ଏଯାବତ ୧୦କିଲୋରୁ ଉର୍ଦ୍ଧ୍ୱ ଧଳାଜହର ଜବତ ହୋଇଛି: ଅବକାରୀ ମନ୍ତ୍ରୀ
ଭୁବନେଶ୍ୱର: ଗତ ୫ ବର୍ଷ ମଧ୍ୟରେ ରାଜ୍ୟରେ ଧଳାଜହର (ବ୍ରାଉନସୁଗାର) ବ୍ୟବସାୟୀ ତାର କାୟା ମେଲାଇ ସାରିଛି । ରାଜ୍ୟର ବିଭିନ୍ନ ସ୍ଥାନରୁ ଏବେ ଧଳା ଜହର କାରବାରର ଘଟଣା ସାମ୍ନାକୁ ଆସୁଛି । ତେବେ ଏହି ବ୍ୟବସାୟୀଙ୍କ ଉପରେ କି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ଓ ରାଜ୍ୟରେ ଏହି ବ୍ୟବସାୟର ମୂଳୋତ୍ପାଟନ ପାଇଁ କ’ଣ ବ୍ୟବସ୍ଥା କରାଯାଇଛି ? ବିଧାନସଭାରେ ବିଜେଡି ବିଧାୟକ ମହୋଷଧୀ ବାଗଙ୍କ ଏଭଳି ପ୍ରଶ୍ନର ଉତ୍ତର ଅବକାରୀ ମନ୍ତ୍ରୀ ନିରଞ୍ଜନ ପୂଜାରୀ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଉତ୍ତରରେ ନିରଞ୍ଜନ କହିଛନ୍ତି, ଗତ ୫ ବର୍ଷ ମଧ୍ୟରେ ରାଜ୍ୟର ବିଭିନ୍ନ ସ୍ଥାନରୁ ୧୦ କିଲୋରୁ ଉର୍ଦ୍ଧ୍ୱ ଧଳାଜହର ଜବତ କରାଯାଇଛି । ୨୦୧୮-୧୯ ମଧ୍ୟରେ ସର୍ବାଧିକ ୪୫୭୧.୫୫୦ ଗ୍ରାମ ବ୍ରାଉନସୁଗାର ଜବତ ହୋଇଥିବା ବେଳେ ୫୩ଜଣଙ୍କୁ ଏହି ମାମଲାରେ ଅବକାରୀ ବିଭାଗ ଗିରଫ କରିଛି । ସେହିଭଳି ବିଗତ ୪ ବର୍ଷ ମଧ୍ୟରେ ୧୩୬ ଜଣଙ୍କୁ ଏହି ମାମଲାରେ ଗିରଫ କରାଯାଇଛି ।
ଏହାଛଡା ବ୍ରାଉନସୁଗାର କାରବାରରେ ଧରାପଡୁଥିବା ଅଭିଯୁକ୍ତଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ବୋଲି ମନ୍ତ୍ରୀ କହିଛନ୍ତି । ଧଳା ଜହର କାରବାରକୁ ରୋକିବାକୁ ସରକାର ମଧ୍ୟ ଅନେକ ପଦକ୍ଷେପ ଗ୍ରହଣ କରିଛନ୍ତି ବୋଲି ମନ୍ତ୍ରୀ କହିଛନ୍ତି।
– ପ୍ରତ୍ୟେକ ଜିଲ୍ଲାରେ ଅବକାରୀ, ପୁଲିସ, ରାଜସ୍ୱ ଓ ଜଙ୍ଗଲ ଅଧିକାରୀଙ୍କୁ ନେଇ ଟିମ୍ ଗଠନ କରାଯିବା ସହ ଗୁପ୍ତ ତଥ୍ୟ ଆଧାରରେ ଚଢାଉ କରାଯାଇ ଆସାମୀମାନଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଉଛି ।
– କଟକ, ସମ୍ବଲପୁର, ବ୍ରହ୍ମପୁରର ୩ଟି ଅବକାରୀ ଗୁଇନ୍ଦା ସଂସ୍ଥା ସହ ରାଜ୍ୟ ଅବକାରୀ ଗୁଇନ୍ଦା ସଂସ୍ଥା ମାଧ୍ୟମରେ ରେଳଷ୍ଟେସନ, ବସଷ୍ଟାଣ୍ଡ ଏବଂ ବିଭିନ୍ନ ସନ୍ଦେହପୂର୍ଣ୍ଣ ସ୍ଥାନରେ ଦୃଷ୍ଟି ରଖାଯିବା ସହ ଚଢାଉ କରାଯାଇ ଏନଡିପିଏସ ଆକ୍ଟ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ।
– ପୁଲିସ, ଏସଟିଏଫ୍ ଏବଂ ଏନସିବି ଦ୍ୱାରା ବିଭିନ୍ନ ସମୟରେ ଚଢାଉ କରି ଅପରାଧୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ।
– ପ୍ରତ୍ୟେକ ଜିଲ୍ଲାରେ ଜନ ସଚେତନତା ସୃଷ୍ଟି କରାଯାଇ ଯୁବପିଢିଙ୍କ ମଧ୍ୟରେ ନିଶାନିବାରଣ ନିମନ୍ତେ ସଚେତନତା ସୃଷ୍ଟି କରାଯାଉଛି ।
– ବ୍ରାଉନସୁଗାର ବାବଦରେ ସୂଚନା ଦେଉଥିବା ବ୍ୟକ୍ତି ଓ ନିଶା କାରବାର ବିରୋଧରେ କାର୍ଯ୍ୟ କରୁଥିବା ବ୍ୟକ୍ତିଙ୍କୁ ପୁରସ୍କୃତ କରିବାର ବ୍ୟବସ୍ଥା କରିଛନ୍ତି ରାଜ୍ୟ ସରକାର ।