ବିଶ୍ବ ପାରା ବ୍ୟାଡ୍ମିଣ୍ଟନ: ଏକକ ଓ ଯୁଗଳ ଫାଇନାଲ୍ରେ ପ୍ରମୋଦ
ଭୁବନେଶ୍ବର : ଭାରତୀୟ ଦଳରୁ ପ୍ରତିନିଧିତ୍ବ କରୁଥିବା ଓଡ଼ିଶାର ପ୍ରମୋଦ ଭଗତ ଟୋକିଓରେ ଚାଲିଥିବା ପାରା ବ୍ୟାଡ୍ମିଣ୍ଟନ୍ ବିଶ୍ବ ଚାମ୍ପିଅନ୍ସିପ୍ର ଉଭୟ ପୁରୁଷ ଏକକ ଓ ଯୁଗଳ ବର୍ଗ ଫାଇନାଲ୍ରେ ସ୍ଥାନ ସୁରକ୍ଷିତ କରିନେଇଛନ୍ତି। ଶନିବାର ଏକକ ବର୍ଗ ସେମିଫାଇନାଲ୍ରେ ପ୍ରମୋଦ ସିଧାସଳଖ ୨୨-୨୦ ଓ ୨୧-୧୪ ଗେମ୍ରେ ଜାପାନର ଦାଇସୁକେ ଫୁଜିହାରାଙ୍କୁ ପରାସ୍ତ କରିଥିଲା ବେଳେ ଯୁଗଳ ସେମିଫାଇନାଲ୍ରେ ପ୍ରମୋଦ ଓ ତାଙ୍କ ସାଥୀ ମନୋଜ ସର୍କାର ୨୧-୮ ଓ ୨୧-୧୬ ସିଧାସଳଖ ଗେମ୍ରେ ଫ୍ରାନ୍ସ ଯୋଡ଼ି ଗୁଇଲାଉମେ ଗାଇଲି ଓ ମାଥ୍ୟୁ ଥୋମାସଙ୍କୁ ପରାସ୍ତ କରି ସ୍ବର୍ଣ୍ଣ ପଦକ ମୁକାବିଲାରେ ଅବତୀର୍ଣ୍ଣ ହୋଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ରବିବାର ଉଭୟ ବର୍ଗର ଫାଇନାଲ୍ ଖେଳାଯିବ। ଏକକ ଫାଇନାଲ୍ରେ ପ୍ରମୋଦ ନିଜ ଦେଶର ନୀତେଶ କୁମାରଙ୍କୁ ଏବଂ ଯୁଗଳ ଫାଇନାଲ୍ରେ ଇଣ୍ଡୋନେସିଆର ରାମଦାନି-ଉକୁନ ରୁଙ୍କାଣ୍ଡି ଯୋଡ଼ିକୁ ଭେଟିବେ। ଯଦି ଫାଇନାଲ୍ ଜିତିନିଅନ୍ତି ତାହାଲେ ପ୍ରମୋଦ ପୁଣି ଥରେ ଇତିହାସ ରଚିବେ। ପ୍ରମୋଦ ତାଙ୍କ କ୍ୟାରିୟରରେ ଚଳିତ ପ୍ରତିଯୋଗିତା ପୂର୍ବରୁ ମୋଟ ୭ ବିଶ୍ୱ ଚାମ୍ପିଅନସିପ୍ରୁ ୬ଟିରେ ଅଂଶଗ୍ରହଣ କରିସାରିଛନ୍ତି। ସେଥରୁ ଏକକ ଓ ଯୁଗଳରେ ୫ ସ୍ୱର୍ଣ୍ଣ, ୧ ରୋପ୍ୟ ଓ ୩ କାଂସ୍ୟ ପଦକ ଜିତିଛନ୍ତି। ଏପରିକି ୨୦୦୭ ଓ ୨୦୧୭ ବିଶ୍ୱ ଚାମ୍ପିଅନସିପ୍କୁ ଛାଡିଦେଲେ ପ୍ରମୋଦ ଅନ୍ୟ ସବୁ ସଂସ୍କରଣର ଫାଇନାଲରେ ପହଞ୍ଚିଥିଲେ।