୧୦ମ ବୋର୍ଡ ପରୀକ୍ଷା: ୧୩୬ କେନ୍ଦ୍ରରେ ୨୮,୭୨୩ଜଣ ପରୀକ୍ଷାର୍ଥୀ ପରୀକ୍ଷା ଦେବେ
ଖୋର୍ଦ୍ଧା: ଶୁକ୍ରବାରଠାରୁ ବୋର୍ଡ ଅଫ୍ ସେକଣ୍ଡାରୀ ଏଜୁକେସନ୍ (ବିଏସ୍ଇ)ର ୧୦ମ ଶ୍ରେଣୀ ପରୀକ୍ଷା ଆରମ୍ଭ ହେଉଛି । ଜିଲ୍ଲାରେ ୨୮,୭୨୩ ରେଗୁଲାର୍ ଓ ଏକ୍ସ ରେଗୁଲାର ପରୀକ୍ଷାର୍ଥୀ ଏହି ପରୀକ୍ଷା ଦେବେ ।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲା ଶିକ୍ଷାଧିକାରୀ ବିଶ୍ୱନାଥ ତରାଇ ପରୀକ୍ଷା ସମ୍ପର୍କରେ ସୂଚନା ଦେଇ କହିଛନ୍ତି ଯେ ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ପରିବର୍ତ୍ତିତ ସମୟସାରଣୀରେ ପରୀକ୍ଷା ସକାଳ ୧୦ଟା ମଧ୍ୟରେ ଶେଷ ହେବ ଓ ଅପରାହ୍ଣ ପରୀକ୍ଷା ରହିବ ନାହିଁ । ଜିଲ୍ଲାରେ ୧୩୬ ପରୀକ୍ଷା କେନ୍ଦ୍ର ହୋଇଛି । ଏହାମଧ୍ୟରୁ ୧୨ଟି ନୋଡାଲ୍ ସେଂଟର ରହିଛି, ଅର୍ଥାତ୍ ଏହି କେନ୍ଦ୍ରରୁ ପ୍ରଶ୍ନପତ୍ର ବିଭିନ୍ନ ପରୀକ୍ଷା କେନ୍ଦ୍ରକୁ ଯିବ । ଚଳିତ ବର୍ଷ ମୋଟ ୨୮, ୭୨୩ ପରୀକ୍ଷାର୍ଥୀ ପରୀକ୍ଷା ଦେବେ । ସେମାନଙ୍କ ମଧ୍ୟରୁ ରେଗୁଲାର ପରୀକ୍ଷାର୍ଥୀ ୨୮,୬୦୧ଜଣ । ପରୀକ୍ଷା କେନ୍ଦ୍ରଗୁଡ଼ିକର ଅନୁଧ୍ୟାନ କରିବାକୁ ବୋର୍ଡ ପକ୍ଷରୁ କେନ୍ଦ୍ରୀୟ ସ୍କ୍ୱାଡ୍ ଗଠନ ହୋଇଥିବା ବେଳେ ଜିଲ୍ଲା ପକ୍ଷରୁ ୩ଟି ସ୍କ୍ୱାଡ୍ ଗଠନ ହୋଇଛି । ଏଥିରେ ଜିଲ୍ଲାପାଳ, ଅତରିକ୍ତ ଜିଲ୍ଲାପାଳ, ଜିଲ୍ଲା ଶିକ୍ଷାଧିକାରୀ, ବ୍ଲକ ଶିକ୍ଷାଧିକାରୀ ଅଛନ୍ତି ।
ଗ୍ରୀଷ୍ମପ୍ରବାହକୁ ଦୃଷ୍ଟିରେ ରଖି ପରୀକ୍ଷାକେନ୍ଦ୍ରରେ ଥଣ୍ଡାପାନୀୟ ଆଦିର ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଛି । ସେହିଭଳି କୋଭିଡ୍ ସଂକ୍ରମଣକୁ ଦୃଷ୍ଟିରେ ରଖି ଆବଶ୍ୟକ ବ୍ୟବସ୍ଥା ମଧ୍ୟ କରାଯାଇଛି ବୋଲି ଶ୍ରୀ ତରାଇ ସୂଚନା ଦେବା ସହ ପରୀକ୍ଷାର୍ଥୀଙ୍କୁ ପରୀକ୍ଷା ପାଇଁ ଶୁଭାଶିଷ ପ୍ରଦାନ କରିଛନ୍ତି ।