ବାରବାଟୀ ଟ୍ବେଣ୍ଟି-୨୦ ପଥ ପରିସ୍କାର: ବିସିସିଆଇ ଆପେକ୍ସ କାଉନସିଲ୍ ଦେଲା ଆନୁଷ୍ଠାନିକ ପ୍ରସ୍ତାବ
କଟକ: ବାରବାଟୀ ଷ୍ଟାଡିୟମରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ପ୍ରସ୍ତାବିତ ଟ୍ବେଣ୍ଟି-୨୦ ମ୍ୟାଚ୍ ପାଇଁ ପଥ ପରିସ୍କାର ହୋଇଛି। ଗତ ୩ ତାରିଖରେ ବସିଥିବା ବିସିସିଆଇ ଆପେକ୍ସ କାଉନସିଲ ବୈଠକରେ ପାରିତ ହୋଇଥିବା ପ୍ରସ୍ତାବ ସ˚କ୍ରାନ୍ତରେ ପୂର୍ବରୁ ଖବର ପ୍ରକାଶ ପାଇଥିଲା ବେଳେ ଏବେ ପୂର୍ଣ୍ଣାଙ୍ଗ ବିବରଣୀରୁ ଜୁନ୍ ୯ ତାରିଖରୁ ଆରମ୍ଭ ହେଉଥିବା ଉକ୍ତ ଶୃଙ୍ଖଳା ବିଷୟରେ ସ୍ପଷ୍ଟ ଚିତ୍ର ମିଳିଛି। ବିବରଣୀ ଅନୁଯାୟୀ, ଜୁନ୍ରେ ଉଭୟ ଦେଶ ମଧ୍ୟରେ ଟ୍ବେଣ୍ଟି-୨୦ ଶୃଙ୍ଖଳା ଆୟୋଜନ ହେବ। ତେବେ ରୋଟେସନ୍ ପଲିସି ନିୟମ ଆଧାରରେ କଟକ, ବିଶାଖାପାଟନା, ତ୍ରିଭେନ୍ଦ୍ରମ, ମୋହାଲି ଟ୍ବେଣ୍ଟି-୨୦ ମ୍ୟାଚ ଆୟୋଜନ କରିବାର ଥିଲା। କିନ୍ତୁ ଏହି ସ୍ଥାନରେ ମ୍ୟାଚ୍ ଆୟୋଜନ ହୋଇପାରିନଥିଲା।
Sambad is now on WhatsApp
Join and get latest news updates delivered to you via WhatsApp
ଏପରିକି ଆଗକୁ ହେବାକୁଥିବା ଶୃଙ୍ଖଳା ପାଇଁ ରୋଟେସନ୍ ନିୟମ ଅନୁସାରେ ଚେନ୍ନାଇ, ବେଙ୍ଗାଲୁରୁ, ନାଗପୁର, ରାଜକୋଟ, ଦିଲ୍ଲୀକୁ ମ୍ୟାଚ୍ ଆୟୋଜନ ଅଧିକାର ମିଳିଥାନ୍ତା। ହେଲେ ମୋହାଲି ଓ ବେଙ୍ଗାଲୁରୁରେ ଶ୍ରୀଲଙ୍କା ବିପକ୍ଷ ଟେଷ୍ଟ ଶୃଙ୍ଖଳା ଚାଲିଥିଲା ବେଳେ ତ୍ରିଭେନ୍ଦ୍ରମ୍କୁ ସେପ୍ଟେମ୍ବର କିମ୍ବା ଅକ୍ଟୋବର ବେଳକୁ ମ୍ୟାଚ୍ ଦେବା ପାଇଁ କେରଳ କ୍ରିକେଟ୍ ସ˚ଘ ପକ୍ଷରୁ ଅନୁରୋଧ କରାଯାଇଥିଲା। କାରଣ ଜୁନ୍ରେ ବର୍ଷା ହେବା ସମ୍ଭାବନା ରହିଛି। ତେଣୁ ଦକ୍ଷିଣ ଆଫ୍ରିକା ବିପକ୍ଷ ଶୃଙ୍ଖଳା ପାଇଁ କଟକ, ବିଶାଖାପାଟ୍ନା, ଦିଲ୍ଲୀ, ରାଜକୋଟ ଓ ଚେନ୍ନାଇକୁ ଆୟୋଜନ ଅଧିକାର ଦେବା ପାଇଁ କାଉନସିଲ ପକ୍ଷରୁ ଅନୁରୋଧ କରାଯାଇଛି। ଆପେକ୍ସ କାଉନସିଲ୍ର ଏହି ପ୍ରସ୍ତାବକୁ ବିସିସିଆଇର ଟୁର, ଫିକ୍ସଚର୍ ଓ ଟେକ୍ନିକାଲ କମିଟି ନିକଟକୁ ପଠାଇ ଦିଆଯିବ। ଖୁବ୍ଶୀଘ୍ର ଏହି କମିଟି ବୈଠକ ବସିବାକୁ ଯାଉଥିଲା ବେଳେ ଆପେକ୍ସ କାଉନସିଲ୍ର ପ୍ରସ୍ତାବ ଉପରେ ମୋହର ବାଜିବ ବୋଲି ଜଣାପଡ଼ିଛି।