ଲାଞ୍ଜିଗଡ଼: ସରକାର ଗରିବ ଲୋକମାନଙ୍କ ପାଇଁ ଅନେକ ଯୋଜନା କରୁଛନ୍ତି। ହେଲେ କଳାହାଣ୍ଡିଜିଲ୍ଲା ଲାଞ୍ଜିଗଡ଼ ବ୍ଲକ୍‌ର ଏଭଳି ୧୧ଟି ଗାଁ ଅଛି, ଯେଉଁଠି ଆଜି ବି ସରକାରୀ ଯୋଜନା ଲୋକଙ୍କ ପାଇଁ ସାତ ସପନ। ବର୍ଷ ବର୍ଷ ଧରି ପାହାଡ଼ଘେରା ଅପହଞ୍ଚ ଅଞ୍ଚଳରେ ବହୁ କଷ୍ଟରେ ଜୀବନ କାଟୁଛନ୍ତି ଏହି ଆଦିବାସୀ ଗାଁଗୁଡ଼ିକର ୨୦୦ରୁ ଅଧିକ ପରିବାର। ସମସ୍ୟା ସମାଧାନ ପାଇଁ ପ୍ରଶାସନିକ ଅଧିକାରୀ ଓ ରାଜନେତାଙ୍କୁ ବାରମ୍ବାର ଗୁହାରି କରାଯାଉଥିଲେ ସୁଦ୍ଧା ପ୍ରତିଶ୍ରୁତି ଛଡ଼ା କୌଣସି ସୁଫଳ ମିଳିନଥିବା ଗ୍ରାମବାସୀ ପ୍ରକାଶ କରିଛନ୍ତି।

