ୮ ନମ୍ବର ପର୍ଯ୍ୟନ୍ତ ଭାରତର ବ୍ୟାଟିଂ ଦୃଢ଼ ରଖିବାକୁ ଦଳୀୟ ପରିଚାଳକ ଯୋଜନା କରୁଥିବାରୁ କୁଲଦୀପ ୟାଦବଙ୍କୁ ବି ଶେଷ ଟେଷ୍ଟ୍‌ରେ ବାହାରେ ବସିବାକୁ ପଡ଼ିପାରେ। ମହମ୍ମଦ ସିରାଜଙ୍କୁ ବୋଲିଂ ବାହିନୀର ନେତୃତ୍ବ ନେବାକୁ ପଡ଼ିବ। ଅଂଶୁଲ କମ୍ବୋଜଙ୍କ ବଦଳରେ ଅର୍ଶଦୀପଙ୍କ ପଦାର୍ପଣ ପ୍ରାୟ ନିଶ୍ଚିତ ରହିଛି। ଶାର୍ଦୁଳ ଠାକୁରଙ୍କ ଉପରେ ଗମ୍ଭୀର ସମ୍ପୂର୍ଣ୍ଣ ଭରସା କରିପାରୁ ନଥିଲେ ମଧ୍ୟ ପରିସ୍ଥିତି ତାଙ୍କୁ ବିକଳ୍ପ ଯୋଗାଉନାହିଁ। ‘‘ଭାରତୀୟ ଦଳ ସନ୍ତୁଳନ ରକ୍ଷା କରିବା ପାଇଁ ଚେଷ୍ଟା କରି ଆସିଛି। ମ୍ୟାଚ୍‌ ବିଜୟ ପାଇଁ ଏହା ଜରୁରି। ୨୦ ୱିକେଟ୍‌ ଦଖଲ ଯେଭଳି ନିହାତି ଆବଶ୍ୟକ, ୫୫୦/୬୦୦ ରନ୍ ସ୍କୋର୍‌ କରିବା ମଧ୍ୟ ଅନୁରୂପ ଭାବେ ଅପରିହାର୍ଯ୍ୟ’’ ବୋଲି ପ୍ରକାଶ କରିଛନ୍ତି ଭାରତୀୟ ଦଳ ବ୍ୟାଟିଂ ପ୍ରଶିକ୍ଷକ ସୀତାଂଶୁ କୋଟାକ। ୬ ବୋଲର ନେଇ ଖେଳି‌ ହେବ ନାହିଁ। ଆମେ ଜଣେ ଅତିରିକ୍ତ ବ୍ୟାଟର୍ କି ଅତିରିକ୍ତ ବୋଲର ନେଇ ଖେଳିବା ଯୋଜନାରେ ରହିଛୁ। ଜଣେ ଅଲରାଉଣ୍ଡର୍ ଏହି ଭୂମିକା ତୁଲାଇପାରିବେ ବୋଲି ଗମ୍ଭୀରଙ୍କ ବିଚାରଧାରାକୁ ସମର୍ଥନ କରି କହିଛନ୍ତି କୋଟାକ।

ଘରୋଇ ଇଂଲଣ୍ଡ, ଶୃଙ୍ଖଳାରେ ଆଗୁଆ ଥିଲେ ମଧ୍ୟ ଏହାର ଚୂଡ଼ାନ୍ତ ଏକାଦଶରେ ୪ଟି ପରିବର୍ତ୍ତନ କରିଛି। ଦଳକୁ ସବୁଠାରୁ ବଡ଼ ଝଟ୍‌କା ଲାଗିଛି ଅଧିନାୟକ ବେନ୍‌ ‌ଷ୍ଟୋକ୍ସଙ୍କୁ ନେଇ। ବାଇସେପ୍‌ ସମସ୍ୟା କାରଣରୁ ଷ୍ଟୋକ୍ସ ଏହି ଟେଷ୍ଟ୍ ଖେଳିବେ ନାହିଁ ବୋଲି ସ୍ପଷ୍ଟ କରିଦିଆଯାଇଛି। ବୁଧବାର ଇସିବି ଘୋଷଣା କରିଥିବା ଚୂଡ଼ାନ୍ତ ଏକାଦଶରେ ମଧ୍ୟ ୪ଟି ପରିବର୍ତ୍ତନ କରିବାକୁ ପଡ଼ିଛି। ଷ୍ଟୋକ୍ସଙ୍କ ବଦଳରେ ଓଲି‌ ପୋପ୍ ଅଧିନାୟକ ଦାୟିତ୍ବ ତୁଲାଇବେ। ସେହିଭଳି ଦୁଇ ଦ୍ରୁତ ବୋଲର ଜୋଫ୍ରା ଆର୍ଚର, ବ୍ରାଏଡନ୍ କାର୍ସଙ୍କ କାର୍ଯ୍ୟଭାର ପରିଚାଳନା ପାଇଁ ବିଶ୍ରାମ ଦିଆଯାଇଛି ଏବଂ ଗତ ଟେଷ୍ଟ୍‌ରେ ପ୍ରତ୍ୟାବର୍ତ୍ତନ କରିଥିବା ସ୍ପିନର୍‌ ଲିଆମ୍ ଡ’ସନ୍‌ଙ୍କୁ ବାଦ ଦିଆଯାଇଛି। ଉପରୋକ୍ତ ୪ ଜଣଙ୍କ ସ୍ଥାନରେ ଜ୍ୟାକବ୍ ବେଥେଲ, ଗସ୍ ଆଟ‌୍‌କିନ୍‌ସନ୍‌, ଜାମି ଓଭରଟନ୍‌ ଓ ଜୋସ୍ ଟଙ୍ଗ୍‌ଙ୍କୁ ସାମିଲ କରାଯାଇଛି। ଅନିଭଜ୍ଞ ବୋଲିଂ ବାହିନୀର ନେତୃତ୍ବ ନେବେ କ୍ରିସ୍ ୱକ୍ସ। ବିଗତ ଦୁଇ ଟେଷ୍ଟ୍‌ରେ ଶ୍ରେଷ୍ଠ ଖେଳାଳି ପୁରସ୍କାର ପାଇଥିବା ଷ୍ଟୋକ୍ସଙ୍କ ଅନୁପସ୍ଥିତି କିନ୍ତୁ ଇଂଲଣ୍ଡ ପାଇଁ ବଡ଼ ଝଟ୍‌କା ଭଳି ‌ହୋଇଛି। ସେ ମଧ୍ୟ ୧୭ ୱିକେଟ୍ ସହ ଉଭୟ ଦଳ ମଧ୍ୟରେ ଶୃଙ୍ଖଳାର ଅଗ୍ରଣୀ ବୋଲର ଥିଲେ।

ଭାରତ ଏକାଦଶ (ସମ୍ଭାବ୍ୟ): ଯଶସ୍ବୀ ଜୟସ୍ବାଲ, କେଏଲ୍ ରାହୁଲ, ସାଇ ସୁଦର୍ଶନ, ଶୁବମନ ଗିଲ୍ (ଅଧିନାୟକ), ଧ୍ରୁବ ଜୁରେଲ (ୱିକେଟ୍‌ରକ୍ଷକ), ରବୀନ୍ଦ୍ର ଜାଡ଼େଜା, ୱାସିଂଟନ୍ ସୁନ୍ଦର, ମହମ୍ମଦ ସିରାଜ, ଆକାଶ ଦୀପ, ଶାର୍ଦୁଳ ଠାକୁର, ଅର୍ଶଦୀପ ସିଂହ।
ଇଂଲଣ୍ଡ ଚୂଡାନ୍ତ ଏକାଦଶ: ଜ୍ୟାକ୍ କ୍ରଲି, ବେନ୍‌ ଡକେଟ୍, ଓଲି ପୋପ୍‌ (ଅଧିନାୟକ),‌ ଜୋ ରୁଟ୍‌, ହ୍ୟାରି ବ୍ରୁକ୍‌, ଜ୍ୟାକବ୍ ‌ବେଥେଲ୍‌, ଜାମି ସ୍ମିଥ୍ (ୱିକେଟ୍‌ରକ୍ଷକ), କ୍ରିସ୍ ୱକ୍ସ, ଗସ୍ ଆଟ୍‌କିନ୍‌ସନ୍‌, ଜାମି ଓଭରଟନ୍‌, ଜୋସ୍ ଟଙ୍ଗ୍‌।

