ଆଇପିଏଲ ପ୍ରାୟୋଜକରୁ ବାଦ ପଡିଲା ଭିଭୋ
ନୂଆଦିଲ୍ଲୀ: ଶେଷରେ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ର ଚଳିତବର୍ଷ ସଂସ୍କରଣରୁ ବାଦ ପଡିଲା ଭିଭୋ | ଦେଶରେ ପ୍ରବଳ ବିରୋଧ ପରେ ମଙ୍ଗଳବାର ଭିଭୋ କମ୍ପାନୀ ଏହି ନିଷ୍ପତ୍ତି ନେଇଛି। ଜୁନ୍ ମାସରେ ପୂର୍ବ ଲଦାଖରେ ଭାରତ ଏବଂ ଚୀନ୍ ସୈନିକଙ୍କ ମଧ୍ୟରେ ସଂଘର୍ଷ ପରଠାରୁ ଅନେକ ଲୋକ ଚାଇନାର ସାମଗ୍ରୀକୁ ବଏକଟ କରିବା କଥା କହିଥିଲେ। ଭିଭୋ ଏକ ଚାଇନିଜ୍ ଫୋନ୍ ନିର୍ମାତା ହୋଇଥିବାରୁ ଏହାକୁ ବାଦ ଦେବାକୁ ଲୋକ ଦାବି କରିଥିଲେ ।
Sambad is now on WhatsApp
Join and get latest news updates delivered to you via WhatsApp
ଏହା ବ୍ୟତୀତ ଯେତେବେଳେ ଆଇପିଏଲ୍ ପରିଚାଳନା ପରିଷଦ ପ୍ରାୟୋଜକଙ୍କୁ ରଖିବା କଥା କହିଥିଲେ ସେତେବେଳେ ସୋସିଆଲ ମିଡିଆରେ ଲୋକମାନେ ଏହାକୁ ବିରୋଧ କରିଥିଲେ। ସୂଚନା ଅନୁଯାୟୀ, ଭିଭୋ କମ୍ପାନୀ ଆସନ୍ତା ବର୍ଷରେ ଅର୍ଥାତ୍ ୨୦୨୧ରେ ପ୍ରାୟୋଜକ ହେବ, ଏହି ଡିଲ୍ ୨୦୨୩ ପର୍ଯ୍ୟନ୍ତ ଚାଲିବ।
ଏହି ବର୍ଷ ପାଇଁ ନୂତନ ପ୍ରାୟୋଜକଙ୍କ ନାମ ଖୁବ ଶୀଘ୍ର ଘୋଷଣା କରାଯିବ | ତଥାପି, ଭିଭୋ ଚୁକ୍ତିରେ ତିନି ବର୍ଷ ବାକି ଥିବାରୁ, ଚାଇନାର ମୋବାଇଲ୍ କମ୍ପାନୀ ୨୦୨୧, ୨୦୨୨ ଏବଂ ୨୦୨୩ ର ଆଇପିଏଲରେ ଯୋଗ ଦେଇପାରେ | ଆଇପିଏଲର ୧୩ ତମ ସଂସ୍କରଣ ୧୯ ସେପ୍ଟେମ୍ବରରୁ ୟୁଏଇରେ ଆରମ୍ଭ ହେବ | ଏହାର ଅନ୍ତିମ ମ୍ୟାଚ୍ ୧୦ ନଭେମ୍ବରରେ ଖେଳାଯିବ | ପ୍ରାରମ୍ଭରେ, ମାର୍ଚ୍ଚରେ ଭାରତରେ ଏହି ଲିଗ୍ ଖେଳାଯିବାକୁ ଥିଲା, କିନ୍ତୁ କରୋନା ଭୂତାଣୁ ବୃଦ୍ଧି ପାଉଥିବାରୁ ଏହାକୁ ସ୍ଥଗିତ ରଖାଯାଇଥିଲା।