ବାମରାରେ ୧୧ ଘଣ୍ଟା ରେଳରୋକ

ବାମରା : ଦକ୍ଷିଣ-ପୂର୍ବ ରେଳପଥ ଚକ୍ରଧରପୁର ଡିଭିଜନ ଅନ୍ତର୍ଗତ ବାମରା ରେଳଷ୍ଟେସନଠାରେ ବୁଧବାର ପ୍ରାୟ ୧୧ ଘଣ୍ଟା ଧରି ରେଳରୋକ କରାଯାଇଛି। ବାମରା ରେଳ କ୍ରିୟାନୁଷ୍ଠାନ କମିଟି ଡାକରାରେ ସକାଳ ୬ଟା ପୂର୍ବରୁ ଶତାଧିକ ପୁରୁଷ ଓ ମହିଳା ରେଲୱେ ଟ୍ରାକ୍‌ ଉପରେ ବସି ଆନ୍ଦୋଳନକୁ ସମର୍ଥନ ଜଣାଇଥିଲେ। ପରେ ବାମରା ଓ ଆଖପାଖ ଗ୍ରାମରୁ ହଜାର ସଂଖ୍ୟାରେ ଲୋକ ଆସି ଏଥିରେ ସାମିଲ୍‌ ହୋଇଥିଲେ। ପ୍ରାୟ ୧୧ ଘଣ୍ଟା ଧରି ଚାଲିଥିବା ଆନ୍ଦୋଳନ ଅପରାହ୍ନ ପ୍ରାୟ ୪.୫୦ ମିନିଟରେ ପ୍ରତ୍ୟାହୃତ ହୋଇଛି।

ପୂର୍ବ ଘୋଷଣା ଅନୁସାରେ, ୧୨ଟି ଟ୍ରେନର ସ୍ଥାୟୀ ରହଣି, ଷ୍ଟେସନର ଉଭୟ ପାର୍ଶ୍ବରେ ଅଣ୍ଡରପାସ, ବାମରା ଷ୍ଟେସନରେ ପାର୍ସଲ ବୁକିଂ ସମେତ ଅନ୍ୟାନ୍ୟ ଦାବି ନେଇ ରେଳରୋକ ଆନ୍ଦୋଳନ କରାଯାଇଥିଲା। ରେଳ କ୍ରିୟାନୁଷ୍ଠାନ କମିଟି ପକ୍ଷରୁ ସଭାପତି ଅନୁଭବ ଲାଠ, ସଂପାଦକ କ୍ଷୀରୋଦ ସା, ଉପସଭାପତି ପ୍ରଶାନ୍ତ ଶତପଥୀ, କୋଷାଧ୍ୟକ୍ଷ ବିଷ୍ଣୁ ଅଗ୍ରୱାଲ, ସଂଯୋଜକ ସନ୍ଦୀପ ଖଣ୍ଡେଲୱାଲ, ଉପଦେଷ୍ଟା ପ୍ରଦୀପ ମିଶ୍ର ପ୍ରମୁଖଙ୍କ ନେତୃତ୍ବରେ ପ୍ରାୟ ୩ ହଜାରରୁ ଅଧିକ ଗ୍ରାମବାସୀ ଆନ୍ଦୋଳନରେ ସାମିଲ ଥିଲେ। ଅନ୍ୟମାନଙ୍କ ମଧ୍ୟରେ, ପୂର୍ବତନ ବିଧାୟକ ରାଜେନ୍ଦ୍ର ଛତ୍ରିଆ, ପଦ୍ମଶ୍ରୀ ମିତ୍ରଭାନୁ ଗୌନ୍ତିଆ, ରବି ନାରାୟଣ ନାଏକ, ପଞ୍ଚାୟତ ସମିତି ଅଧ୍ୟକ୍ଷା ପିଙ୍କି ଧୁରୁଆ, ଉପାଧ୍ୟକ୍ଷ ସଂଜୟ ଦାସ, ଝାରସୁଗୁଡା ଜିଲ୍ଲା ପରିଷଦ ସଭାନେତ୍ରୀ ତୁଲାବତୀ ମିଞ୍ଜ ପ୍ରମୁଖ ପ୍ରତିବାଦ ସଭାରେ ଯୋଗ ଦେଇଥିଲେ।