ଭାରତ ୨, ଇଂଲଣ୍ଡ ୬
ବିଗତ ୯ ଦଶନ୍ଧି ଭିତ‌ରେ ଭାରତ ଦ ଓଭାଲରେ ମୋଟ ୧୫ ଟେଷ୍ଟ୍ ଖେଳିଛି। ୧୯୭୧ ଓ ୨୦୨୧ରେ ଦୁଇ ଥର ଭାରତ ଜିତିଥିବା ବେଳେ ୬ ଥର ହାରିଛି। ଶେଷ ଥର ପାଇଁ ଏଠାରେ ୨୦୨୩ ବିଶ୍ବ ଟେଷ୍ଟ୍ ଚାମ୍ପିୟନସିପ୍‌ ଫାଇନାଲ୍‌ରେ ଅଷ୍ଟ୍ରେଲିଆଠାରୁ ହାରିଥିଲା ଭାରତ। ସମ୍ପୂର୍ଣ୍ଣ ଟେଷ୍ଟ୍ କ୍ରିକେଟ୍‌ ଇତିହାସ ଦେଖିଲେ ଦୁଇ ଦେଶ ୧୪୦ ଟେଷ୍ଟ୍‌ ଖେଳିଛନ୍ତି। ଭାରତ ୩୬-୫୩ରେ ପଛରେ ରହିଥିବା ବେଳେ ୫୧ଟି ଟେଷ୍ଟ୍ ଡ୍ର’ ରହିଛି। ଘରୋଇ ମାଟିରେ ଭାରତ ୨୬ ଜିତିଥିବା ବେଳେ ଇଂଲଣ୍ଡ ୩୮ ଜିତିଛି। ବିଦେଶରେ ଖେଳିବା ବେଳେ ଭାରତ ୧୦ ଓ ଇଂଲଣ୍ଡ ୧୫ ଜିତିଛି। 

ଅପେକ୍ଷାରେ ଏକାଧିକ ରେକର୍ଡ
ଗୁରୁବାରଠାରୁ ଆରମ୍ଭ ହେଉଥିବା ଟେଷ୍ଟ୍‌ରେ ଶୁବମନ ଗିଲ୍‌ ଆଉ ୮୯ ରନ୍ କରିପାରିଲେ ସାର୍ ଡନ୍ ବ୍ରାଡମ୍ୟାନ୍‌ଙ୍କ ନାମରେ ଥିବା ଏକ ରେକର୍ଡକୁ ଅତିକ୍ରମ କରିଯିବେ। ଅଧିନାୟକତ୍ବ ପଦାର୍ପଣରେ ବ୍ରାଡ୍‌ମ୍ୟାନ୍‌ ୮୧୦ ରନ୍ (୧୦୩୬-୩୭ ଆସେସ୍‌ ଶୃଙ୍ଖଳା) କରିଥିଲେ। ଗିଲ୍ ଏପର୍ଯ୍ୟନ୍ତ ୭୨୨ ରନ୍ ସଂଗ୍ରହ କରିସାରିଛନ୍ତି। ଓଭାଲରେ ଜୋ ରୁଟ୍‌ କେବଳ ୨ ଶତକ ମାରିଛନ୍ତି। କିନ୍ତୁ ଉଭୟ ଶତକ ଭାରତ ବିପକ୍ଷରେ (୨୦୧୪ରେ ୧୪୮* ଏବଂ ୨୦୧୮ରେ ୧୨୫) ହାସଲ କରିଛନ୍ତି।
