୨୦୧୮ରେ ଭାରତୀୟ କ୍ରିକେଟ୍ ଦଳର ପ୍ରଦର୍ଶନ, ସଫଳତା, ବାଦବିବାଦ ସବୁକିଛି ଯେମିତି ଅଧିନାୟକ ବିରାଟ କୋହଲିଙ୍କ ଚାରିପଟେ ଘୂରିଥିଲା। ଦଳଗତ ଭାବେ ଭାରତ ଯେତିକି ଚର୍ଚାରେ ରହି ନଥିଲା ବ୍ୟକ୍ତିଗତ ଭାବେ କୋହଲିଙ୍କୁ ନେଇ ତା’ଠାରୁ ଅଧିକ ତର୍କ-ବିତର୍କ ହୋଇଥିଲା। ଇଲଣ୍ଡ, ଦକ୍ଷିଣ ଆଫ୍ରିକା ଓ ଅଷ୍ଟ୍ରେଲିଆରେ ରନ୍ କରି କୋହଲି ନିନ୍ଦୁକଙ୍କ ମୁହଁ ବନ୍ଦ କରିଥିଲେ। ତାଙ୍କ ପଡ଼ିଆ ଭିତର ବ୍ୟବହାରକୁ କିନ୍ତୁ ଅନେକ ପସନ୍ଦ କରି ନଥିଲେ। ବର୍ଷ ଆରମ୍ଭରୁ ଭାରତ ଦକ୍ଷିଣ ଆଫ୍ରିକା ଗସ୍ତରେ ଯାଇ ଲଢ଼ୁଆ କ୍ରିକେଟ୍ ଖେଳିଥିଲା ହେଲେ ଟେଷ୍ଟ ଶୃଙ୍ଖଳାକୁ ୧-୨ରେ ହାରି ଯାଇଥିଲା। ଜୁନରେ ଆଫଗାନିସ୍ତାନ ବିପକ୍ଷ ଐତିହାସିକ ଟେଷ୍ଟକୁ ଜିତିବା ପରେ ଜୁଲାଇ-ଅଗଷ୍ଟରେ ଇଂଲଣ୍ଡ ଯାଇ ୧-୪ରେ ଶୃଙ୍ଖଳା ହାରିଥିଲା। ଶ୍ରୀଲଙ୍କାକୁ ତିନି ମ୍ୟାଚ୍ ବିଶିଷ୍ଟ ଶୃଙ୍ଖଳାରେ ୧-୦ରେ ହରାଇଥିଲା। ତୁଳନାତ୍ମକ ଭାବେ ଦିନିକିଆରେ ଅଧିକ ସଫଳତା ପାଇଥିଲା ଟିମ୍ ଇଣ୍ଡିଆ। ଶ୍ରୀଲଙ୍କାକୁ ୨-୧, ୱେଷ୍ଟଇଣ୍ଡିଜକୁ ୩-୧ରେ ହରାଇଥିଲା ବେଳେ ଇଂଲଣ୍ଡରେ ୧-୨ରେ ହାରିଥିଲା। ଦକ୍ଷିଣ ଆଫ୍ରିକାରେ ୬ ମ୍ୟାଚ୍ ଶୃଙ୍ଖଳାକୁ ୫-୧ ଓ ଟ୍ବେଣ୍ଟି-୨୦କୁ ୨-୧ରେ ଜିତିବା ଭାରତୀୟ ଦଳର ଅନ୍ୟତମ ବଡ଼ ସଫଳତା ଥିଲା। ଭାରତର ଟ୍ବେଣ୍ଟି-୨୦ ପ୍ରଦର୍ଶନ ମଧ୍ୟ ବହୁତ ଭଲ ଥିଲା। ୨୦୧୮ରେ ଭାରତ ୧୧ ଟ୍ବେଣ୍ଟି-୨୦ ଖେଳି ୮ଟିରେ ବିଜୟୀ ହୋଇଥିଲା। ୨ଟି ହାରିବା ସହ ଗୋଟିଏ ମ୍ୟାଚ୍ ବାତିଲ ହୋଇ ଯାଇଥିଲା। ମିଶ୍ରିତ ସଫଳତା ସହ ଭାରତ ଟେଷ୍ଟ ମାନ୍ୟତାରେ ୧ ଏବଂ ଦିନିକିଆ ଓ ଟ୍ବେଣ୍ଟି-୨୦ରେ ୨ୟ ସ୍ଥାନରେ ରହି ବର୍ଷ ଶେଷ କରିଥିଲା। କୋହଲି ବ୍ୟକ୍ତିଗତ ଭାବେ ୨୦୧୮ରେ ୧୪ ଦିନିକିଆ ଖେଳି ୧୩୩.୫୫ ହାରରେ ୧୨୦୨ ରନ୍ କରିଥିଲେ। ସେଥିମଧ୍ୟରେ ଥିଲା ୬ ଶତକ ଓ ୩ ଅର୍ଧଶତକ। ଟେଷ୍ଟରେ ଆଡିଲେଡ ବିୟର ଐତିହାସିକ ସଫଳତାରୁ ଆରମ୍ଭ କରି ପର୍ଥରେ ଶତକ ହାସଲ କରିଥିଲେ କୋହଲି। ସେହିଭଳି ଦକ୍ଷିଣ ଆଫ୍ରିକା, ଇଂଲଣ୍ଡ ଓ ଅଷ୍ଟ୍ରେଲିଆରେ ଟେଷ୍ଟ ଜିତିବାରେ ସେ ହୋଇଥିଲେ ଏସିଆର ପ୍ରଥମ ଅଧିନାୟକ। ଟେଷ୍ଟ କ୍ରିକେଟରେ ମଧ୍ୟ ସେ ଚଳିତ ବର୍ଶ ୧୧୦୦ରୁ ଅଧିକ ରନ୍ କରିଥିଲେ। ଦ୍ବିତୀୟ ଦ୍ରୁତତମ ୨୫ ଟେଷ୍ଟ ଶତକ ସହ ଅଷ୍ଟ୍ରେଲିଆରେ ୬ ଶତକ ହାସଲ କରିବାର ସଚିନ ତେନ୍ଦୁଲକରଙ୍କ ଅନନ୍ୟ କୀର୍ତ୍ତିମାନର ସମକକ୍ଷ ହୋଇଥିଲେ କୋହଲି।