ମହିଳା ହକି: ଆର୍ଜେଣ୍ଟିନାରେ ପୁଣି ହାରିଲା ଭାରତ
ବୁଏନସ ଏୟାର୍ସ : ଆର୍ଜେଣ୍ଟିନା ଗସ୍ତରେ ଥିବା ଭାରତୀୟ ମହିଳା ହକି ଦଳ ସେଠାକାର ବରିଷ୍ଠ ଦଳ ବିପକ୍ଷରେ ପୁଣି ହାରିଛି। ବିଶ୍ବ ମାନ୍ୟତାର ଦ୍ବିତୀୟ ସ୍ଥାନରେ ଥିବା ଆଜେଣ୍ଟିନା ବରିଷ୍ଠ ଦଳ ବିପକ୍ଷ ପ୍ରଥମ ମ୍ୟାଚ୍କୁ ୩-୨ରେ ହାରିଥିବା ଭାରତ ଶୁକ୍ରବାର ଏହି ଆୟୋଜକ ଦଳ ବିପକ୍ଷ ଦ୍ବିତୀୟ ମ୍ୟାଚ୍ରେ ୦-୨ ଗୋଲ୍ରେ ପରାସ୍ତ ହୋଇଛି।
Sambad is now on WhatsApp
Join and get latest news updates delivered to you via WhatsApp
ମ୍ୟାଚ୍ର ଦ୍ବିତୀୟ ମିନିଟ୍ରେ ସିଲ୍ଭିନା ଡି’ଏଲିଆଙ୍କ ପେନାଲ୍ଟି କର୍ଣ୍ଣର ଗୋଲ୍ ବଳରେ ଆୟୋଜକ ଦଳ ପ୍ରାରମ୍ଭିକ ଅଗ୍ରଣୀ ନେଇଥିଲା। ଆରମ୍ଭରୁ ଗୋଲ୍ ବରଣ କରିବା ପରେ ଭ୍ରମଣକାରୀ ଦଳର ମନୋବଳ କମିଯାଇଥିଲା। ତଥାପି ଭାରତୀୟ ଖେଳାଳି ଦ୍ବିତୀୟ ଓ ତୃତୀୟ କ୍ବାର୍ଟର୍ରେ ଆର୍ଜେଣ୍ଟିନାକୁ ଅଟକାଇବାରେ ସକ୍ଷମ ହୋଇଥିଲେ। ଚତୁର୍ଥ କ୍ବାର୍ଟର୍ରେ ଆର୍ଜେଣ୍ଟିନାକୁ ମିଳିଥିବା ପେନାଲ୍ଟି କର୍ଣ୍ଣରକୁ ଅଗୁଷ୍ଟିନା ଅଲ୍ବର୍ଟାରିଓ (୫୪ ମିନିଟ୍) ଗୋଲ୍ରେ ପରିଣତ କରି ଦଳକୁ ୨-୦ରେ ବିଜୟ ଭେଟି ଦେଇଥିଲେ। ପୂର୍ବରୁ ଏହି ଗସ୍ତରେ କନିଷ୍ଠ ଦଳ ବିପକ୍ଷରେ ଖେଳିଥିବା ପ୍ରଥମ ଦୁଇ ମ୍ୟାଚ୍ ଅମୀମାଂସିତ ରଖିବା ପରେ ଭାରତୀୟ ବରିଷ୍ଠ ମହିଳା ଦଳ ଆର୍ଜେଣ୍ଟିନା ବି’ ବିପକ୍ଷ ଦୁଇଟି ମ୍ୟାଚ୍ ହାରିଯାଇଥିଲା।