ବିଜୟ ହଜାରେ ଟ୍ରଫି: ଜମ୍ମୁ କାଶ୍ମୀରଠୁ ହାରିଲା ଓଡ଼ିଶା
କଟକ: ମୁମ୍ବାଇର ଶରଦ ପାୱାର କ୍ରିକେଟ ଏକାଡେମିଠାରେ ଖେଳାଯାଇଥିବା ବିଜୟ ହଜାରେ ଟ୍ରଫିରେ ଜମ୍ମୁ କାଶ୍ମୀର ୩ ୱିକେଟରେ ଓଡ଼ିଶାକୁ ହରାଇଛି। ଫଳରେ ଓଡ଼ିଶା ୫ମ୍ୟାଚ୍ରୁ ଲଗାତାର ଭାବେ ତୃତୀୟ ମ୍ୟାଚ୍ରେ ହାରିଥିଲା ବେଳେ ପ୍ରତିଯୋଗିତାରେ ଏହା ହେଉଛି ଚତୁର୍ଥ ପରାଜୟ। ଏହି ମ୍ୟାଚ୍ରେ ଜମ୍ମୁ ଟସ୍ ଜିତି ପ୍ରଥମେ କ୍ଷେତ୍ରରକ୍ଷଣ କରିଥିଲା। ଅଭିଷେକ ରାଉତଙ୍କ ୭୫ ଓ ରାକେଶ ପଟ୍ଟନାୟକଙ୍କ ୫୩ ରନ୍ ସହାୟତାରେ ଓଡ଼ିଶା ୬ ୱିକେଟ୍ ହରାଇ ୨୬୮ ରନ୍ କରିଥିଲା।
Sambad is now on WhatsApp
Join and get latest news updates delivered to you via WhatsApp
ଅନ୍ୟମାନଙ୍କ ମଧ୍ୟରେ କାର୍ତ୍ତିକ ବିଶ୍ବାଳ ୪୭, ରାଜେଶ ଧୂପର ୩୨ ରନ୍ ଦଳୀୟ ସ୍କୋରରେ ଯୋଡ଼ିଥିଲେ। ପ୍ରତିପକ୍ଷର ଯୁଦ୍ଧବୀର ସିଂହ ୩, ମୁଜତାବା ୟୁସୁଫ ୨ ୱିକେଟ୍ ଅକ୍ତିଆର କରିଥିଲେ। ଜବାବରେ ଜମ୍ମୁ କାଶ୍ମୀର ୭ ବଲ୍ ଓ ୩ ୱିକେଟ୍ ବାକି ଥାଇ ମ୍ୟାଚ୍କୁ ଜିତିନେଇଥିଲା। ବିଜୟୀ ଦଳର ଶୁଭମ୍ ଖଜୁରିଆ ୭୮ ଓ ଶୁଭମ ସିଂହ ପୁନ୍ଦର ୫୭ ରନ୍ କରିଥିଲେ। ଓଡ଼ିଶା ପାଇଁ ତାରିଣୀ ସ’ ୩ ଓ ଅଭିଷେକ ୨ ୱିକେଟ୍ ହାସଲ କରିଥିଲେ। ପୂର୍ବରୁ କେବଳ ନାଗାଲାଣ୍ଡ ବିପକ୍ଷରେ ଓଡ଼ିଶା ମ୍ୟାଚ୍ ଜିତିଥିଲା ବେଳେ ଉତ୍ତରାଖଣ୍ଡ, ମଧ୍ୟପ୍ରଦେଶ, ବରୋଦାଠୁ ପରାଜିତ ହୋଇଥିଲା। ଓଡ଼ିଶା ତାହାର ଶେଷ ଲିଗ୍ ମ୍ୟାଚ୍ ସୋମବାର ପଞ୍ଜାବ ବିପକ୍ଷରେ ଖେଳିବ।