୧ କ୍ବିଣ୍ଟାଲ ଗଞ୍ଜେଇ ସହ ୨ ବାଇକ୍ ଜବତ, ମାଫିଆ ଫେରାର

କଣ୍ଟାମାଳ : କଣ୍ଟାମାଳ ଥାନା ଖଲିଆପାଲି ହାଇସ୍କୁଲ ପଡ଼ିଆ ନିକଟରେ ବୁଧବାର ପୁଲିସ ଚଢ଼ଉ କରି ୧ କ୍ବିଣ୍ଟାଲ ଗଞ୍ଜେଇ ସହ ୨ଟି ବାଇକ୍ ଜବତ କରିଥିବା ବେଳେ ଚାଲାଣକାରୀ ମାଫିଆମାନେ ଫେରାର ହୋଇଯାଇଥିବା ଜଣାପଡ଼ିଛି।

ସୂଚନାନୁସାରେ ଆଜି ସନ୍ଧ୍ୟାରେ ଲମ୍ବସରୀ ରାସ୍ତାରେ କଣ୍ଟାମାଳ ଆଡ଼କୁ ଦୁଇଟି ବାଇକରେ ୪ ଜଣ ଗଞ୍ଜେଇ ଚାଲାଣକାରୀ ୧ କୁଇଣ୍ଟାଲ ଗଞ୍ଜେଇ ଧରି ଆସୁଥିଲେ। ତେବେ ଖଲିଆପାଲି ହାଇସ୍କୁଲ ପଡ଼ିଆ ନିକଟରେ ପୁଲିସକୁ ଦେଖି ସେମାନେ ବାଇକ୍‌ ଓ ଗଞ୍ଜେଇ ଛାଡି ଦୌଡ଼ି ପଳାଇଥିଲେ। ପୁଲିସ ସେଠାରେ ପହଞ୍ଚି ୨ ଗାଡ଼ି ଓ ସେଥିରେ ଥିବା ଗଞ୍ଜେଇକୁ ଜବତ କରିଛି। ଯାଞ୍ଚ ବେଳେ ବାଇକ୍‌ ଦୁଇଟି ମଧ୍ୟରୁ ଗୋଟିଏ ଛତିଶଗଡ଼ର ଓ ଅନ୍ୟଟି ସୋନପୁର ଅଞ୍ଚଳର ବୋଲି ଜଣାପଡ଼ିଛି। ଏ ନେଇ ଥାନାରେ ଏକ ମାମଲା ରୁଜୁ କରି ତଦନ୍ତ ଚାଲିଥିବା ଥାନାଧିକାରୀ ନଳିନୀକାନ୍ତ ଦାସ ସୂଚନା ଦେଇଛନ୍ତି।