ଟି-୨୦ ବିଶ୍ବକପ୍ ନିଷ୍ପତ୍ତି ଜୁନ୍କୁ ଘୁଞ୍ଚିଲା
ନୂଆଦିଲ୍ଲୀ: ଅଷ୍ଟ୍ରେଲିଆରେ ଅକ୍ଟୋବର-ନଭେମ୍ବରରେ ଖେଳାଯିବାକୁ ଥିବା ଆଇସିସି ଟି-୨୦ ବିଶ୍ବକପ୍ ହେବ କି ନା ଗୁରୁବାର ଅନ୍ତର୍ଜାତୀୟ କ୍ରିକେଟ୍ ପରିଷଦ ନିଷ୍ପତ୍ତି ନେବାର ଥିଲା। କିନ୍ତୁ କୋଭିଡ୍-୧୯ ମହାମାରୀ କାରଣରୁ ଚୂଡାନ୍ତ ନିଷ୍ପତ୍ତିରେ ପରିଷଦ ପହଞ୍ଚିପାରିନାହିଁ। ଏବେ ଜୁନ୍ ୧୦ ତାରିଖରେ ପରବର୍ତୀ ବୈଠକ ବସିବ ଏବଂ ସେଦିନ ଚୂଡାନ୍ତ ନିଷ୍ପତ୍ତି ନିଆଯିବ ବୋଲି କୁହାଯାଇଛି। ଚଳିତ ବର୍ଷର ଆଇସିସି ଟି-୨୦ ବିଶ୍ବକପ୍ ଅଷ୍ଟ୍ରେଲିଆର ବିଭିନ୍ନ ସହରରେ ଅକ୍ଟୋବର ୧୮ ତାରିଖରୁ ନଭେମ୍ବର ୧୫ ତାରିଖ ପର୍ଯ୍ୟନ୍ତ ଖେଳାଯିବାର କାର୍ଯ୍ୟକ୍ରମ ରହିଛି। ଗୁରୁବାରର ଟେଲିକନଫରେନସିଂ ବୈଠକରୁ କୌଣସି ସୁଫଳ ନମିଳିବା ଫଳରେ ବିସିସିଆଇ ମଧ୍ୟ ଅଡୁଆରେ ପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ଆଇସିସି ଯଦି ଟି-୨୦ ବିଶ୍ବକପ୍କୁ ଘୁଞ୍ଚାଇଦିଏ ତେବେ ସେହି ସମୟରେ ବିସିସିଆଇ ଏହାର ଆଇପିଏଲ୍-୧୩କୁ କାଣ୍ଟଛାଣ୍ଟରେ କରାଇନେବା ସୁଯୋଗ ଅପେକ୍ଷାରେ ରହିଛି। କିନ୍ତୁ ଆଇପିଏଲ୍ ହେବ କି ନ ହେବ ଭାରତ ସରକାରଙ୍କ ନିଷ୍ପତ୍ତି ଉପରେ ନିର୍ଭର କରିବ ବୋଲି ଦୁଇ ଦିନ ତଳୁ କେନ୍ଦ୍ର କ୍ରୀଡ଼ାମନ୍ତ୍ରୀ କିରଣ ରିଜିଜୁ ପ୍ରକାଶ କରିଥିଲେ। ଅନ୍ୟପକ୍ଷରେ ଟି-୨୦ ବିଶ୍ବକପ୍ ୨୦୨୨କୁ ଘୁଞ୍ଚିବ ବୋଲି ଖବର ପ୍ରସାରିତ ହେବା ପରେ ଏହାକୁ ଆଇସିସି ବୁଧବାର ଖଣ୍ଡନ କରିଥିଲା।