ୱେଲିଂଟନ୍ ଟେଷ୍ଟ୍: ଶ୍ରୀଲଙ୍କା ଫଲୋଅନ୍
ଶୃଙ୍ଖଳା ମୂଳପୋଛ ଦ୍ବାରରେ ନ୍ୟୁଜିଲାଣ୍ଡ
ୱେଲିଂଟନ୍: ଶ୍ରୀଲଙ୍କା ବିପକ୍ଷ ପ୍ରଥମ ଟେଷ୍ଟ୍କୁ ରୋମାଞ୍ଚକ ଭାବେ ଶେଷ ବଲ୍ରେ ଜିତିଥିବା ଘରୋଇ ନ୍ୟୁଜିଲାଣ୍ଡ ଦ୍ବିତୀୟ ମ୍ୟାଚ୍ରେ ବିଜୟ ଦ୍ବାରରେ ପହଞ୍ଚିଛି। ଫଳରେ ୨ ମ୍ୟାଚ୍ ବିଶିଷ୍ଟ ଏହି ଟେଷ୍ଟ୍ ଶୃଙ୍ଖଳା ମୂଳପୋଛ କରିବାର ନିକଟତର ହୋଇଛି ନ୍ୟୁଜିଲାଣ୍ଡ। ଏଠାରେ ଚାଲିଥିବା ଦ୍ବିତୀୟ ଟେଷ୍ଟ୍ର ପ୍ରଥମ ଦୁଇ ଦିନ ବ୍ୟାଟିଂରେ କମାଲ ଦେଖାଇଥିବା ଘରୋଇ ଦଳ ରବିବାର ତୃତୀୟ ଦିନରେ ବୋଲିଂରେ ଶ୍ରୀଲଙ୍କାକୁ ଦାବିଦେଇଛି। କେନ୍ ୱିଲିୟମସନ୍ ଓ ହେନରି ନିକୋଲ୍ସଙ୍କ କୀର୍ତ୍ତିମାନ ଭରା ଦ୍ବିଶତକୀୟ ରନ୍ ବଳରେ ଘରୋଇ ଦଳ ୫୮୦/୪ରେ ପ୍ରଥମ ପାଳି ଘୋଷଣା କରିଥିଲା। ଜବାବରେ ଶ୍ରୀଲଙ୍କାର ପ୍ରଥମ ପାଳିକୁ ମାତ୍ର ୧୬୪ ରନ୍ରେ ଶେଷ କରି ଫଲୋଅନ୍ ଡାକିବା ପରେ ଦ୍ବିତୀୟ ପାଳିର ୨ ୱିକେଟ୍ ଝାଡ଼ି ଦେଇଛି ନ୍ୟୁଜିଲାଣ୍ଡ। ତୃତୀୟ ଦିନର ଷ୍ଟମ୍ପ୍ସ ଅପସାରଣ ବେଳକୁ ଶ୍ରୀଲଙ୍କା ଦ୍ବିତୀୟ ପାଳିରେ ୧୧୩/୨ରେ ସଂଘର୍ଷ କରୁଛି। ଅଧିନାୟକ ଦିମୁଥ କରୁଣାରତ୍ନେ (୫୧ ରନ୍) ଓ ଓସାଦା ଫର୍ଣ୍ଣାଣ୍ଡୋ (୫ ରନ୍) ଆଉଟ୍ ହୋଇଥିଲା ବେଳେ କୁସାଲ ମେଣ୍ଡିସ (୫୦* ରନ୍) ଓ ଆଞ୍ଜେଲୋ ମାଥ୍ୟୁସ (୧ ରନ୍) ବ୍ୟାଟିଂ ଜାରି ରଖିଛନ୍ତି। ଟିମ୍ ସାଉଦି ଓ ଡଗ୍ ବ୍ରେସୱେଲ ଗୋଟିଏ ଲେଖାଏଁ ୱିକେଟ୍ ନେଇଛନ୍ତି। ପାଳି ପରାଜୟ ଏଡ଼ାଇବାକୁ ଶ୍ରୀଲଙ୍କାକୁ ଆହୁରି ୩୦୪ ରନ୍ ଆବଶ୍ୟକ ରହିଛି।
Sambad is now on WhatsApp
Join and get latest news updates delivered to you via WhatsApp
ପୂର୍ବଦିନ ସ୍କୋର୍ ୨୬/୨ରୁ ଖେଳିଥିବା ଶ୍ରୀଲଙ୍କା ତୃତୀୟ ଦିନର ଚା’ପାନ ପୂର୍ବରୁ ସମସ୍ତ ୱିକେଟ୍ ହରାଇଥିଲା। ଭ୍ରମଣକାରୀ ଦଳର ଅଧିନାୟକ ଦିମୁଥ କରୁଣାରତ୍ନେ ୮୯, ଦିନେଶ ଚାନ୍ଦିମାଳ ୩୭ ଓ ନିଶାନ ମଧୁସ୍କା ୧୯ ରନ୍ଙ୍କ ଛଡ଼ା ଅନ୍ୟ କୌଣସି ବ୍ୟାଟର୍ ଦୁଇ ଅଙ୍କ ଛୁଇଁ ପାରିନଥିଲେ। ନ୍ୟୁଜିଲାଣ୍ଡର ମ୍ୟାଟ୍ ହେନରି ଓ ମାଇକେଲ ବ୍ରାସୱେଲ ୩ ଲେଖାଏଁ ୱିକେଟ୍ ନେଇଥିଲେ।
ସଂକ୍ଷିପ୍ତ ସ୍କୋର: ନ୍ୟୁଜିଲାଣ୍ଡ ପ୍ରଥମ ପାଳି ୧୨୩ ଓଭରରେ ୫୮୦/୪ (ଘୋଷିତ)। ଶ୍ରୀଲଙ୍କା ପ୍ରଥମ ପାଳି ୬୬.୫ ଓଭରରେ ୧୬୪/୧୦ (ଦିମୁଥ କରୁଣାରତ୍ନେ ୮୯, ଦିନେଶ ଚାନ୍ଦିମାଳ ୩୭, ମ୍ୟାଟ୍ ହେନରି ୩/୪୪, ମାଇକେଲ ବ୍ରାସୱେଲ ୩/୫୦)। ଶ୍ରୀଲଙ୍କା ଦ୍ବିତୀୟ ପାଳି ୪୩ ଓଭରରେ ୧୧୩/୨ (ଦିମୁଥ କରୁଣାରତ୍ନେ ୫୧, ଦିନେଶ ଚାନ୍ଦିମାଳ ୫୦*, ଟିମ୍ ସାଉଦି ୧/୯, ଡଗ୍ ବ୍ରେସୱେଲ ୧/୨୦)।