Advertisment

ବାଧକ ସାଜିଛି ରେଳ ପ୍ରକଳ୍ପ
ପଞ୍ଚାୟତ ଅଫିସରୁ ୩୫ କିମି
ମାଗଣା ଚାଉଳ ପାଇଁ ୧୦୦ ଟଙ୍କା ଖର୍ଚ୍ଚ

ଲାଞ୍ଜିଗଡ଼ ବ୍ଲକ୍‌ ଗୁଣ୍ଡୁରୀ ପଞ୍ଚାୟତର ୧୧ଟି ଗାଁ ହାତୀମୁଣ୍ଡା, କାରକଟା, କୋଟେଜୋର, ଅଦଲାଡୁ, ତରଙ୍ଗଲ, ମାଡ଼ିବନ୍ଧା, ଗମପେନୁ, ବିଜେପୁର, ସାଡାଙ୍ଗପଦର, ଡମେର ଓ ଦାରବେଙ୍ଗା ଗାଁ’ର ଦୂରତା ବ୍ଲକ୍‌ ମୁଖ୍ୟାଳୟଠାରୁ ୬୦ କିଲୋମିଟର ଏବଂ ପଞ୍ଚାୟତ କାର୍ଯ୍ୟାଳୟଠାରୁ ୩୦ରୁ ୩୫ କିଲୋମିଟର। ପୂର୍ବରୁ ପଞ୍ଚାୟତ କାର୍ଯ୍ୟାଳୟକୁ ଏହି ଗାଁଗୁଡ଼ିକର ଦୂରତା ୧୦ରୁ ୧୫ କିମି ଥିଲା। ୨୦୧୭ ମସିହାରେ ରେଳ ପ୍ରକଳ୍ପ କାମ ଶେଷ ହୋଇ ଏଥିରେ ପାଣି ରହିବା ଫଳରେ ଦୂରତା ବଢ଼ିଯାଇଥିଲା। ଏହି ଗାଁମାନଙ୍କ ମଧ୍ୟରେ ପାହାଡ଼, ନାଳ, ଝରଣା, ଘଞ୍ଚ ଜଙ୍ଗଲ ଓ ଘାଟି ଦେଇ ପାଦଚଲା ରାସ୍ତା ୩୦ରୁ ୩୫ କିଲୋମିଟର ବାଟ ରହିଥିବା ବେଳେ ଯିବାଆସିବା ଲୋକଙ୍କ ପାଇଁ ସମ୍ଭବ ହୋଇ ନଥାଏ। ବୁଢ଼ା, ବୁଢ଼ୀ, ଭିନ୍ନକ୍ଷମଙ୍କ ପାଇଁ ପଞ୍ଚାୟତ କାର୍ଯ୍ୟାଳୟ ଆସିବା କଷ୍ଟସାଧ୍ୟ ବ୍ୟାପାର। ଏହି ଗାଁଗୁଡ଼ିକୁ ଆମ୍ବୁଲାନ୍ସ ମଧ୍ୟ ଯାଇପାରେ ନାହିଁ। ଫଳରେ ଗର୍ଭବତୀ, ପ୍ରସୂତି ଓ ରୋଗୀଙ୍କୁ ଖଟିଆରେ ୫ରୁ ୧୦ କିମି ପର୍ଯ୍ୟନ୍ତ ବୋହିବାକୁ ପଡ଼ୁଛି। ଗାଁ ଲୋକେ ପଞ୍ଚାୟତ କାର୍ଯ୍ୟାଳୟରୁ ପିଡିଏସ୍‌ ଆଣିବା ପାଇଁ ଅଟୋରିକ୍ସା, ଟ୍ରାକ୍ଟର୍‌, ଭ୍ୟାନ୍‌ ଭଡ଼ା କରି ନର୍ଲା ବ୍ଲକ୍‌ ଛତିକୁଡ଼ା, ସଦର ବ୍ଲକ୍‌ ଦେପୁର, ଇଚ୍ଛାପୁର ଦେଇ ଆସିଥାନ୍ତି। ଫଳରେ ସରକାରଙ୍କ ମାଗଣା ଚାଉଳ ପାଇଁ ୧୦୦ ଟଙ୍କା ଖର୍ଚ୍ଚ ହେଉଥିବା ଗାଁ ଲୋକେ କହିଛନ୍ତି। ପଞ୍ଚାୟତ ପକ୍ଷରୁ ହାତୀମୁଣ୍ଡା ଗାଁଠାରେ କ୍ୟାମ୍ପ କରି କେବଳ ବୁଢ଼ାବୁଢ଼ୀ, ଭିନ୍ନକ୍ଷମ, ବିଧବାଙ୍କୁ ଭତ୍ତା ଦିଆଯାଉଛି। ଏହି ପଞ୍ଚାୟତର ଶୋଷପଦର, ବରଙ୍ଗପଦର, ଦାରବେଙ୍ଗ, କାଚାଙ୍ଗଭଟା, ଗମପେନୁ, ବିଜେପୁର, କନ୍ଧ ଶୋଷପଦର ଗାଁକୁ ବିଜୁଳି ସଂଯୋଗ ନାହିଁ। ବାରମ୍ବାର ଅଭିଯୋଗ ପରେ ବି କେହି ଶୁଣୁ ନାହାନ୍ତି। ସରଲାଞ୍ଜି ଗାଁଠାରୁ କାବାଗେଞ୍ଜୁ, ଶୋଷପଦର, ବରଙ୍ଗପଦର ଦେଇ ମନସ୍ଥରା ଗାଁ ପର୍ଯ୍ୟନ୍ତ ରାସ୍ତା ନିର୍ମାଣ ପାଇଁ ପଞ୍ଚାୟତବାସୀ ପ୍ରସ୍ତାବ ଦେଇଛନ୍ତି। ଏହି ରାସ୍ତା ନିର୍ମାଣ ହେଲେ ପଞ୍ଚାୟତ ମହକୁମାକୁ ଉପରୋକ୍ତ ୧୧ଟି ଗାଁର ଦୂରତା ୫ରୁ ୧୫ କିମି ମଧ୍ୟରେ ହେବ। ସରକାର ଏଥିପ୍ରତି ସ୍ବତନ୍ତ୍ର ଦୃଷ୍ଟିଦେବାକୁ ପଞ୍ଚାୟତବାସୀ ଅନୁରୋଧ କରିଛନ୍ତି।