ଶ୍ରୀଜଗନ୍ନାଥ କେବଳ ଓଡ଼ିଶାର ନୁହନ୍ତି; ଭାରତର ସମନ୍ବୟୀ ଚେତନା
ନୂଆଦିଲ୍ଲୀ: ଶ୍ରୀଜଗନ୍ନାଥ କେବଳ ଓଡ଼ିଶାର ପରିଚିତି ନୁହନ୍ତି, ସେ ଭାରତବର୍ଷର ସବୁଧର୍ମ, ସବୁ ମତବାଦରେ ସ୍ବୀକୃତ ପରଂବ୍ରହ୍ମ ଏବଂ ମାନବୀୟଲୀଳା କରିବା ପାଇଁ ସେ ଦାରୁରୂପରେ ଆବିର୍ଭୂତ ହୋଇଛନ୍ତି ବୋଲି ‘ଆଜ୍ତକ୍’ ପକ୍ଷରୁ ଏଠାରେ ଆୟୋଜିତ ସାହିତ୍ୟୋତ୍ସବରେ ଆଲୋଚକମାନେ ମତ ପ୍ରକାଶ କରିଛନ୍ତି।‘ସାହିତ୍ୟ-ଆଜ୍ତକ୍’ ଶୀର୍ଷକ ଏହି ତିନିଦିନିଆ ସାହିତ୍ୟୋତ୍ସବର ‘ହଲ୍ଲାବୋଲ୍’ ମଞ୍ଚରେ ‘ଟିଭି ଟୁଡେ’ ନେଟ୍ୱାର୍କର ସଂପାଦକୀୟ ବିଭାଗ ସଂପାଦକ ମନୋଜ୍ଞା ଲୋୟିୱାଲ୍ଙ୍କ ସଂଯୋଜନାରେ ଏହି ଆଲୋଚନାଚକ୍ର ଆୟୋଜିତ ହୋଇଥିଲା। ଆଲୋଚ୍ୟ ବିଷୟ ଥିଲା ‘ଶ୍ରୀଜଗନ୍ନାଥଙ୍କ କାହାଣୀ ଓ କିମ୍ବଦନ୍ତୀ: ଓଡ଼ିଆ ସାହିତ୍ୟର ଉତ୍ସବ’। ଏଥିରେ ଆଲୋଚକ ଭାବେ ଡକ୍ଟର ସୁବାସ ପାଣି, ଗବେଷକ ଅସିତ ମହାନ୍ତି ଓ କଥାଶିଳ୍ପୀ ପାରମିତା ଶତପଥୀ ଯୋଗ ଦେଇଥିଲେ। ‘ଓଡ଼ିଶାକୁ ରସଗୋଲାର ମିଠା ଅନୁଭୂତି ଦେଇଥିବା ବ୍ୟକ୍ତି ଭାବେ ପରିଚିତ କରି ସଂଯୋଜିକା ଶ୍ରୀ ମହାନ୍ତିଙ୍କଠାରୁ ଆଲୋଚନା ଆରମ୍ଭ କରିଥିଲେ। ଶ୍ରୀ ମହାନ୍ତି ଶ୍ରୀଜଗନ୍ନାଥଙ୍କୁ ଶୈବ, ବୌଦ୍ଧ, ନୈୟାୟିକ ଓ ମୀମାଂସକମାନଙ୍କ ଦ୍ବାରା ସ୍ବୀକୃତ ତ୍ରୈଲୋକ୍ୟନାଥ ବୋଲି ଶାସ୍ତ୍ରମତ ଆଧାରରେ ଅଭିହିତ କରିଥିଲେ। ଏବଂ ସେ କିପରି ଏ ସମଗ୍ର ସୃଷ୍ଟିରେ ବାଞ୍ଛିତ ଫଳଦାୟକ ତାହା ଉପସ୍ଥାପିତ କରିଥିଲେ। ‘ସ୍କନ୍ଦ ପୁରାଣ’ ଅନୁସାରେ, ମାନବୀୟ ଲୀଳା କରିବା ପାଇଁ ସେ ଦାରୁରୂପରେ ଆର୍ବିଭୂତ ହୋଇଛନ୍ତି ବୋଲି ଦର୍ଶାଇ, ଏହି