ପୁରୀ: ମହାପ୍ରଭୁଙ୍କ ପ୍ରତି ଭକ୍ତିଭାବର ପୁଣିଥରେ ଅନନ୍ୟ ଉଦାହରଣ ଦେଇଛନ୍ତି ଭକ୍ତ। ପୁରୀ ଶ୍ରୀମନ୍ଦିର ହୁଣ୍ଡିରୁ ଆଜି ମିଳିଛି ୧ କେଜି ୮୦୦ ମିଲିଗ୍ରାମ ଓଜନର ସୁନା। କେହି ଭକ୍ତ ଶ୍ରୀମନ୍ଦିର ନାଟମଣ୍ଡପ ହୁଣ୍ଡିରେ ଏହି ସୁନା ପକାଇଛନ୍ତି। ଯାହାର ଆନୁମାନିକ ମୂଲ୍ୟ ପ୍ରାୟ ୭୦ଲକ୍ଷ ଟଙ୍କା। କିନ୍ତୁ ଏହା ଅଳଙ୍କାର ଆକାରରେ ପଡ଼ିଛି କି ସୁନା ଖଣ୍ଡ ହିସାବରେ ପଡ଼ିଛି, ତାହା ସ୍ପଷ୍ଟ କରିବାକୁ ଶ୍ରୀମନ୍ଦିର ପ୍ରଶାସନ ମନା କରି ଦେଇଛନ୍ତି। ପ୍ରତିଦିନ ଭଳି ଆଜି ଅପରାହ୍ନରେ ଶ୍ରୀମନ୍ଦିର ନାଟମଣ୍ଡପ ହୁଣ୍ଡି ଗଣତି ପରେ ଏଥିରୁ ୧କେଜି ୮୦୦ ମିଲିଗ୍ରାମ ସୁନା ମିଳିଥିଲା। ସେହିଭଳି ୬ଲକ୍ଷ ୨୮ହଜାର ୨୩୭ ଟଙ୍କା ଓ ୧ ଗ୍ରାମ ୨ଶହ ମିଲିଗ୍ରାମ ରୁପା ହୁଣ୍ଡିରୁ ମିଳିଥିଲା। ଏତେ ପରିମାଣର ସୁନା ମିଳିବା ଚର୍ଚ୍ଚାର ବିଷୟ ପାଲଟିଛି। ନିକଟ ଅତୀତରେ ବି ଏତେ ପରିମାଣର ସୁନା ହୁଣ୍ଡିରୁ କେବେ ମିଳିନି।

Advertisment

ସୂଚନାଯୋଗ୍ୟ ଯେ ୨୦୨୩ ନଭେମ୍ବର ୧୮ ତାରିଖରେ ଶ୍ରୀମନ୍ଦିର ହୁଣ୍ଡିରୁ ୨୨ ଲକ୍ଷ ୩୪ହଜାର ୫୨୮ ଟଙ୍କା ମିଳିଛି। ଯାହା ଦ୍ବିତୀୟ ସର୍ବାଧିକ ରେକର୍ଡ ବୋଲି ଶୁଣିବାକୁ ମିଳିଥିଲା। ଗଣତି ବେଳେ ବହୁ ୫ଶହ ଟଙ୍କିଆ ବଣ୍ଡଲ୍‌ ମିଳିଥିଲା। ଏଥିସହ ୫.୬୦୦ ଗ୍ରାମ ସୁନା ଓ ୨୩୬.୭୦୦ ଗ୍ରାମ ରୁପା ମିଳିଥିଲା। ସେହିଭଳି ୨୦୨୧ ନଭେମ୍ବର ୧୨ ତାରିଖ ପବିତ୍ର ଅଁଳା ନବମୀରେ ଶ୍ରୀମନ୍ଦିର ନାଟମଣ୍ଡପ ଦାନହୁଣ୍ଡିରୁ ରେକର୍ଡ଼ ପରିମାଣ ଟଙ୍କା ମିଳିଥିଲା। ଦିନକରେ ୨୮ ଲକ୍ଷ ୧୦ହଜାର ୬୯୧ ଟଙ୍କା ସହ ୫୫୦ ମିଲିଗ୍ରାମ ସୁନା ଓ ୬୧.୭୦୦ ଗ୍ରାମ ରୁପା ଦାନ ମିଳିଥିଲା। କୋଭିଡ୍‌ ଭିତରେ ଏତେ ପରିମାଣର ଟଙ୍କା ଶ୍ରୀମନ୍ଦିର ହୁଣ୍ଡିରୁ ମିଳିବା ସେ ସମୟରେ ଚର୍ଚ୍ଚାର ବିଷୟ ପାଲଟିଥିଲା।