ଖଡଗପୁର ଓ ହିଜଲି ଷ୍ଟେସନ୍ ମଧ୍ୟରେ ତୃତୀୟ ଲାଇନ ନିର୍ମାଣ: ୧୨ ଟ୍ରେନ୍ ବାତିଲ୍, ୫ଟିର ମାର୍ଗ ପରିବର୍ତନ
ଭୁବନେଶ୍ବର : ହାଓଡ଼ା-ଚେନ୍ନାଇ, ହାଓଡ଼ା-ମୁମ୍ବାଇ ମୁଖ୍ୟ ରେଳ ମାର୍ଗରେ ଖଡ଼ଗପୁର ଓ ହିଜଲି ଷ୍ଟେସନ୍ ମଧ୍ୟରେ ତୃତୀୟ ଲାଇନ୍ ନିର୍ମାଣ କରାଯାଉଛି। ତେଣୁ ଏହି ମାର୍ଗ ଦ୍ବୟରେ ୨୧ରୁ ୨୩ ତାରିଖ ମଧ୍ୟରେ ଟ୍ରେନ୍ ସେବା କିଛି ମାତ୍ରାରେ ପ୍ରଭାବିତ ହେବ। ଏଥିପାଇଁ ୧୨ଟି ଟ୍ରେନ୍ ବାତିଲ୍ ଓ ୨ଟି ଆଂଶିକ ବାତିଲ୍ ହୋଇଥିବା ବେଳେ ଗୋଟିଏର ସମୟ ପରିବର୍ତନ, ୫ଟି ଟ୍ରେନ୍ର ମାର୍ଗ ପରିବର୍ତନ କରାଯାଇଛି। ଦୁଇଟି ଟ୍ରେନ୍ ସେବା ନିୟନ୍ତ୍ରଣ କରିବାକୁ ରେଳପଥ ପକ୍ଷରୁ ନିଷ୍ପତ୍ତି ନିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ସିକନ୍ଦରାବାଦ-ହାଓଡ଼ା-ସିକନ୍ଦରାବାଦ ଫାଲକ୍ନାମା ଏକ୍ସପ୍ରେସ ସିକନ୍ଦରାବାଦରୁ ୨୧ ତାରିଖରେ ଓ ହାଓଡ଼ାରୁ ୨୨ ତାରିଖରେ ବାତିଲ୍ ହେଉଛି। ଶାଲିମାର-ପୁରୀ-ଶାଲିମାର ଧଉଳି ଏକ୍ସପ୍ରେସ୍ ୨୨ ତାରିଖରେ ଉଭୟ ପାର୍ଶ୍ବରୁ, ହାଓଡ଼ା-ଯଶୋବନ୍ତପୁର-ହାଓଡ଼ା ଦୁରନ୍ତ ଏକ୍ସପ୍ରେସ୍ ୨୨ ତାରିଖରେ ହାଓଡ଼ାରୁ ଓ ୨୪ରେ ଯଶୋବନ୍ତପୁରରୁ, ହାଇଦ୍ରାବାଦ-ଶାଲିମାର-ହାଇଦ୍ରାବାଦ ଇଷ୍ଟକୋଷ୍ଟ ଏକ୍ସପ୍ରେସ୍ ୨୧ରେ ହାଇଦ୍ରାବାଦରୁ ଓ ୨୨ରେ ଶାଲିମାରରୁ, ହାଓଡ଼ା-ଭୁବନେଶ୍ୱର-ହାଓଡ଼ା ଜନଶତାବ୍ଦୀ ଏକ୍ସପ୍ରେସ ୨୨ରେ ଉଭୟ ପାର୍ଶ୍ୱରୁ, ସାନ୍ତ୍ରାଗଛି-ତିରୁପତି-ସାନ୍ତ୍ରାଗଛି ଏକ୍ସପ୍ରେସ ୨୨ରେ ସାନ୍ତ୍ରାଗଛିରୁ ଓ ୨୩ରେ ତିରୁପତିରୁ, ଚେନ୍ନାଇ-ଶାଲିମାର-ଚେନ୍ନାଇ କରମଣ୍ଡଳ ଏକ୍ସପ୍ରେସ ୨୧ରେ ଚେନ୍ନାଇରୁ ଓ ୨୨ରେ ଶାଲିମାରରୁ ବାତିଲ୍ କରାଯାଇଛି। ସେହିପରି ହାଓଡ଼ା-ଭଦ୍ରକ-ହାଓଡ଼ା ଏକ୍ସପ୍ରେସ୍ ୨୧ ଓ ୨୨ରେ ହାଓଡ଼ାରୁ ଏବଂ ୨୨ ଓ ୨୩ରେ ଭଦ୍ରକରୁ, ପୁରୀ-ଶାଲିମାର-ପୁରୀ ଶ୍ରୀଜଗନ୍ନାଥ ଏକ୍ସପ୍ରେସ୍ ୨୧ରେ ପୁରୀରୁ ଓ ୨୨ରେ ଶାଲିମାରରୁ, ହାଓଡ଼ା-ଯାଜପୁର କେନ୍ଦୁଝର ରୋଡ଼-ହାଓଡ଼ା ମେମୁ ଏକ୍ସପ୍ରେସ୍ ୨୨ରେ ଉଭୟ ପାର୍ଶ୍ୱରୁ, ଖଡ଼ଗପୁର-ଖୋର୍ଦ୍ଧାରୋଡ୍-ଖଡ଼ଗପୁର ଏକ୍ସପ୍ରେସ୍ ୨୨ରେ ଉଭୟ ପାର୍ଶ୍ୱରୁ ଏବଂ ଯଶୋବନ୍ତପୁର-ହାଓଡ଼ା-ଯଶୋବନ୍ତପୁର ଏକ୍ସପ୍ରେସ୍ ୨୧ରେ ଯଶୋବନ୍ତପୁରରୁ ଓ ୨୨ରେ ହାଓଡ଼ାରୁ ବାତିଲ ହେବ।
