ବିରାଟ କୋହଲିଙ୍କ ଯୋଗୁଁ ରାତାରାତି ବିକ୍ରି ହୋଇଗଲା ଏହି ବହି
ଓ୍ଵଷ୍ଟ୍ଇଣ୍ଡିଜ୍ରେ ଖେଳାଯାଉଥିବା ପ୍ରଥମ ମ୍ୟାଚ୍ ସମୟରେ ସେହି ବହି ପଢ଼ୁଥିବା ସମୟରେ ବିରାଟ ହୋଇଥିଲେ ଟ୍ରୋଲ୍!
ନୂଆଦିଲ୍ଲୀ:ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି ଓ୍ଵଷ୍ଟ୍ଇଣ୍ଡିଜ୍ ବିପକ୍ଷରେ ଖେଳାଯାଉଥିବା ପ୍ରଥମ ଟେଷ୍ଟ୍ ମ୍ୟାଚ୍ ଚାଲୁଥିବା ସମୟରେ ଡ୍ରେସିଂ ରୁମ୍ର ବାଲ୍କୋନି ସମ୍ମୁଖରେ ବସି ଏକ ବହି ପଢ଼ୁଥିବାର ନଜରକୁ ଆସିଥିଲେ। ଏହାର ଏକ ଫଟୋ ସୋସିଆଲ୍ ମିଡ଼ିଆରେ ଖୁବ୍ ଭାଇରାଲ୍ ହୋଇଥିଲା। କିନ୍ତୁ ଅଧିନାୟକ ବିରାଟ କୋହଲିଙ୍କୁ ସେଠାରେ ଉପସ୍ଥିତ ରହିଥିବା ଦର୍ଶକେ ଜମେଇକି ଟ୍ରୋଲ୍ କରିଥିଲେ। ହେଲେ ପରବର୍ତ୍ତୀ ସମୟରେ ବିରାଟଙ୍କ କାରଣରୁ ଉକ୍ତ ବହି ବିକ୍ରି କରୁଥିବା କଂପାନିକୁ ଏହାର ଫାଇଦା ମିଳିଥିଲା।
Sambad is now on WhatsApp
Join and get latest news updates delivered to you via WhatsApp
ଆପଣଙ୍କ ସୂଚନାପାଇଁ ଜଣାଉଛୁ କି , କିଛିଦିନ ପୂର୍ବରୁ ଭାରତୀୟ କ୍ରିକେଟ ଦଳ ଓ୍ଵଷ୍ଟ୍ଇଣ୍ଡିଜ୍ ବିପକ୍ଷରେ ପ୍ରଥମ ଟେଷ୍ଟ୍ ମ୍ୟାଚ୍ ଖେଳୁଥିବା ସମୟରେ ସଂଘର୍ଷ କରୁଥିବାବେଳେ ଭାରତୀୟ ଦଳର ଅଧିନାୟକ ବିରାଟ କୋହଲିଙ୍କର ସଂପୂର୍ଣ୍ଣ ଧ୍ୟାନ‘ଡିଟକ୍ସ ୟୁଅର୍ ଇଗୋ’ବହି ଉପରେ ରହିଥିଲା। ଫଳତଃ କୋହଲି ଉକ୍ତ ବହିକୁ ପଢିବାରେ ଏଭଳି ଭାବେ ମଗ୍ନ ଥିଲେ ଯେ, ତାଙ୍କର ଖେଳ ଲାଗି କୌଣସି ନିଘା ନ ଥିଲା ତେବେ ବିରାଟଙ୍କର ଏହି ମୂହୁର୍ତ୍ତର ଫଟୋ ଉଠାଇ ସେଠାରେ ଉପସ୍ଥିତ ରହିଥିବା କେହି ଜଣେ ଦର୍ଶକ ସୋସିଆଲ୍ ମିଡ଼ିଆରେ ସେଆର୍ କରିଦେଇଥିଲେ,ଯାହାକି ଖୁବ୍ ଭାଇରାଲ୍ ହୋଇଥିଲା। ଏହାପରେ ଲୋକେ ବିରାଟ୍ଙ୍କୁ ଟ୍ରୋଲ୍ କରିବା ସହିତ ଅନେକ ପ୍ରକାରର ଉପଦେଶ ମଧ୍ୟ ଦେଇଥିଲେ।
ଏନେଇ ବହିର ପ୍ରକାଶକ ତାଙ୍କର ଟୁଇଟର୍ ରେ ଲେଖିଛନ୍ତି କି ,ଅଧିନାୟକ ବିରାଟଙ୍କ ଯୋଗୁଁ ତାଙ୍କର ସମସ୍ତ ବହି ଭାରତରେ ବିକ୍ରି ହୋଇସାରିଛି ଓ ବ୍ରିଟେନ୍ରେ ମଧ୍ୟ ଏହାର ଚାହିଦା ବୃଦ୍ଧି ପାଇଛି। ତେବେ ଉକ୍ତ ପୁସ୍ତକର ପ୍ରକାଶକଙ୍କ ଏହି ଟୁଇଟ୍ରୁ ଜଣାପଡ଼ୁଛି ଯେ, ଖୁବ ଶୀଘ୍ର ପୁଣିଥରେ ଏହି ବହି ବଜାରକୁ ଆସିବ ଏବଂ ଅନ୍ୟ ପାଠକ ବି ବିରାଟଙ୍କ ଭଳି ଏଥିରେ ଲେଖା ହୋଇଥିବା ପାଠକୁ ପଢ଼ିପାରିବେ।
‘ଡିଟକ୍ସ ୟୁଅର୍ ଇଗୋ’ ନାମକ ଏହି ପୁସ୍ତକକୁ ପୂର୍ବତନ କ୍ରିକେଟର୍ ଷ୍ଟିଭେନ ସେଲଭେଷ୍ଟର ଲେଖିଛନ୍ତି। ଏହି ପୁସ୍ତକରେ ବ୍ୟକ୍ତି ତାହାର ଜୀବନରେ ସ୍ୱାଧୀନ ଭାବେ ରହିବା ସହିତ ନିଜର ମତକୁ ପ୍ରକାଶ କରିବାର ସୋପାନ ବିଷୟରେ ଲେଖାଯାଇଛି।