କୁସ୍ତିଯୁଦ୍ଧ ମ୍ୟାଚ୍ ହାରିଯିବା ପରେ ମାନସିକ ଭାରସାମ୍ୟ ହରାଇ ଆତ୍ମହତ୍ୟା କଲେ ବବିତା ଫୋବଟ୍ଙ୍କ ଭଉଣୀ ରିତୀକା
ଜୟପୁର: ଖେଳ ଜଗତରୁ ଏକ ହୃଦୟ ବିଦାରକ ଖବର ଆସିଛି । କୁସ୍ତିଯୁଦ୍ଧର ଫାଇନାଲ ମ୍ୟାଚ ହାରିବା ପରେ ଭାରତୀୟ ମହିଳା କୁସ୍ତିଯୋଦ୍ଧା ରିତୀକା (ରିତୀକା ବବିତା ଫୋଗଟ ଓ ରୀତା ଫୋଗଟଙ୍କର ଭଉଣୀ) ଆତ୍ମହତ୍ୟା କରିଛନ୍ତି । ସେ ସୋମବାର ଦିନ ନିଜ ଗାଁ ବଲାଲୀଠାରେ ଗଳାରେ ନିଜ ଓଢ଼ଣୀ ଲଗାଇ ଆତ୍ମହତ୍ୟା କରିଥିବା ସୂଚନା ମିଳିଛି ।
ଗଣମାଧ୍ୟମର ସୂଚନା ମୁତାବକ କୁସ୍ତିଯୋଦ୍ଧା ରିତୀକା ୧୨ ରୁ ୧୪ ମାର୍ଚ ମଧ୍ୟରେ ରାଜସ୍ଥାନର ଭରତପୁର ଲୋହାଗଡ଼ ଷ୍ଟାଡିୟମରେ ଅନୁଷ୍ଠିତ ହୋଇଥିବା ରାଜ୍ୟସ୍ତରୀୟ ସବ୍ ଜୁନିୟର ମହିଳା ଓ ପୁରୁଷ କୁସ୍ତି ଟୁର୍ଣ୍ଣାମେଣ୍ଟରେ ଭାଗ ନେଇଥିଲେ । ଏହି ଟୁର୍ଣ୍ଣାମେଣ୍ଟର ଫାଇନାଲ ମ୍ୟାଚ୍ ମାର୍ଚ ୧୪ ତାରିଖରେ ଖେଳା ଯାଇଥିଲା । ଯେଉଁଥିରେ ରିତୀକା ଗୋଟିଏ ଅଙ୍କ ପଛରେ ରହି ମ୍ୟାଚ୍ ହାରି ଯାଇଥିଲେ । ମ୍ୟାଚ୍ ହାରିବା ପରେ ସେ ମାନସିକ ଦୁଶ୍ଚିନ୍ତାରେ ରହିଥିଲେ । ଏନେଇ ସେ ୧୫ ତାରିଖ ଦିନ ରାତି ୧୧ ଟାରେ ନିଜ ଗାଁ ବଲାଲୀଠାରେ ଥିବା ବାସଭବନରେ ବେକରେ ନିଜ ଓଢ଼ଣୀ ବାନ୍ଧି ଆତ୍ମହତ୍ୟା କରିଛନ୍ତି ।
ରାଜସ୍ଥାନ ଝୁନଝୁନ ଜିଲ୍ଲାସ୍ଥିତ ଜେତପୁରରେ ରହୁଥିବା ୧୭ ବର୍ଷୀୟା ରିତୀକା ନିଜ ସଂପର୍କୀୟ ତଥା ଦ୍ରୋଣାଚାର୍ଯ୍ୟ ପୁରସ୍କାର ବିଜେତା କୁସ୍ତିଯୋଦ୍ଧା ମହାବୀରଙ୍କ ଗାଁ ବଲାଲୀସ୍ଥିତ କୁସ୍ତି ଏକାଡେମୀରେ ୫ ବର୍ଷ ହେବ ଅଭ୍ୟାସ ଜାରି ରଖିଥିଲେ । ହେଲେ ୫୫ କିଲୋଗ୍ରାମ ବର୍ଗରେ ଗୋଟିଏ ଅଙ୍କ ପଛରେ ରହି ମ୍ୟାଚ୍ ହାରିବା ପରେ ସେ ମାନସିକ ଭାରସାମ୍ୟ ହରାଇ ଏଭଳି କଠୋର ପଦକ୍ଷେପ ନେଇଥିବା କଥା ତାଙ୍କ ପରିବାର ଲୋକେ କହିଛନ୍ତି । ଏହା ପୂର୍ବରୁ ରିତୀକା ୪ ଥର ରାଜ୍ୟସ୍ତରୀୟ ପ୍ରତିଯୋଗିତାରେ ଭାଗ ନେଇ ସାରିଥିଲେ ।