ଚଳିତ ଶୃଙ୍ଖଳାରେ ଏ ପର୍ଯ୍ୟନ୍ତ ୧୮ ଶତକ ଦେଖିବାକୁ ମିଳିଛି। ଆଉ ୪ଟି ଶତକ ୭୦ ବର୍ଷର ରେକର୍ଡକୁ ପଛରେ ପକାଇପାରିବ। ୧୯୫୫ ଅଷ୍ଟ୍ରେଲିଆ-ୱେଷ୍ଟଇଣ୍ଡିଜ୍ ୫ ମ୍ୟାଚ୍ ଶୃଙ୍ଖଳାରେ ୨୧ ଶତକ ସଂଗୃହୀତ ହୋଇଥିଲା। ୧୯୫୫ରେ ୱେଷ୍ଟଇଣ୍ଡିଜ୍‌ର କ୍ଲାଇଭ୍ ୱାଲକଟ୍‌ ୫ ଶତକ ମାରିଥିବାରୁ ଶୁବମନ ଗିଲ୍ (୪*) ତାଙ୍କୁ ଅତିକ୍ରମ କରିବା ସୁଯୋଗ ବି ରହିବ। ସେହିଭଳି ଜଣେ ଭାରତୀୟ ଓପନର୍ ଭାବେ ଇଂଲିସ୍ ମାଟିରେ ସର୍ବାଧିକ ରନ୍ ସଂଗ୍ରହ କରିବାରେ ସୁନିଲ ଗାଭାସ୍କରଙ୍କୁ ଅତିକ୍ରମ କରିବାକୁ ସୁଯୋଗ ପାଇବେ କେଏଲ୍ ରାହୁଲ। ଗାଭାସ୍କର ୧୯୭୯ରେ ୫୪୨ ରନ୍ କରିଥିଲେ। ରାହୁଲ (୫୧୧)ଙ୍କୁ ଆଉ ୩୨ ରନ୍ ଆବଶ୍ୟକ ହେଉଛି।

ମହମ୍ମଦ ସିରାଜଙ୍କ ପାଇଁ ମଧ୍ୟ ଏକ ମାଇଲ୍‌ଖୁଣ୍ଟ ଅପେକ୍ଷା କରିଛି। ସେ ଏଠାରେ ଗୋଟିଏ ମାତ୍ର ୱିକେଟ୍‌ ନେଲେ ଅନ୍ତର୍ଜାତୀୟ କ୍ରିକେଟ୍‌ରେ ୨୦୦ ୱିକେଟ୍‌ ପୂର୍ଣ୍ଣ କରିବେ। ମାଞ୍ଚେଷ୍ଟର୍‌ରେ ବିଫଳ (୩୦ ଓଭରରେ ୧/୧୪୦) ହୋଇଥିଲେ ମଧ୍ୟ ବର୍ମିଂହାମ୍‌ରେ ବୁମ୍‌ରାଙ୍କ ଅନୁପସ୍ଥିତିରେ ୫ ୱିକେଟ୍‌ ନେଇ ଭାରତକୁ ବିଜୟୀ କରାଇଥିଲେ। ସିରାଜ ଏ ପର୍ଯ୍ୟନ୍ତ ୧୦୦ ଅନ୍ତର୍ଜାତୀୟ ମ୍ୟାଚ୍‌ରୁ ୧୯୯ ୱିକେଟ୍ ଅକ୍ତିଆର କରିଛନ୍ତି। ଟେଷ୍ଟ୍ କ୍ରିକେଟ୍ ତାଙ୍କୁ ଅଧିକ ସଫଳତା ଦେଇଛି। ୪୦ ମ୍ୟାଚ୍‌ରୁ ସେ ୧୧୪ ୱିକେଟ୍ ଅକ୍ତିଆର କରିଛନ୍ତି। ଏହା ମଧ୍ୟରେ ସେ ୫ ଥର ୫ ୱିକେଟ୍ ସଫଳତା ପାଇଥିବା ବେଳେ ୪ଟି ଏସିଆ ବାହାରେ ରହିଛି। ଇଂଲଣ୍ଡରେ ବି ୧୦ ମ୍ୟାଚ୍‌ରୁ ୩୭ ୱିକେଟ୍ ନେଇଛନ୍ତି। ୨୦୨୩ ବିଶ୍ବ ଟେ‌ଷ୍ଟ୍ ଫାଇନାଲ୍‌ରେ ଅଷ୍ଟ୍ରେଲିଆ ବିପକ୍ଷରେ ମଧ୍ୟ ସେ ୫ ୱିକେଟ୍‌ ପାଇଥିଲେ।