ମାନବୀୟ ଲୀଳାରେ ସେ ସତ୍ୟଯୁଗର କାଶ୍ୟପ-ଅଦିତି, ତ୍ରେତାଯୁଗର ଦଶରଥ-କୌଶଲ୍ୟା, ଦ୍ବାପରଯୁଗର ବସୁଦେବ-ଦେବକୀ ଓ ଇନ୍ଦ୍ରଦ୍ୟୁମ୍ନ-ଗୁଣ୍ଡିଚାଙ୍କୁ ପିତା ଓ ମାତା ରୂପେ ଶ୍ରାଦ୍ଧ ଦିଅନ୍ତି ବୋଲି କହିଥିଲେ। ଶ୍ରୀଜଗନ୍ନାଥଙ୍କ ନବକଳେବର ମଧ୍ୟ ଏହି ମାନବୀୟ ଲୀଳାର ଏକ ବ୍ୟଞ୍ଜନାତ୍ମକ ପରିପ୍ରକାଶ ବୋଲି ସେ କହିଥିଲେ।
Sambad is now on WhatsApp
Join and get latest news updates delivered to you via WhatsApp
ଡ. ସୁବାସ ପାଣି ଶ୍ରୀଜଗନ୍ନାଥଙ୍କ ଇତିହାସ ଓ କିମ୍ବଦନ୍ତୀ ସଂପର୍କରେ ସଂକ୍ଷିପ୍ତ ଆଲୋକପାତ କରି ଦିବ୍ୟଦାରୁ ଉପରେ ତାଙ୍କର ଆବିର୍ଭାବ ଠାରୁ ଆରମ୍ଭ କରି ଜଗନ୍ନାଥ-ବଳଭଦ୍ର ଦୁଇଭାଇ କିପରି ଏ ଜାତି ତଥା ଏ ଜାତିର ଗଜପତି ରାଜାଙ୍କ ସମ୍ମାନ ପାଇଁ କଳା ଓ ଧଳା ଘୋଡ଼ାରେ ଚଢ଼ି ଯୁଦ୍ଧଯାତ୍ରା କରନ୍ତି ସେ ସଂପର୍କରେ ଉପସ୍ଥିତ ଶ୍ରୋତା ଓ ଦର୍ଶକଙ୍କୁ ସୂଚାଇଥିଲେ। ସାହିତ୍ୟିକା ପାରମିତା ଶତପଥୀ ବଳରାମ ଦାସଙ୍କ ‘ଲକ୍ଷ୍ମୀପୂରାଣ’ କିପରି ସମାଜର ନିମ୍ନବର୍ଗ ଓ ଉଚ୍ଚବର୍ଗ ମଧ୍ୟରେ ସମନ୍ବୟ ଏବଂ ତାହା କିପରି ଆଧୁନିକ ପରିଭାଷାରେ ନାରୀ-ଅସ୍ମିତାର ଦ୍ୟୋତକ ତାହା ସୂଚାଇଥିଲେ। ଏହି ଆଲୋଚନା ପର୍ଯ୍ୟାୟରେ ଶ୍ରୀଜଗନ୍ନାଥଙ୍କୁ ନେଇ ଓଡ଼ିଆରେ ରଚିତ ବିପୁଳ ସାହିତ୍ୟର ପ୍ରସଙ୍ଗ ମଧ୍ୟ ଉପସ୍ଥାପିତ ହୋଇଥିଲା ଏବଂ ଓଡ଼ିଶାର ଐତିହ୍ୟ ଓ ସଂସ୍କୃତି ସଂପର୍କିତ ପୁସ୍ତକ ହିନ୍ଦୀ ଓ ଅନ୍ୟାନ୍ୟ ଭାରତୀୟ ଭାଷାରେ ଅଧିକରୁ ଅଧିକ ପ୍ରକାଶିତ ହେବାର ଆବଶ୍ୟକତା ରହିଛି ବୋଲି ମତ ପ୍ରକାଶ ପାଇଥିଲା।