ସ୍ପା (ବେଲ୍‌ଜିୟମ୍‌) : ରବିବାର ଏଠାରେ ଆୟୋଜିତ ବେଲ୍‌ଜିୟମ୍‌ ଗ୍ରାଁ ପ୍ରି ଫର୍ମୁଲା ୱାନ୍‌ ରେସ୍‌ ଜିତିଛନ୍ତି ମାକ୍ସ ଭର୍ଷ୍ଟାପେନ୍‌। ନେଦରଲାଣ୍ଡ୍‌ସର ଏହି ରେସ୍‌ ବିଜେତା ତଥା ଓରକେଲ୍‌ ରେଡ୍‌ ବୁଲ୍‌ ଚାଳକ ଚତୁର୍ଦଶ ଗ୍ରିଡ୍‌ରୁ ରେସ୍‌ ଆରମ୍ଭ କରି ପ୍ରଥମ ସ୍ଥାନ ପାଇଥିଲେ। ଏଥିସହିତ ସେ ମଧ୍ୟ ଦ୍ବିତୀୟ ଫର୍ମୁଲା ୱାନ୍‌ ଟ୍ରଫି ଜିତିବା ଦିଗରେ ଅଗ୍ରସର ହୋଇଛନ୍ତି। ସେ ଚଳିତ ଋତୁରେ ୧୪ ରେସ୍‌ରୁ ନବମ ବିଜୟ ହାସଲ କରିଛନ୍ତି। ଆଉ ୮ ରେସ୍‌ ବାକି ଥିଲାବେଳେ ଭର୍ଷ୍ଟାପେନ୍‌ ତାଙ୍କ ନିକଟତମ ପ୍ରତିଦ୍ବନ୍ଦ୍ବୀ ମେକ୍ସିକୋ ଦଳୀୟ ସାଥୀ ସର୍ଗିଓ ପେରେଜ୍‌ଙ୍କଠୁ ୯୩ ପଏଣ୍ଟ ଅଗ୍ରଣୀ ହାସଲ କରିଛନ୍ତି। ଭର୍ଷ୍ଟାପେନ୍‌ ରବିବାର ପେରେଜ୍‌ଙ୍କଠୁ ୧୭.୮ ସେକେଣ୍ଡ ଆଗରେ ରେସ୍‌ ଶେଷ କରିଥିଲେ। ଫେରାରିର ସ୍ପେନ୍‌ ଚାଳକ କାର୍ଲୋସ୍‌ ସେଞ୍ଜ୍‌ ତୃତୀୟ ସ୍ଥାନ ସହ ପୋଡିୟମ୍‌ ଫିନିସ୍‌ କରିଥିଲେ।