ରୋକ୍ଲା (ପୋଲାଣ୍ଡ): ଏଠାରେ ଚାଲିଥିବା ବିଶ୍ବ ତୀରନ୍ଦାଜି ଯୁବ ପ୍ରତିଯୋଗିତାରେ ଭାରତ ଶନିବାର ମହିଳା କମ୍ପାଉଣ୍ଡ୍ କ୍ୟାଡେଟ୍, କମ୍ପାଉଣ୍ଡ କ୍ୟାଡେଟ୍ ମିଶ୍ରିତ ଏବଂ ପୁରୁଷ ଦଳଗତ ଇଭେଣ୍ଟରେ ସ୍ବର୍ଣ୍ଣ ପଦକ କରାୟତ୍ତ କରିଛି। ଏହା ବ୍ୟତୀତ ଶନିବାର ମଧ୍ୟ ଭାରତକୁ ଗୋଟିଏ ଲେଖାଏଁ ରୌପ୍ୟ ଓ କାଂସ୍ୟ ପଦକ ମିଳିଛି। କମ୍ପାଉଣ୍ଡ କ୍ୟାଡେଟ୍ ମିଶ୍ରିତ ଦଳ ଇଭେଣ୍ଟ ଫାଇନାଲ୍ରେ ପ୍ରିୟା ଗୁର୍ଜାର ଓ କୌଶଲ ଦଲାଲ ଯୋଡ଼ି ଆମେରିକାକୁ ୧୫୫-୧୫୨ ପଏଣ୍ଟ ବ୍ୟବଧାନରେ ପରାସ୍ତ କରିଥିଲା। ତେବେ ପରେ ପ୍ରିୟା ଶନିବାର ନିଜର ତୃତୀୟ ସ୍ବର୍ଣ୍ଣ ପଦକରୁ ବଞ୍ଚିତ ରହିଥିଲେ। ମହିଳା କ୍ୟାଡେଟ୍ ବ୍ୟକ୍ତିଗତ ଇଭେଣ୍ଟ ଫାଇନାଲ୍ରେ ସେ ମେକ୍ସିକୋ ପ୍ରତିଦ୍ବନ୍ଦ୍ବୀଙ୍କ ନିକଟରୁ ୧୩୬-୧୩୯ ପଏଣ୍ଟରେ ହାରିଯାଇ ରୌପ୍ୟ ପଦକରେ ସନ୍ତୁଷ୍ଟ ରହିଥିଲେ। ମହିଳା କମ୍ପାଉଣ୍ଡ କ୍ୟାଡେଟ୍ରେ ବ୍ରିଟେନ୍ ପ୍ରତିଦ୍ବନ୍ଦ୍ବୀଙ୍କୁ ୧୪୦-୧୩୫ରେ ପରାସ୍ତ କରି ପ୍ରଣୀତ କୌର କାଂସ୍ୟ ପଦକ ହାସଲ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ସେହିପରି ସାହିଲ େଚୗଧୁରୀ, ମିହିର ନିତିନ ଅପର ଓ କୌଶଲ ଦଲାଲଙ୍କୁ ନେଇ ଗଠିତ ଭାରତୀୟ କମ୍ପାଉଣ୍ଡ କ୍ୟାଡେଟ୍ ପୁରୁଷ ଦଳ ଫାଇନାଲ୍ରେ ଆମେରିକାକୁ ୨୩୩-୨୩୧ ପଏଣ୍ଟରେ ପରାସ୍ତ କରି ସ୍ବର୍ଣ୍ଣ ପଦକ ହାସଲ କରିନେଇଥିଲା। ଏହା ପୂର୍ବରୁ ଶନିବାର ମହିଳା କମ୍ପାଉଣ୍ଡ୍ କ୍ୟାଡେଟ୍ର ଉତ୍କଣ୍ଠାପୂର୍ଣ୍ଣ ଫାଇନାଲ୍ରେ ଭାରତ ୨୨୮-୨୧୬ ପଏଣ୍ଟ ବ୍ୟବଧାନରେ ତୁର୍କିକୁ ପରାସ୍ତ କରି ସ୍ବର୍ଣ୍ଣିମ ସଫଳତା ହାତେଇଛି। ପ୍ରଣୀତ କୌର, ପ୍ରିୟା ଗୁର୍ଜାର ଓ ରିଦ୍ଧି ବର୍ଷିନୀଙ୍କୁ ନେଇ ଗଠିତ ଭାରତୀୟ ଦଳ ଆଧିପତ୍ୟଭରା ପ୍ରଦର୍ଶନ ଜରିଆରେ ପ୍ରତିପକ୍ଷ ତୁର୍କିକୁ ପଛରେ ପକାଇ ଦେଇଥିଲେ। ଏହା ପୂର୍ବରୁ ଗତ ୧୦ ତାରିଖରେ ଭାରତର କମ୍ପାଉଣ୍ଡ ବାଳିକା ଓ ମିଶ୍ରିତ ଦଳ (୧୮ ବର୍ଷରୁ କମ୍) ଚଳିତ ପ୍ରତିଯୋଗିତାର ଯୋଗ୍ୟତାପର୍ଯ୍ୟାୟରେ ଦୁଇଟି ବିଶ୍ବ କୀର୍ତ୍ତିମାନ ପ୍ରତିଷ୍ଠା କରିଥିଲେ। ପ୍ରିୟା-ପ୍ରଣୀତ-ରିଧୁ ସେନ୍ଥିଲକୁମାର ମିଳିତ ଭାବେ ୨୦୬୭/୨୧୬୦ ପଏଣ୍ଟ ହାସଲ କରି ମହିଳା ଦଳର ପୂର୍ବ ବିଶ୍ବ କୀତ୍ତିମାନକୁ ୨୨ ପଏଣ୍ଟ ବ୍ୟବଧାନରେ ପଛରେ ପକାଇଦେଇଥିଲେ। ପୂର୍ବ ବିଶ୍ବ କୀର୍ତ୍ତିମାନ (୨୦୪୫/୨୧୬୦) ଆମେରିକା ଦ୍ବାରା ପ୍ରତିଷ୍ଠା ହୋଇଥିଲା।