୨୨ ତାରିଖରେ ଖଡ଼ଗପୁର-ଭଦ୍ରକ-ଖଡ଼ଗପୁର ମେମୁ ପାସେଞ୍ଜର ସ୍ପେସାଲ୍ ହିଜଲି ଓ ଭଦ୍ରକ ମଧ୍ୟରେ ଚଳାଚଳ କରିବ। ହାଓଡ଼ା-ଟିଟିଲାଗଡ଼/କଣ୍ଟାବାଞ୍ଜି-ହାଓଡ଼ା ଇସ୍ପାତ୍ ଏକ୍ସପ୍ରେସ୍ ରାଉରକେଲା ଓ ଟିଟିଲାଗଡ଼/କଣ୍ଟାବାଞ୍ଜି ମଧ୍ୟରେ ଚଳାଚଳ କରିବ। ୨୨ ତାରିଖରେ ହାଓଡ଼ାରୁ ଛାଡ଼ିବାକୁ ଥିବା ହାଓଡ଼ା-ତିରୁଚିରାପଲ୍ଲି ଏକ୍ସପ୍ରେସ୍ ନିର୍ଧାରିତ ସମୟଠାରୁ ୪ ଘଣ୍ଟା ୫ ମିନିଟ୍ ବିଳମ୍ବରେ ଛାଡ଼ିବ। ନ୍ୟୁ ତିନ୍ସୁକିଆରୁ ମେ’ ୨୦ରେ ଛାଡ଼ିବାକୁ ଥିବା ନ୍ୟୁ ତିନ୍ସୁକିଆ-ବେଙ୍ଗାଲୁରୁ ଏକ୍ସପ୍ରେସ୍, ବେଙ୍ଗାଲୁରୁରୁ ୨୦ ତାରିଖରେ ଛାଡ଼ିବାକୁ ଥିବା ବେଙ୍ଗାଲୁରୁ-ଗୌହାଟି ଏକ୍ସପ୍ରେସ୍, ୨୧ରେ ସିକନ୍ଦରାବାଦରୁ ଛାଡ଼ିବାକୁ ଥିବା ସିକନ୍ଦରାବାଦ-ଗୌହାଟି ଏକ୍ସପ୍ରେସ, ୨୧ରେ ଅଗରତାଲାରୁ ଛାଡ଼ିବାକୁ ଥିବା ଅଗରତାଲା-ବେଙ୍ଗାଲୁରୁ କ୍ୟାଣ୍ଟ ଏକ୍ସପ୍ରେସ୍ ଭଟ୍ଟନଗର ଓ ଖଡ଼ଗପୁର ମାର୍ଗ ପରିବର୍ତ୍ତେ ଦୁର୍ଗାପୁର-ଆସନ୍ସୋଲ୍-ଆଦ୍ରା-ମିଦନାପୁର-ହିଜଲି ଦେଇ ଚଳାଚଳ କରିବ। ୨୧ରେ ପୁରୀରୁ ଛାଡ଼ିବାକୁ ଥିବା ପୁରୀ-କାମାକ୍ଷା ଏକ୍ସପ୍ରେସ ହିଜଲି-ଖଡ଼ଗପୁର-ହାଓଡ଼ା ମାର୍ଗ ପରିବର୍ତ୍ତେ ଆସାନସୋଲ-ଆଦ୍ରା-ହିଜଲି ମାର୍ଗ ଦେଇ ଚାଲିବ। ମାର୍ଗ ପରିବର୍ତନ କରିବାକୁ ଥିବା ସମସ୍ତ ଟ୍ରେନ୍ ହିଜଲିରେ ୨ ମିନିଟ୍ ରହଣି କରିବ। ମେ’ ୨୧ରେ ଚେନ୍ନାଇରୁ ଛାଡ଼ିବାକୁ ଥିବା ଚେନ୍ନାଇ-ହାୱଡ଼ା ମେଲ୍ ଓ ଯଶୋବନ୍ତପୁରରୁ ଛାଡ଼ିବାକୁ ଥିବା ଯଶୋବନ୍ତପୁର-ଭାଗଲପୁର ଅଙ୍ଗ ଏକ୍ସପ୍ରେସ୍ ଯଥାକ୍ରମେ ଦକ୍ଷିଣ ପୂର୍ବ ଏବଂ ପୂର୍ବତଟ ରେଳପଥ ମଧ୍ୟରେ ନିୟନ୍ତ୍ରିତ ହେବ। ସେହିପରି କନ୍ୟାକୁମାରୀରୁ ଛାଡ଼ିବାକୁ ଥିବା କନ୍ୟାକୁମାରୀ-ହାଓଡ଼ା ଏକ୍ସପ୍ରେସ୍ ଦକ୍ଷିଣ ପୂର୍ବ ରେଳପଥ ପରିସୀମା ମଧ୍ୟରେ ନିୟନ୍ତ୍ରିତ ହେବ।