ଭୁବନେଶ୍ବର: ପ୍ରଥମ ଥର ଲାଗି ଗଠିତ ଓଡ଼ିଶା ଦୃଷ୍ଟିହୀନ ମହିଳା କ୍ରିକେଟ୍‌ ଦଳ ଆରମ୍ଭରୁ ସଫଳତା ପାଇଛି। ଡେରାଡୁନ୍‌ଠାରେ ଆୟୋଜିତ ତ୍ରିକୋଣୀୟ କ୍ରିକେଟ୍‌ ପ୍ରତିଯୋଗିତାରେ ଅପରା‌ଜେୟ ସହ ଟ୍ରଫି କରାୟତ କରିଛି। ଲିଗ୍‌ ପର୍ଯ୍ୟାୟରେ ଉତ୍ତରାଖଣ୍ଡ ଓ ଦିଲ୍ଲୀକୁ ହରାଇଥିବା ଓଡ଼ିଶା ଦଳ ରବିବାର ଫାଇନାଲ୍‌ରେ ଦିଲ୍ଲୀକୁ ୯ ୱିକେଟ୍‌ରେ ହରାଇ ବିଜେତା ହେବାର ଗୌରବ ପାଇଛି। ପ୍ରଥମେ ବ୍ୟାଟିଂ କରିଥିବା ଦିଲ୍ଲୀ ନିର୍ଧାରିତ ୧୫ ଓଭରରେ ୮ ୱିକେଟ୍‌ ହରାଇ ୧୩୨ ରନ୍‌ କରିଥିଲା। ଓଡ଼ିଶା ପକ୍ଷରୁ ପାର୍ବତୀ ଟୁଡ଼ୁ ଓ ଫୁଲ ସୋରେନ୍‌ ଗୋଟିଏ ଲେଖାଏଁ ୱିକେଟ୍‌ ପାଇଥିଲେ। ଜବାବରେ ଓଡ଼ିଶା ବାସନ୍ତୀ ହାଁସ୍‌ଦା (୫୭*)ଙ୍କ ଅପରାଜିତ ଅର୍ଧଶତକ ଏବଂ ଝିଲ୍ଲୀ ବରୁଆଙ୍କ ୪୯ ରନ୍‌ ବଳରେ ମାତ୍ର ଗୋଟିଏ ୱକେଟ୍‌ ହରାଇ ୧୦.୩ ଓଭରରେ ମ୍ୟାଚ୍‌ ଜିତି ନେଇଥିଲା। ବି-୨ ବର୍ଗରେ ବାସନ୍ତୀ ଫାଇନାଲ୍‌ ଓ ପ୍ରତିଯୋଗିତାର ଶ୍ରେଷ୍ଠ ଖେଳାଳି ହୋଇଥିଲା ବେ‌ଳେ ବି-୧ ବର୍ଗରେ ଗାୟତ୍ରୀ ମଲ୍ଲିକ ପ୍ରତିଯୋଗିତାର ଶ୍ରେଷ୍ଠ ଖେଳାଳି ପୁରସ୍କାର ପାଇଥିଲେ। ଏହି ସଫଳତା ଲାଗି ଓଡ଼ିଶା ଦୃଷ୍ଟିହୀନ କ୍ରିକେଟ୍‌ ସଂଘର ସଭାପତି ଜାଫର ଇକ୍‌ବାଲ୍‌ ଖେଳାଳି, ପ୍ରବନ୍ଧକ ବିରଞ୍ଚି ନାରାୟଣ ସାହୁ ଏବଂ ପ୍ରଶିକ୍ଷକ ଦେବାଶିଷ ‌ଜେନାଙ୍କୁ ଅଭିନନ୍ଦନ ଜଣାଇଛନ୍ତି।

Advertisment