କେପ୍ଟାଉନ୍: ଦିନିକିଆ ଶୃଙ୍ଖଳାକୁ କବ୍ଜା କରିବା ପରେ ଟି-୨୦ ଶୃଙ୍ଖଳାରେ ୨-୧ ଆଗରେ ଥିବା ଭାରତୀୟ ମହିଳା କ୍ରିକେଟ ଟିମ୍ ଶନିବାର ଦକ୍ଷିଣ ଆଫ୍ରିକା ବିପକ୍ଷରେ ୫ମ ତଥା ଅନ୍ତିମ ଟି-୨୦ର ମୁକାବିଲା କରି ଇତିହାସ ରଚିବା ଲକ୍ଷ୍ୟ ରଖିବ। ପୂର୍ବରୁ ଭାରତ ୨ଟି ମ୍ୟାଚ୍ରେ ବିଜୟୀ ହୋଇଥିବା ବେଳେ ଦକ୍ଷିଣ ଆଫ୍ରିକା ଗୋଟିଏ ମ୍ୟାଚରେ ବିଜୟୀ ହୋଇଛି। ସେଞ୍ଚୁରିଅନ୍ର ସୁପର ସ୍ପୋର୍ଟସ ପାର୍କରେ ବୁଧବାର ୪ର୍ଥ ଟି-୨୦ ବର୍ଷା ଯୋଗୁଁ ବାଧା ଦେବାରୁ ଫଳାଫଳ ବାହାରି ପାରି ନାହିଁ। ଏବେ ୫ମ ମ୍ୟାଚ୍କୁ ନିଜର କରିବା ପାଇଁ ହରମନପ୍ରୀତଙ୍କ ଟିମ୍ ପ୍ରବଳ ଉଦ୍ୟମ କରିବ।
Sambad is now on WhatsApp
Join and get latest news updates delivered to you via WhatsApp
ପ୍ରଥମ ଟି-୨୦ରେ ଭାରତ ଭଲ ପ୍ରଦର୍ଶନ କରି ସାତ ଓ୍ଵିକେଟରେ ବିଜୟୀ ହୋଇଥିବା ବେଳେ ୨ୟ ଟି-୨୦ରେ ୯ଟି ଓ୍ଵିକେଟରେ ଜିତିଛି। ୩ୟ ଟି-୨୦ରେ ଦକ୍ଷିଣ ଆଫ୍ରିକା ୫ଓ୍ଵିକେଟରେ ବିଜୟୀ ହୋଇ ଆତ୍ମବିଶ୍ୱାସ ଫେରାଇଛି। ଅନ୍ୟପକ୍ଷରେ ଭାରତ ଶନିବାର ମ୍ୟାଚରେ ବିଜୟୀ ହୋଇ ଏକ ନୂଆ ରେକର୍ଡ ସ୍ଥାପନା କରିବାର ଲକ୍ଷ୍ୟ ରଖିଛି। ଭାରତ ପୂର୍ବରୁ ଅଷ୍ଟ୍ରେଲିଆରେ ଟି-୨୦ ଶୃଙ୍ଖଳାରେ ବିଜୟୀ ହୋଇଥିଲା।
ବରିଷ୍ଠ ଖେଳାଳି ମିତାଲି ରାଜ ପ୍ରଥମ ୨ଟି ମ୍ୟାଚ୍ରେ ଯଥାକ୍ରମେ ୫୪ ଓ ୭୬ ରନ୍ ସଂଗ୍ରହ କରିଥିବା ବେଳେ ୩ୟ ଟି-୨୦ରେ କୌଣସି ରନ୍ ନକରି ପାଭଲିଅନ୍କୁ ଫେରି ଆସିଥିଲେ। ସେହିପରି ସ୍ମୃତି ମାନ୍ଧାନା ପ୍ରଥମ ମ୍ୟାଚ୍ରେ ୨୮, ୨ୟ ମ୍ୟାଚ୍ରେ ୫୭ ଓ ୩ୟ ମ୍ୟାଚ୍ରେ ୩୭ ରନ୍ ଯୋଡିଥିଲେ।