ଆଜି କୋଣାର୍କ ସୂର୍ଯ୍ୟାସ୍‌ ଓଡ଼ିଶା-ତୋୟମ ହାଇଦ୍ରାବାଦ

ଜମ୍ମୁ: ଚଳିତ ଲିଜେଣ୍ଡ୍‌ସ ଲିଗ୍ କ୍ରିକେଟ୍‌ରେ କୋଣାର୍କ ସୂର୍ଯ୍ୟାସ ଓଡ଼ିଶା ଦଳ ରବିବାର ଖେଳିବ ତୋୟମ ହାଇଦ୍ରାବାଦ ସହିତ। ଶୁକ୍ରବାର ଇଆନ୍ ବେଲଙ୍କ ଇଣ୍ଡିଆ କ୍ୟାପିଟାଲ୍ସ ବିପକ୍ଷରେ ୫ ରନ୍‌ରେ ରୋମାଞ୍ଚକ ବିଜୟ ପରେ ଆତ୍ମବିଶ୍ବାସରେ ରହିଛି ଇର୍ଫାନ୍ ପଠାନଙ୍କ ଦଳ। ମୌଲାନା ଆଜାଦ ଷ୍ଟାଡିୟମ୍‌ରେ ରବିବାର ସଂଧ୍ୟା ୭ଟାରେ ଖେଳାଯିବାକୁ ଥିବା ଏହି ଗୁରୁତ୍ବପୂର୍ଣ୍ଣ ମ୍ୟାଚ୍‌ ଜିତି ଓଡ଼ିଶା ଦଳ ପ୍ଲେ ଅଫ୍‌ ସମ୍ଭାବନାକୁ ସିଲ୍ କରିଦେବାକୁ ଚାହିଁବ। ଭୁବନେଶ୍ବର ଭିତ୍ତିକ ଦଳ ୫ ମ୍ୟାଚ୍‌ରୁ ମାତ୍ର ଗୋଟିଏ ପରାଜୟ ସହ ୬ ପଏଣ୍ଟ୍‌ ପାଇ ପଏଣ୍ଟ୍ ଟେବୁଲ୍‌ର ଦ୍ବିତୀୟ ସ୍ଥାନରେ ରହିଛି। ଅନ୍ୟପକ୍ଷରେ ସୁରେଶ ରାଇନାଙ୍କ ତୋୟମ ହାଇଦ୍ରାବାଦ ଦଳ ୪ ମ୍ୟାଚ୍‌ରୁ ଗୋଟିଏ ବି ବିଜୟ ପାଇନଥିବାରୁ ଭାଗ୍ୟ ପରିବର୍ତନ ଆଶାରେ ରହିବ। ବର୍ଷାବାଧା ପରେ ଓଡ଼ିଶା ଦଳ ଲୟରେ ରହିଥିବାରୁ ବାଟ ଓଗାଳିବା ସମ୍ଭାବନା ଅଧିକ ରହିଛି।

କୋଣାର୍କ ସୂର୍ଯ୍ୟାସ ଓଡ଼ିଶା ଦଳ: ଇର୍ଫାନ୍ ପଠାନ୍‌ (ଅଧିନାୟକ), ୟୁସୁଫ୍ ପଠାନ୍‌, ସାହାବାଜ ନଦୀମ, ବିନୟ କୁମାର, ଫିଡେଲ୍ ଏଡୱାର୍ଡସ,‌ କେଭିନ୍ ଓ’ବ୍ରାଏନ୍, ପ୍ରବୀଣ ତାମ୍ବେ, ବେନ୍ ଲାଫଲିନ୍‌ୟ, ଅମ୍ବାତି ରାୟୁଡୁ, ନାଭିନ୍‌ ଷ୍ଟୁଆର୍ଟ, ରସ୍ ଟେଲର୍‌, ରିଚାର୍ଡ ଲେଭି, ଦିଲସାନ ମୁନାବୀରା, କେପି ଆପନ୍ନା, ଦିବେଶ ପଠାନିଆ, ରାଜେଶ ବିଷ୍ଣୋଇ, ନଟରାଜ ବେହେରା।

ତୋୟମ ହାଇଦ୍ରାବାଦ ଦଳ: ସୁରେଶ ରାଇନା (ଅଧିନାୟକ), ପିଟର୍ ଟ୍ରେଗୋ, ଇସୁରୁ ଉଡ଼ାନା, ଷ୍ଟୁଆର୍ଟ ବିନ୍ନି, ଗୁରକିରଟ୍ ସିଂହ ମାନ୍, ସୁଦୀପ ତ୍ୟାଗୀ, ମଣ୍ଟି ପାନେସର୍‌, ଶିବକାନ୍ତ ଶୁକ୍ଲା, ସଦାବ ଜକାତି, ରିକାର୍ଡୋ ପାୱେଲ, ଅବିଦ ନବି, ଚାଡୱିଚ୍ ୱାଲଟନ୍‌, ରିକ୍ କ୍ଲାର୍କ, ଯଶକରଣ ମାଲହୋତ୍ରା, ଜର୍ଜ ୱାକର୍‌, ଯୋଗେଶ ନାଗର, ସମ୍ମିଉଲ୍ଲା ସିନୱାରୀ, ନୁୱାପ ପ୍ରଦୀପ, ବିପୁଲ ଶର୍ମା।

ମଣିପାଲ୍‌ର ପ୍ରଥମ ବିଜୟ
ଗତ ଥରର ବିଜେତା ମଣିପାଲ୍ ଟାଇଗର୍ସ ଶନିବାର ପ୍ରତିଯୋଗିତାରେ ପ୍ରଥମ ବିଜୟ ହାସଲ କରିଛି। ଜମ୍ମୁର ମୌଲନା ଆଜାଦ ଷ୍ଟାଡିୟମ୍‌ରେ ‌ଅପରାହ୍ନରେ ଖେଳାଯାଇଥିବା ଏହି ମ୍ୟାଚ୍‌ରେ ହରଭଜନ ସିଂହଙ୍କ ଦଳ ୫ ୱିକେଟ୍‌ରେ ଶିଖର ଧାୱନଙ୍କ ଗୁଜରାଟ ଗ୍ରେଟ୍‌ସକୁ ପରାସ୍ତ କରିଛି। ମହମ୍ମଦ‌ କୈଫଙ୍କ ୩୪ ରନ୍ ବଳରେ ଗୁଜରାଟ ଗ୍ରେଟ୍ସ ୧୩୪ ରନ୍ କରିଥିଲା। ଜବାବରେ ମନୋଜ ତିୱାରୀ (୨୭ ବଲ୍‌ରୁ ୨୯ ରନ୍) ଓ ତିସାରା ପେରେରା (୨୨ ବଲ୍‌ରୁ ୩୮* ରନ୍) ଙ୍କ ପାଳି ବଳରେ ମଣିପାଲ୍ ୧୭ ଓଭରରେ ୫ ୱିକେଟ୍ ହରାଇ ୧୩୭ ରନ୍ ସଂଗ୍ରହ କରି ନେଇଥିଲା। ମନନ ଶର୍ମା ୩ ୱିକେଟ୍ ଦଖଲ କରିଥିଲେ ମଧ୍ୟ ମଣିପାଲକୁ ରୋକିପାରିନଥିଲେ।