‘ଫନି’ ପ୍ରଭାବିତ ଅଞ୍ଚଳର ୪ଟି ସ୍ଥାନରେ ହୋଇଛି ଶତ ପ୍ରତିଶତ ଜଳ ଯୋଗାଣ : ସ୍ୱତନ୍ତ୍ର ରିଲିଫ୍ କମିଶନର

ଭୁବନେଶ୍ୱର : ବାତ୍ୟା ‘ଫନି’ ପ୍ରଭାବିତ ୪ ଟି ସ୍ଥାନରେ ଜଳ ଯୋଗାଣ କାର୍ଯ୍ୟ ଶତ ପ୍ରତିଶତ ହୋଇଛି । ଏନେଇ ସ୍ୱତନ୍ତ୍ର ରିଲିଫ୍ କମିଶନର ବିଷ୍ଣୁପଦ ସେଠୀ ସୂଚନା ଦେଇଛନ୍ତି । ସେ କହିଛନ୍ତି କି, ବାତ୍ୟାରେ ପ୍ରଭାବିତ ହୋଇଥିବା ପୁରୀ ଜିଲ୍ଲାରେ ଜଳ ଯୋଗାଣ ନେଇ ୨୪ଟି ହେଭି-ଡ୍ୟୁଟି ଡିଜି ସେଟ୍ , ୫୪ଟି ପାଣି ଟ୍ୟାଙ୍କର ଏବଂ ୫୪ଟି ପିଭିସି ଟ୍ୟାଙ୍କର ଜରିଆରେ ପ୍ରଭାବିତ ଲୋକଙ୍କୁ ଜଳ ଯୋଗାଣ ହୋଇଛି । ବାତ୍ୟାର ୭୬ ଘଣ୍ଟା ମଧ୍ୟରେ ଏଭଳି ଏହି ସବୁ ଉପାୟରେ ପ୍ରଭାବିତଙ୍କୁ ଜଳ ଯୋଗାଣ କରାଯାଉଥିଲା ।

ସେହିପରି କୋଣାର୍କ ଟାଉନ ଅଞ୍ଚଳରେ  ୯୯ ଏମଏଲଡି (ଦୈନିକ ନିୟୁତ ମିଲିଲିଟର)  ଜଳ ଆବଶ୍ୟକତା ହେଉଥିବାବେଳେ ରାଜ୍ୟ ସରକାର ୨ଟି ହେଭି ଡ୍ୟୁଟି ଡିଜି ସେଟ୍ , ୭ଟି ପାଣି ଟ୍ୟାଙ୍କର ଏବଂ ୧୫ଟି ପିଭିସି ଟ୍ୟାଙ୍କ ଜରିଆରେ ଲୋକମାନଙ୍କୁ ଜଳ ଯୋଗାଣ ହୋଇଛି । ସେହିଭଳି ନିମାପଡ଼ା ଟାଉନ ଅଞ୍ଚଳରେ ୧.୯୯ ଏମଏଲଡ଼ି ପାଣି ଆବଶ୍ୟକତା ପଡୁଥିବାବେଳେ ରାଜ୍ୟ ସରକାର ୩ଟି ହେଭି ଡ୍ୟୁଟି ଡିଜି ସେଟ୍, ୭ଟି ପାଣି ଟ୍ୟାଙ୍କର ଏବଂ ୫ଟି ପିଭିସି ଟ୍ୟାଙ୍କ ଜରିଆରେ ପ୍ରଭାବିତଙ୍କ ପାଖରେ ପାଣି ଯୋଗାଇ ଦିଆଯାଇଛି ।

ପାଣି ପାଇଁ ଡହଳ ବିକଳ ହେଉଥିବା ଭୁବନେଶ୍ୱର ସହରାଞ୍ଚଳରେ ଜଳ ଯୋଗାଣ ସ୍ୱାଭାବିକ ହୋଇଛି । କାରଣ ଏଠାରେ ୨୨୫ ଏମଏଲଡି ଜଳ ଆବଶ୍ୟକ ହେଉଥିବା ବେଳେ ୨୩୦ ଏମଏଲଡ଼ି ଜଳ ସହରାଞ୍ଚଳର ବସ୍ତି ଗୁଡିକରେ ଯୋଗାଇ ଦିଆଯାଇଛି । ଯେଉଁଥିରେ ୧୦୮ଟି ହେଭି ଡ୍ୟୁଟି ଡିଜି ସେଟ୍, ୧୪୫ଟି ପାଣି ଟ୍ୟାଙ୍କର ଏବଂ ୬୦୦ଟି ପିଭିସି ମାଧ୍ୟବରେ ଏହି ସବୁ ଉପାୟରେ ପ୍ରଭାବିତଙ୍କୁ ଜଳ ଯୋଗାଣ କରାଯାଉଥିଲା । ଯାହାର ସ୍ଥିତି ଏବେ ସ୍ୱାଭାବିକ ହୋଇଥିବା ରାଜ୍ୟ ସରକାର କହିଛନ୍ତି ।