ଭୁବନେଶ୍ବର: ପ୍ରଥମ ଥର ଲାଗି ଆୟୋଜିତ ଜାତୀୟ ବାଳିକା (ଉପକନିଷ୍ଠ ଓ କନିଷ୍ଠ) ଏକାଡେମି ହକି ପ୍ରତିଯୋଗିତା ଗୁରୁବାର କଳିଙ୍ଗ ଷ୍ଟାଡିୟମରେ ଉଦ୍ଘାଟିତ ହୋଇଯାଇଛି। ଉପକନିଷ୍ଠ ବର୍ଗରେ ଓଡ଼ିଶା ନାଭାଲ ଟାଟା ହକି ଉଚ୍ଚ ଗୁଣବତ୍ତା କେନ୍ଦ୍ର ବିଜୟରୁ ଅଭିଯାନ ଆରମ୍ଭ କରିଛି। ଏହି ଦଳ ୫-୦ ଗୋଲ୍ରେ ମଧ୍ୟପ୍ରଦେଶ ହକି ଏକାଡେମିକୁ ପରାସ୍ତ କରିଛି। ଅଧିନାୟକ ମୁନମୁନି ଦାସ (୧୫, ୫୮ ମିନିଟ୍) ଓ ଏଲାନି ଟୁଟି (୪, ୨୦ ମିନିଟ୍) ଦୁଇଟି ଲେଖାଏଁ ଏବଂ ବେବିରାଣୀ ସନ୍ଦାମ (୫୨ ମିନିଟ୍) ଗୋଟିଏ ଗୋଲ୍ କରିଥିଲେ। ଏହି ବର୍ଗରେ ଖେଳାଯାଇଥିବା ଅନ୍ୟ ମ୍ୟାଚ୍ଗୁଡ଼ିକରେ ରାଉଣ୍ଡଗ୍ଲାସ ପଞ୍ଜାବ ହକି କ୍ଲବ୍ ଏକାଡେମି ୨୦-୦ ଗୋଲ୍ରେ ଧ୍ୟାନ ଚାନ୍ଦ ହକି ଏକାଡେମିକୁ, ମାର୍କଣ୍ଡେଶ୍ବର ହକି ଏକାଡେମି ୧୩-୦ ଗୋଲ୍ରେ ମୁମ୍ବାଇ ସ୍କୁଲ୍ ସ୍ପୋର୍ଟ୍ସ ଆସୋସିଏସନ୍କୁ ହରାଇଥିଲା। ତେବେ ଜୟ ଭାରତ ହକି ଏକାଡେମି ଓ ଅଲିମ୍ପିଆନ୍ ବିବେକ ସିଂହ ହକି ଏକାଡେମି ମ୍ୟାଚ୍ ୩-୩ ଗୋଲ୍ରେ ଅମୀମାଂସିତ ରହିଥିଲା।
Sambad is now on WhatsApp
Join and get latest news updates delivered to you via WhatsApp
କନିଷ୍ଠ ବର୍ଗରେ ମଧ୍ୟପ୍ରଦେଶ ହକି ଏକାଡେମି ୧୭-୦ ଗୋଲ୍ରେ ତାମିଲନାଡ଼ୁ ହକି ଏକାଡେମିକୁ ପରାସ୍ତ କରିଥିଲା। ତେବେ ପିକେଏମ୍ ହକି ଏକାଡେମି ନ ଆସିବାରୁ ହାର ହକି ଏକାଡେମିକୁ ୱାକ୍ ଓଭର ମିଳିଥିଲା। ଏଥିସହ ହାର ଦଳ ୫-୦ ଗୋଲ୍ରେ ବିଜୟୀ ଘୋଷିତ ହୋଇଥିଲା। ଉଦ୍ଘାଟନୀ ଉତ୍ସବରେ ଅତିଥିଭାବେ ହକି ଇଣ୍ଡିଆ ସଭାପତି ଜ୍ଞାନେନ୍ଦ୍ରୋ ନିଙ୍ଗୋମ୍ବାବ ଏବଂ ପୂର୍ବତନ ଅଧିନାୟକ ପଦ୍ମଶ୍ରୀ ଦିଲୀପ ତିର୍କି ଅତିଥି ଭାବେ ଯୋଗ ଦେଇଥିଲେ।