ରହିବାକୁ ଘର ନ ଥିଲା କି ପେଟ ପୂରା ଖାଦ୍ୟ ମିଳୁ ନଥିଲା, ତଥାପି ସେ ହେଲେ ପ୍ରଥମ ଶ୍ରେଣୀ କ୍ରିକେଟରେ ଦ୍ବିଶତକ ମାରିଥିବା ସର୍ବକନିଷ୍ଠ ବ୍ୟାଟସମ୍ୟାନ
ନୂଆଦିଲ୍ଲୀ : ମୁମ୍ବାଇର ୧୭ବର୍ଷୀୟ ଓପନର ଯଶ୍ୱସୀ ଜୈଶଓ୍ଵାଲ ଏବେ ଚର୍ଚ୍ଚାରେ । ୧୯ ବର୍ଷରୁ କମ୍ ଭାରତୀୟ କ୍ରିକେଟ ଦଳକୁ ପ୍ରତିନିଧିତ୍ବ କରିଥିବା ୧୭ ବର୍ଷିଅ ଜୈଶୱାଲ୍ ବିଜୟ ହଜାରେ ଟ୍ରଫିରେ ୧୫୪ ବଲରେ ୨୦୩ ରନ୍ କରି ନିଜ ନାମରେ ଏକ ନୂତନ ରେକର୍ଡ କରିଛନ୍ତି । ସେ ସର୍ବକନିଷ୍ଠ ଭାରତୀୟ ଖେଳାଳି ଭାବେ ପ୍ରଥମ ଶ୍ରେଣୀ କ୍ରିକେଟରେ ଦ୍ବିଶତକ ହାସଲ କରିଛନ୍ତି। ତେବେ ଏହି ସଫଳତା ଲାଗି ବହୁ ସଂଘର୍ଷ କରିବାକୁ ପଡ଼ିଛି ତାଙ୍କୁ।
Sambad is now on WhatsApp
Join and get latest news updates delivered to you via WhatsApp
୩ ବର୍ଷ ପର୍ଯ୍ୟନ୍ତ ମୁମ୍ବାଇରେ ଅନେକ ସଂଘର୍ଷ କରିବା ପରେ ତାଙ୍କ ସଫଳତାର ଯାତ୍ରା ଆରମ୍ଭ ହୋଇଥିଲା । ରହିବା ପାଇଁ ଘର ନ ଥିବା ସହ ଖାଇବା ପାଇଁ ପାଖରେ ଟଙ୍କା ନଥିଲା । ଗଛ ତଳେ ଓ ବିଭିନ୍ନ ଆଶ୍ରୟସ୍ଥଳୀରେ ରହିବା ସହ ଛୋଟମୋଟ କାମ କରି ସେ ନିଜର ପେଟ ପୋଷୁ ଥିଲେ । କିନ୍ତୁ ଆଜି ସେ ଦେଖି ଆସୁଥିବା ସ୍ୱପ୍ନ ପୂରଣ ହୋଇଛି । ୬ବର୍ଷ ତଳେ ସେ ଉତ୍ତରପ୍ରଦେଶର ଭଦୋହିରୁ ଜଣେ ଭଲ କ୍ରିକେଟର ହେବାର ସ୍ୱପ୍ନ ନେଇ ଆସିଥିବା ବେଳେ ଆଜି ତାଙ୍କର ସ୍ୱପ୍ନ ସାକାର ହୋଇଛି । ତେବେ କିଭଳି ଯଶ୍ୱସୀ ସବୁ ପରିସ୍ଥିତିର ସାମ୍ନା କରି ଆଗକୁ ବଢ଼ିଥିଲେ ଏବଂ କିଭଳି ତାଙ୍କ ସଫଳତାର ଯାତ୍ରା ଆରମ୍ଭ ହୋଇଥିଲା ଆସନ୍ତୁ ଜାଣିବା ।
