ଦଲୀପ୍ ଟ୍ରଫି ସେମିଫାଇନାଲ୍ରେ ପଶ୍ଚିମ ଓ ଉତ୍ତରାଞ୍ଚଳ
ଚେନ୍ନାଇ/ପୁଡୁଚେରୀ: ପଶ୍ଚିମାଞ୍ଚଳ ଏବଂ ଉତ୍ତରାଞ୍ଚଳ ଦଳ ଦଲୀପ ଟ୍ରଫି ସେମିଫାଇନାଲ୍କୁ ଉନ୍ନୀତ ହୋଇଛନ୍ତି। ଚେନ୍ନାଇର ଏମ୍ଏ ଚିଦମ୍ବରମ୍ ଷ୍ଟାଡିୟମ୍ରେ ପଶ୍ଚିମାଞ୍ଚଳ-ଉତ୍ତର ପୂର୍ବାଞ୍ଚଳ ଏବଂ ପୁଡୁଚେରୀରେ ପୂର୍ବାଞ୍ଚଳ-ଉତ୍ତରାଞ୍ଚଳ କ୍ବାର୍ଟର ଫାଇନାଲ୍ ମୁକାବିଲା ରବିବାର ପଞ୍ଚମ ତଥା ଶେଷ ଦିନରେ ଅମୀମାଂସିତ ରହିଥିଲା। ହେଲେ ପଶ୍ଚିମାଞ୍ଚଳ ଏବଂ ଉତ୍ତରାଞ୍ଚଳ ପ୍ରଥମ ପାଳି ଅଗ୍ରଣୀ ଭିତ୍ତିରେ ମ୍ୟାଚ୍ ଜିତି ନେଇଥିଲେ। ଚେନ୍ନାଇରେ ଅଧିନାୟକ ଆଜିଙ୍କ୍ୟ ରାହାଣେ (୨୦୭*)ଙ୍କ ଅପରାଜିତ ଦ୍ବିଶତକ ସାଙ୍ଗକୁ ଯଶସ୍ବୀ ଜୟସ୍ବାଲ (୨୨୮)ଙ୍କ ଦ୍ବିଶତକ ଓ ପୃଥ୍ବୀ ସ (୧୧୩)ଙ୍କ ଶତକ ବଳରେ ପଶ୍ଚିମାଞ୍ଚଳ ୫୯୦/୨ରେ ପ୍ରଥମ ପାଳି ଘୋଷଣା କରିଥିଲା। ଜବାବରେ ଉତ୍ତର ପୂର୍ବାଞ୍ଚଳ ପ୍ରଥମ ପାଳି ୨୩୫ ରନ୍ରେ ସୀମିତ ରହିଯାଇଥିଲା। ଫଳରେ ପଶ୍ଚିମାଞ୍ଚଳ ପ୍ରଥମ ପାଳିରେ ୩୫୫ ରନ୍ର ଅଗ୍ରଣୀ ପାଇଥିଲା। ଏହାପରେ ଅଜିତ ସେଠ୍ (୧୦୨*)ଙ୍କ ଅପରାଜିତ ଶତକ ସାଙ୍ଗକୁ ସାମ୍ସ ମୁଲାନୀଙ୍କ ୯୭ ରନ୍ ବଳରେ ପଶ୍ଚିମାଞ୍ଚଳ ଦ୍ବିତୀୟ ପାଳିରେ ୨୬୮/୫ କରିଥିଲା ବେଳେ ମ୍ୟାଚ୍ ଅମୀମାଂସିତ ଘୋଷିତ ହୋଇଥିଲା।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ପୁଡୁଚେରୀରେ ପୂର୍ବାଞ୍ଚଳର ପ୍ରଥମ ପାଳି ସ୍କୋର୍ ୩୯୭ ଜବାବରେ ଉତ୍ତରାଞ୍ଚଳ ୟାଶ୍ ଧୂଲ୍ଙ୍କ ୧୯୩, ଧ୍ରୁବ ସୋରେଙ୍କ ୮୧, ହିମାଂଶୁ ରାଣାଙ୍କ ୮୧ ଓ ଅଧିନାୟକ ମନ୍ଦୀପ ସିଂହଙ୍କ ୬୩ ରନ୍ ବଳରେ ପ୍ରଥମ ପାଳିରେ ୫୪୫ ରନ୍ କରି ୧୪୮ ରନ୍ର ଅଗ୍ରଣୀ ହାସଲ କରିନେଇଥିଲା। ସାହବାଜ୍ ଅହମ୍ମଦ ୫ ୱିକେଟ୍ ସଫଳତା ପାଇଥିଲେ ମଧ୍ୟ ପୂର୍ବାଞ୍ଚଳ ଫାଇଦା ଉଠାଇ ପାରିନଥିଲା। ଏହାପରେ ପୂର୍ବାଞ୍ଚଳ ଦ୍ବିତୀୟ ପାଳିରେ ୧୦୨/୩ କରିଥିଲା ବେଳେ ମ୍ୟାଚ୍ ଅମୀମାାଂସିତ ରହିଥିଲା। ଅଭିଷେକ ପୋରେଲ (୫୦*) ଏହି ପାଳିରେ ଅପରାଜିତ ଅର୍ଦ୍ଧଶତକ ଜମାଇଥିଲେ।