ମହିଳା ରିଲେ ଦଳକୁ ଲଗାତାର ପଞ୍ଚମ ସ୍ୱର୍ଣ୍ଣ

ଏସିଆଡ଼୍‍ରେ ଭାରତୀୟ ମହିଳା ରିଲେ ଦଳର ଆଧିପତ୍ୟ ଅକ୍ଷୁଣ୍ଣ ରହିଛି। ଗୁରୁବାର ଭାରତ ଏହି ବର୍ଗରୁ ଲଗାତାର ପଞ୍ଚମ ସ୍ୱର୍ଣ୍ଣ ପଦକ ଜିତି ନେଇଛି। ହିମା ଦାସ, ଏମ୍‌ ଆର ପୁଭାମ୍ମା, ସରିତାବେନ୍‌ ଗାଏକ୍ୱାଡ୍‌ ଓ ବିସ୍ମୟ ଭେଲୁଭା କୋରଥଙ୍କୁ ନେଇ ଗଠିତ ଭାରତୀୟ ଦଳ ୩ ମିନିଟ୍‌ ୨୮.୭୨ ସେକେଣ୍ଡ ସମୟ ସହ ସ୍ୱର୍ଣ୍ଣ ପଦକ ହାସଲ କରି ନେଇଥିଲା। ବାହାରିନ୍‌ (୩:୩୦.୬୧) ଓ ଭିଏତନାମ (୩:୩୩.୨୩) ଯଥାକ୍ରମେ ରୌପ୍ୟ  ଏବଂ କାଂସ୍ୟ ପଦକ ପାଇଥିଲେ। ଭାରତ ୨୦୦୨ ଏସିଆଡ଼୍‍ ପରଠାରୁ ମହିଳା ରିଲେରେ ଲଗାତାର ସ୍ୱର୍ଣ୍ଣ ଜିତି ଆସୁଛି। ଭାରତୀୟ ପୁରୁଷ ମହିଳା ଦଳ ୪ ଗୁଣା ୪୦୦ ମିଟର ରିଲେରେ  ରୌପ୍ୟ ପଦକ ପାଇଥିଲା। କୁନୁ ମହମ୍ମଦ, ଧାରୁନ୍‌ ଆୟାସ୍ୱାମୀ, ମହମ୍ମଦ ଆନସ୍‌ ଓ ଆରୋକିଆ ରାଜୀବଙ୍କୁ ନେଇ ଗଠିତ ଭାରତୀୟ ଦଳ (୩:୦୧.୮୫) କାତାର (୩:୦୦.୫୬) ପଛକୁ ରହି ରୌପ୍ୟ ପଦକ ପାଇଥିଲା। ଜାପାନ  (୩:୦୧.୯୪) ଏହି ଇଭେଣ୍ଟର କାଂସ୍ୟ ପଦକ ପାଇଥିଲା। ୨୦୧୪ରେ ଭାରତ ପୁରୁଷ ୪ ଗୁଣା ୪୦୦ର ଚତୁର୍ଥ ସ୍ଥାନରେ ରହିଥିଲା।

ସମ୍ବନ୍ଧିତ ଖବର