ଭଦ୍ରକ: ଭୁଲ ଖବର ଜୀବନ ନେଇଛି । ମାଟ୍ରିକ ପରୀକ୍ଷାରେ ପାସ କରି ମଧ୍ୟ ଫେଲ ହୋଇଥିବା ଖବର ଶୁଣି ଜଣେ ଛାତ୍ରୀ ବିଷ ପିଇ ଆତ୍ମହତ୍ୟା କରିଛନ୍ତି । ଭଦ୍ରକ ଜିଲ୍ଲାର ବାସୁଦେବପୁର ଥାନା ଅଂଚଳରେ ଏହି ଅଭାବନୀୟ ଘଟଣା ଘଟିଛି । ମୃତ ଛାତ୍ରୀଙ୍କ ନାମ ରାଣୀସ୍ମିତା ମହାଳିକ । ସେ ଅର୍ଜୁନ ମହାଳିକଙ୍କ ଝିଅ ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ସୁଗ ପଂଚାୟତର ହାଟପୋଖରୀ ସାହିର ଅର୍ଜୁନ ମହାଳିକଙ୍କ ଝିଅ ରାଣୀସ୍ମିତା ଚଳିତ ବର୍ଷ ଦଶମ ଶ୍ରେଣୀ ପରୀକ୍ଷା ଦେଇଥିଲେ । ସେ ସୁଗସ୍ଥିତ ହାଇସ୍କୁଲର ଛାତ୍ରୀ ଥିଲେ । ଆଜି ପୂର୍ବାହ୍ନରେ ଦଶମ ଶ୍ରେଣୀ ବାର୍ଷିକ ପରୀକ୍ଷା ଫଳ ପ୍ରକାଶ ପାଇଥିଲା । ଜଣେ ସାଙ୍ଗ ଫୋନରେ କହିଲା ଯେ, ରାଣୀସ୍ମିତ ପରୀକ୍ଷାରେ ଫେଲ ହୋଇଯାଇଛି । ଏହି ଖବର ଶୁଣିବା ପରେ ରାଣୀସ୍ମିତା ନିଜକୁ ଅପମାନିତ ମନେକରି ଅର୍ଥାତ ପରିବାର ଲୋକଙ୍କ ଭୟରେ ବିଷପିଇ ଦେଇଥିଲେ । ତାଙ୍କୁ ଗୁରୁତର ଅବସ୍ଥାରେ ଭଦ୍ରକ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା । କିନ୍ତୁ ତାଙ୍କୁ ଚିକିତ୍ସାଧୀନ ଅବସ୍ଥାରେ ଡାକ୍ତର ମୃତ ଘୋଷଣା କରିଥିଲେ । ସୂଚନା ପାଇ ପୁଲିସ ଘଟଣାସ୍ଥଳରେ ପହଂଚି ମୃତଦେହ ଉଦ୍ଧାର କରିଛି । ପୁଲିସ ଘଟଣାର ତଦନ୍ତ କରୁଛି ।
ଅନ୍ୟପକ୍ଷରେ ରାଣୀସ୍ମିତା ମାଟ୍ରିକ ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି । ଜଣେ ଝିଅର ଭୁଲ ସୂଚନା ପାଇଁ ଆଉ ଜଣେ ଝିଅର ମୃତ୍ୟୁ ହୋଇଛି । ଦଶମ ଶ୍ରେଣୀର ଛାତ୍ରୀଙ୍କୁ ହରାଇ ଅର୍ଜୁନ ମହାଳିକଙ୍କ ପରିବାର ଭାଙ୍ଗିପଡ଼ିଥିବା ବେଳେ ସ୍ଥାନୀୟ ଅଂଚଳରେ ଶୋକର ଛାୟା ଖେଳିଯାଇଛି ।