ମହିଳା ଟ୍ବେଣ୍ଟି-୨୦ର ଦଳ ସଂଖ୍ୟା ଚଳିତବର୍ଷ ବଢ଼ିବନି
ମୁମ୍ବାଇ : ଆଇପିଏଲ୍ ପ୍ଲେ ଅଫ୍ ସହ ସାମାନ୍ତରାଳ ଭାବେ ଆୟୋଜିତ ହୋଇ ଆସୁଥିବା ମହିଳା ଟ୍ବେଣ୍ଟି-୨୦ର ଦଳ ସଂଖ୍ୟା ଚଳିତବର୍ଷ ବଢ଼ିବନି। ଏହା ପୂର୍ବଭଳି ତିନିଟି ଦଳରେ ଅପରିବର୍ତ୍ତିତ ରହିବ। ଗତବର୍ଷ ଏହି ଚର୍ଚ୍ଚିତ ଲିଗ୍ର ଦଳସଂଖ୍ୟା ୪ କରିବାକୁ ବିସିସିଆଇ ଚିନ୍ତା କରୁଥିଲା। ହେଲେ ଜୈବ ବଳୟର ଆହ୍ବାନ ଏବଂ କୋଭିଡ୍ ସଂକ୍ରମଣର ଭୟାବହତାକୁ ଆଖି ଆଗରେ ରଖି ଏହାକୁ କାର୍ଯ୍ୟକାରୀ କରି ନଥିଲା। ଚଳିତବର୍ଷ ମଧ୍ୟ ସେହି ତିନିଟି ଦଳକୁ ନେଇ ମହିଳା ଟ୍ବେଣ୍ଟି-୨୦ ଚ୍ୟାଲେଞ୍ଜ୍ ଆୟୋଜିତ ହେବ ବୋଲି ବିସିସିଆଇର ଜଣେ ବରିଷ୍ଠ ଅଧିକାରୀ ସ୍ପଷ୍ଟ କରି ଦେଇଛନ୍ତି। ଆସନ୍ତା କିଛି ଦିନ ଭିତରେ ଏଥିନେଇ ଆନୁଷ୍ଠାନିକ ଘୋଷଣା କରାଯିବ ବୋଲି ସେ କିନ୍ତୁ ସୂଚନା ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଗତବର୍ଷ ଦୁବାଇ ଓ ଆଦୁଧାବିରେ ଖେଳାଯାଇଥିବା ମହିଳା ଟ୍ବେଣ୍ଟି-୨୦ ଚ୍ୟାଲେଞ୍ଜ୍ର ଚାରିଟି ମ୍ୟାଚ୍ ଖେଳାଯାଇଥିଲା। ଏଥିରେ ସୁପରନୋଭାସ୍କୁ ପରାସ୍ତ କରି ଟ୍ରେଲବ୍ଲେଜର୍ସ ବିଜେତା ଆଖ୍ୟା ଅର୍ଜନ କରିଥିଲା। ଭାରତୀୟ ମହିଳା ଦଳ ଗତବର୍ଷ ଖୁବକମ୍ ଅନ୍ତର୍ଜାତୀୟ ମ୍ୟାଚ୍ ଖେଳିବାର ସୁଯୋଗ ପାଇଥିଲା। ଚଳିତବର୍ଷ ଦଳ ଗତ ୭ ବର୍ଷ ମଧ୍ୟରେ ପ୍ରଥମ ଥର ପାଇଁ ଟେଷ୍ଟ୍ କ୍ରିକେଟ୍ ଖେଳିବାର ସୂଚୀ ରହିଛି। ନ୍ୟୁଜିଲାଣ୍ଡରେ ହେବାକୁ ଥିବା ଦିନିକିଆ ବିଶ୍ବକପ୍ ପୂର୍ବରୁ ଦଳ ମଧ୍ୟ ଇଂଲଣ୍ଡ ଓ ଅଷ୍ଟ୍ରେଲିଆ ଗସ୍ତରେ ଯିବ। ସବୁକିଛି ଅବଶ୍ୟ କୋଭିଡ୍-୧୯ ସ୍ଥିତି ଉପରେ ନିର୍ଭର କରିବ।