୬ବର୍ଷ ତଳେ ତାଙ୍କୁ ୧୧ବର୍ଷ ହୋଇଥିବା ବେଳେ ସେ ନିଜ ଗାଁ ଭଦୋହିରୁ ବାହାରି ମୁମ୍ବାଇରେ ପହଞ୍ଚିଥିଲେ । ଉଚ୍ଚ ସ୍ତରରେ କ୍ରିକେଟ ଖେଳିବାର ଲକ୍ଷ୍ୟ ନେଇ ସେ ମୁମ୍ବାଇରେ ନିଜର ଯାତ୍ରା ଆରମ୍ଭ କରିଥିଲେ । କିନ୍ତୁ ମୁମ୍ବାଇରେ ରହିବା ପାଇଁ ଘର ଖୋଜିବା ତାଙ୍କ ପାଇଁ କାଠିକର ପାଠ ହୋଇ ପଡ଼ିଥିଲା । ପ୍ରଥମେ ସେ କଲ୍ବାଦେବୀରେ ଥିବା ଗୋଶାଳାରେ ରହିବା ଆରମ୍ଭ କରିଥିଲେ । କିନ୍ତୁ ସେଠାରେ ସେ ଅଧିକ ସାହାଯ୍ୟ ନ କରି ପାରିବାରୁ ତାଙ୍କୁ ବାହାର କରି ଦିଆଯାଇଥିଲା । ଯାହା ପରେ ଯଶ୍ୱସୀଙ୍କ ମାତା-ପିତା ନିଜର ଜଣେ ସଂପର୍କୀୟଙ୍କ ଘରେ ତାଙ୍କୁ ରହିବାକୁ କହିଥିଲେ । କିନ୍ତୁ ସେଠାରେ ମଧ୍ୟ ସେ ବେଶି ଦିନ ରହି ପାରି ନଥିଲେ । ଯଶ୍ୱସୀଙ୍କ ସଂପର୍କୀୟ ତାଙ୍କୁ ମୁସ୍ଲିମ୍ ୟୁନାଇଟେଡ୍ କ୍ଲବ୍କୁ ପଠାଇ ଦେଇଥିଲେ । ଯେଉଁଠି ଯଶ୍ୱସୀ ଆଗାମୀ ୩ବର୍ଷ ପର୍ଯ୍ୟନ୍ତ ଏକ ଟେଣ୍ଟରେ ରହିଥିଲେ ।
ଖରା,ବର୍ଷା ଓ ଶୀତ ସବୁକୁ ସହି ସେ ନିଜର ସ୍ୱପ୍ନ ପୂରା କରିବାର ଚେଷ୍ଟା ଆରମ୍ଭ କରିଥିଲେ । ଖାଇବା ପାଇଁ ଟଙ୍କା ନଥିବାରୁ ସେ ରାମଲୀଲାରେ ଗୁପ୍ ଚୁପ୍ ବିକିବା ସହ ରୁଟି ତିଆରି କରିବା ଓ ଫଳ ବିକିବା ଭଳି କାମ କରିବା ଆରମ୍ଭ କରିଥିଲେ । ଏହା ପରେ ତାଙ୍କ ଜୀବନ ଏକ ନୂଆ ମୋଡ଼ ନେଇଥିଲା । ଡିସେମ୍ବର ୨୦୧୩ରେ ମୁମ୍ବାଇର ଆଜାଦ ମଇଦାନରେ ତାଙ୍କୁ ଦେଖିଥିଲେ ପୂର୍ବତନ ମୁମ୍ବାଇ କ୍ରିକେଟର ଓ ବର୍ତ୍ତମାନ କୋଚ୍ ଥିବା ଜ୍ୱାଲା ସିଂହ । ଯଶ୍ୱସୀଙ୍କ ଷ୍ଟ୍ରୋକ୍ପ୍ଲେ ଦେଖି ପ୍ରଭାବିତ ହେବା ସହ ତାଙ୍କୁ ଦେଖା କରିବା ପାଇଁ ଜ୍ୱାଲା ସିଂହ ଡ଼କାଇଥିଲେ । କିଛି ସମୟ କଥାବାର୍ତ୍ତ ହେବା ପରେ ଯଶ୍ୱସୀଙ୍କ ଜୀବନ କାହାଣୀ ଭିତରେ ସେ ନିଜକୁ ଖୋଜି ପାଇଥିଲେ । କାରଣ ୧୯୯୫ରେ ଜ୍ୱାଲା ସିଂହ ମଧ୍ୟ ଉତ୍ତରପ୍ରଦେଶର ଗୋରଖପୁରରୁ ମୁମ୍ବାଇ ଆସିଥିଲେ । ଯଶ୍ୱସୀଙ୍କ କାହାଣୀ ଶୁଣି ସେ ତାଙ୍କୁ ନିଜ ପାଖରେ ରଖିବା ସହ କ୍ରିକେଟ ଟ୍ରେନିଂ ଦେବା ଆରମ୍ଭ କରିଥିଲେ । ଆଜି ପର୍ଯ୍ୟନ୍ତ ଯଶ୍ୱସୀ ତାଙ୍କ ସହ ରହୁଥିବା ବେଳେ ଆଜି ସେ ୨୦୦ଶତକ ବନାଇ ଜ୍ୱାଲାଙ୍କ ନାଁ ଉଜ୍ୱଳ କରିଛନ୍ତି ।