ମହିଳା ଦିନିକିଆ ଶୃଙ୍ଖଳା ଜିତିଲା ଭାରତ, ଦ୍ବିତୀୟ ମ୍ୟାଚ୍ରେ ଦକ୍ଷିଣ ଆଫ୍ରିକା ୫ ୱିକେଟ୍ରେ ପରାସ୍ତ
ଭଦୋଦରା: ଦକ୍ଷିଣ ଆଫ୍ରିକା ମହିଳା ଦଳ ବିପକ୍ଷ ୬ ମ୍ୟାଚ୍ ବିଶିଷ୍ଟ ଟ୍ବେଣ୍ଟି-୨୦ ଶୃଙ୍ଖଳାକୁ ୩-୧ରେ ଜିତି ନେଇଥିବା ଭାରତୀୟ ଦଳ ତିନି ମ୍ୟାଚ୍ ବିଶିଷ୍ଟ ଦିନିକିଆ ଶୃଙ୍ଖଳାକୁ ମଧ୍ୟ ଆଗୁଆ କବ୍ଜା କରିନେଇଛି। ପ୍ରଥମ ଦିନିକିଆକୁ ୮ ୱିକେଟ୍ରେ ଜିତିଥିବା ଘରୋଇ ଭାରତ ଶୁକ୍ରବାର ଦ୍ବିତୀୟ ଦିନିକିଆକୁ ୫ ୱିକେଟ୍ରେ ଜିତି ନେଇଛି। ଫଳରେ ୨-୦ ଅଗ୍ରଣୀ ସହ ତୃତୀୟ ତଥା ଶେଷ ମ୍ୟାଚ୍ ପୂର୍ବରୁ ଶୃଙ୍ଖଳା ହାତେଇଛି। ଅର୍ଧଶତକୀୟ ପାଳି ଖେଳିଥିବା ପୁନମ୍ ରାଉତ ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ପାଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଶୁକ୍ରବାର ଟସ୍ ଜିତି ଭାରତ ପ୍ରଥମେ କ୍ଷେତ୍ରରକ୍ଷଣ କରିଥିଲା। ଶିଖା ପାଣ୍ଡେ (୨/୩୮), ଏକ୍ତା ବିସ୍ତ (୨/୪୫) ଓ ପୁନମ୍ ଯାଦବ (୨/୪୨) ମିଳିତ ଭାବେ ୬ ୱିକେଟ୍ ଦଖଲ କରିଥିଲା ବେଳେ ଭ୍ରମଣକାରୀ ଦକ୍ଷିଣ ଆଫ୍ରିକା ୨୪୭/୬ର ସମ୍ମାନଜନକ ସ୍କୋର୍ ହାସଲ କରିନେଇଥିଲା। ଉଲ୍ଭାର୍ଟ (୬୯) ଏକା ଅର୍ଧଶତକ ଜମାଇଥିଲା ବେଳେ ଲି (୦), ଡୁ ପ୍ରିଜ୍ (୪୪), ଗୁଡ୍ଅଲ୍ (୩୮) ଓ ଚେଟି (୨୨) ମୂଲ୍ୟବାନ ଅବଦାନ ଦେଇଥିଲେ। ଜବାବରେ ଭାରତ ପୁନମ୍ ରାଉତ (୬୫ ରନ୍, ୭ ଚୌକା), ଅଧିନାୟିକା ମିତାଲି ରାଜ (୬୬ ରନ୍, ୮ ଚୌକା) ଏବଂ ହର୍ମନ୍ପ୍ରୀତ୍ କୌର (ଅପରାଜିତ ୩୯ ରନ୍, ୫ ଚୌକା, ୧ ଛକା)ଙ୍କ ବଳରେ ୧୨ ବଲ୍ ପୂର୍ବରୁ ମ୍ୟାଚ୍ ଜିତି ନେଇଥିଲା। ପୁନମ୍ ଓ ମିତାଲି ତୃତୀୟ ୱିକେଟ୍ରେ ୧୨୯ ରନ୍ ଯୋଡ଼ି ଦକ୍ଷିଣ ଆଫ୍ରିକା ହାତରୁ ମ୍ୟାଚ୍ ଛଡ଼ାଇ ନେଇଥିଲେ। ୪୮ ଓଭରରେ ଭାରତ ୫ ୱିକେଟ୍ ବିନିମୟରେ ୨୪୮ ରନ୍ କରିଥିଲା। ପ୍ରିୟା ପୂନିଆ ୨୦, ଜେମିମା ରୋଦ୍ରିଗ୍ବେଜ ୧୮ ରନ୍ର ଅବଦାନ ଛାଡ଼ିଥିଲେ। ଦକ୍ଷିଣ ଆଫ୍ରିକା ପକ୍ଷରୁ ଖାଖା ୩ ୱିକେଟ୍ ନେଇ ସଫଳ ବୋଲର ରହିଥିଲେ।