ବିଜୟଅଜିତ ଚାମ୍ପିଅନ୍‌ସ ଟ୍ରଫି କ୍ରିକେଟ୍‌ ୧୨ରୁ

ଭୁବନେଶ୍ବର: ଦିବଂଗତ ଓଡ଼ିଆ ସିନେ ତାରକା ବିଜୟ ମହାନ୍ତି ଓ ଅଜିତ ଦାସଙ୍କ ସ୍ମୃତି ଉଦ୍ଦେଶ୍ୟରେ ଭୁବନେଶ୍ବର ବ୍ଲା‌ଷ୍ଟର୍ସ ଆନୁକୂଲ୍ୟରେ ‘‘ବିଜୟଅଜିତ ଚାମ୍ପିଅନ୍ସ ଟ୍ରଫି’’ ନାମରେ ଏକ କ୍ରିକେଟ୍‌ ପ୍ରତିଯୋଗିତା ଆୟୋଜିତ ହେବ। ସହିଦ ସ୍ପୋର୍ଟିଂ ପଡ଼ିଆରେ ଚଳିତ ମାସ ୧୨ରୁ ୧୪ ତାରିଖ ପର୍ଯ୍ୟନ୍ତ ଆୟୋଜିତ ହେବାକୁ ଥିବା ଏହି ପ୍ରତିଯୋଗିତାରେ ଓଡ଼ିଆ ସିନେତାରକା, ଡାକ୍ତର, ପ୍ରଫେସର, ସଚିବାଳୟ କର୍ମଚାରୀ, ସାମ୍ବାଦିକ, କର୍ପୋରେଟ୍‌ ସଂସ୍ଥାର ଅଧିକାରୀ, ରାଜନେତା, ପ୍ରଶାସନକୁ ନେଇ ଗଠିତ ୧୦ ଦଳ ଭାଗନେବେ। ବୁଧବାର ଏହି ପ୍ରତିଯୋଗିତାର ଟ୍ରଫି ଉନ୍ମୋଚିତ ହୋଇଛି। ଏଥିରେ ଅତିଥି ଭାବେ ଶଶି କୁମାର ସାହୁ, ନୃସିଂହ ନନ୍ଦ ଉପସ୍ଥିତ ରହି ଟ୍ରଫି ଉନ୍ମୋଚନ କରିଥିଲେ। ଆୟୋଜକ କ୍ଲବ୍‌ର ପ୍ରଶିକ୍ଷକ ସି‌ନେତାରକା ବବି ମିଶ୍ର, ଅଧିନାୟକ ରମେଶ ବାରିକ, ଉପଅଧିନାୟକ ଜୟ ସାମନ୍ତଙ୍କ ସମେତ ଭାଗନେଉଥିବା ଦଳର ଅଧିନାୟକ, ଉପଅଧିନାୟକ, ପ୍ରଶିକ୍ଷକ ଓ ଖେଳାଳିମାନେ ଉପସ୍ଥିତ ଥିଲେ।

ବିଜେତା ଓ ଉପବିଜେତା ଦଳକୁ ଯଥାକ୍ରମେ ୫୦,୦୦୦ ଓ ୩୦,୦୦୦ ଟଙ୍କାର ପୁରସ୍କାର ରାଶି ସହ ଆକର୍ଷଣୀୟ ଟ୍ରଫି ଏବଂ ତୃତୀୟ ସ୍ଥାନ ଅଧିକାର କରିଥିବା ଦଳକୁ ଟ୍ରଫି ପ୍ରଦାନ କରାଯିବ ବୋଲି ବୁଧବାର ଆୟୋଜିତ ଟ୍ରଫି ଉନ୍ମୋଚନ ଓ ସାମ୍ବାଦିକ ସମ୍ମିଳନୀରେ ଆୟୋଜକ କ୍ଲବ୍‌ ତରଫରୁ ସୂଚନା ଦିଆଯାଇଥିଲା। ଦିବା-ରାତ୍ର ଭିତ୍ତିରେ ଖେଳାଯିବାକୁ ଥିବା ଏହି ପ୍ରତିଯୋଗିତାର ମ୍ୟାଚ୍‌ଗୁଡ଼ିକ ୧୦ ଓଭର ବିଶିଷ୍ଟ ଏବଂ ଟେନିସ ବଲ୍‌ରେ ଖେଳାଯିବ। ଭା‌ଗନେଉଥିବା ଦଳ ଗୁଡ଼ିକ ହେଲେ ଏଲ୍‌ ଆଣ୍ଡ ଡି ଗ୍ଲୋବାଲ ଭୁବନେଶ୍ବର ଚାପ୍ଟର, କର୍ପୋରେଟ କ୍ରିକେଟ୍‌ କ୍ଲବ୍‌, ପ୍ରଫେସର ଅଫ୍‌ ଉତ୍କଳ, ରଜନୀ ମୁଭିଜ୍‌ ୱାରିୟର, ବାରବାଟୀ ସିଙ୍ଘମ, କେଜିଆଇ, ସମ୍‌ ହସ୍‌ପିଟାଲ ଡକ୍ଟର କ୍ଲବ୍‌, ଖଣ୍ଡଗିରି ୱାରିୟର୍ସ, ଭୁବନେଶ୍ବର ବ୍ଲାଷ୍ଟର୍ସ ଏବଂ ଭୁବନେଶ୍ବର ମିଡିଆ ସ୍ପୋର୍ଟ୍ସ କ୍ଲବ୍।