ବ୍ରହ୍ମପୁର ଚିଟଫଣ୍ଡ୍ କୋର୍ଟରେ ୧୨୦ ମକଦ୍ଦମା; ୧୦ଟି ବିଚାରଣା ସରିଛି, ୯ ମାମଲାରେ ଦୋଷୀ
୩ କମ୍ପାନିର ସମ୍ପତ୍ତି ନିଲାମ ପାଇଁ ହୋଇଛି ନିର୍ଦ୍ଦେଶ
ବ୍ରହ୍ମପୁର: ଚିଟ୍ଫଣ୍ଡ ମାମଲାର ତ୍ବରିତ ବିଚାରଣା ପାଇଁ ବ୍ରହ୍ମପୁରରେ ରହିଛି ସ୍ବତନ୍ତ୍ର କୋର୍ଟ। ଓପିଆଇଡି ଆକ୍ଟ୍-୨୦୧୧ ଅନୁସାରେ ପ୍ରତିଷ୍ଠା ହୋଇଥିବା ଏହି କୋର୍ଟରେ ପ୍ରାୟ ୧୨୦ଟି ମାମଲା ବିଚାରାଧୀନ ରହିଛି। ପୂର୍ବରୁ ୧୦ଟି ମାମଲାର ବିଚାରଣା ସମାନ୍ତ ହୋଇ ରାୟ ପ୍ରକାଶ ପାଇ ସାରିଛି। ୧୦ଟି ମାମଲା ମଧ୍ୟରୁ ୯ଟି ମାମଲାରେ ଅଭିଯୁକ୍ତ ଦୋଷୀ ସାବ୍ୟସ୍ତ ହୋଇଛନ୍ତି। ଗୋଟିଏ ମାତ୍ର ମାମଲାରେ ଅଭିଯୁକ୍ତ ନିର୍ଦ୍ଦୋଷ ହୋଇଥିବା ସୂଚନା ମିଳିଛି। ଆବଶ୍ୟକ ସାକ୍ଷ୍ୟ ପ୍ରମାଣ ଦାଖଲ ସହିତ ସରକାରୀ ଓକିଲ ବିଜୟ ପ୍ରଧାନଙ୍କ ମାମଲା ପରିଚାଳନାରେ ଦକ୍ଷତା ଏବଂ ବଳିଷ୍ଠ ଯୁକ୍ତି ଉପସ୍ଥାପନା ଶୈଳୀ ଯୋଗୁଁ ୧୦ଟି ମାମଲାରୁ ୯ଟି ମାମଲାରେ ଦୋଷୀଙ୍କୁ ଦଣ୍ଡାଦେଶ ହୋଇଛି ବୋଲି କହିବା ଅତ୍ୟୁକ୍ତି ହେବ ନାହିଁ।
Sambad is now on WhatsApp
Join and get latest news updates delivered to you via WhatsApp
ବ୍ରହ୍ମପୁରରେ ବିଗତ ବର୍ଷରେ ବହୁ ଚିଟ୍ଫଣ୍ଡ ସଂସ୍ଥା ଖୋଲିଥିଲା। ଏହି ଚିଟ୍ଫଣ୍ଡ ସଂସ୍ଥାରେ ଟଙ୍କା ବିନିଯୋଗ କଲେ ଅଧିକ ସୂଧ ମିଳିବ ବୋଲି ପ୍ରତିଶ୍ରୁତି ଦିଆଯାଇଥିଲା। ଏଭଳି ମିଥ୍ୟା ପ୍ରତିଶ୍ରୁତି ଦେଇ ବହୁ ସଂସ୍ଥା ସାଧାରଣ ଲୋକଙ୍କ କୋଟି କୋଟି ଟଙ୍କା ହଡ଼ପ୍ କରି ନେଇଥିଲେ। ଗତ ୨୦୧୦ ପରେ ଗୋଟିଏ ପରେ ଗୋଟିଏ ସଂସ୍ଥାର କଳା କାରନାମା ପଦାକୁ ଆସିଥିଲା। ବହୁ ସଂସ୍ଥା ଲୋକଙ୍କ ଟଙ୍କା ଫେରାଇ ନଥିଲେ। ଫଳରେ ଜମାକାରୀ ସଂସ୍ଥା କାର୍ଯ୍ୟାଳୟ ଘେରାଉ କରି ଥାନାରେ ଏତଲା ଦେଇଥିଲେ। ଧୀରେ ଧୀରେ ଚିଟ୍ଫଣ୍ଡ ସଂସ୍ଥାଗୁଡ଼ିକ ବନ୍ଦ ହୋଇଥିଲା। କେତେକ ମାମଲା କ୍ରାଇମ୍ବ୍ରାଞ୍ଚ ଦ୍ବାରା ତଦନ୍ତ କରାଯାଇଥିବା ବେଳେ ଆଉ କେତେକ ମାମଲା ସ୍ଥାନୀୟ ପୁଲିସ ଦ୍ବାରା ତଦନ୍ତ କରି କୋର୍ଟରେ ଚାର୍ଜସିଟ୍ ଦାଖଲ କରାଯାଇଥିଲା। ଏଭଳି ମାମଲାର ତ୍ବରିତ ବିଚାରଣା କରିବା ପାଇଁ ଗତ ୨୦୧୫ରେ ବ୍ରହ୍ମପୁରରେ ପ୍ରତିଷ୍ଠା ହୋଇଥିଲା ସ୍ବତନ୍ତ୍ର ଚିଟ୍ଫଣ୍ଡ କୋର୍ଟ। ଏହି କୋର୍ଟରେ ଗ୍ରିନ୍ଇଣ୍ଡିଆ, ଓସ୍କାର୍, ଏଟି ଗ୍ରୁପ୍, ଦାତୁମ ଓ ରାମକ୍ରିଷ୍ଣା ଇଲେକ୍ଟ୍ରୋ କଣ୍ଟ୍ରୋଲ୍ ଫାଇନାନ୍ସ ଲିମିଟେଡ୍ ଭଳି ଚିଟ୍ଫଣ୍ଡ ସଂସ୍ଥାର ମାମଲା ବିଚାରଣା ଚାଲିଛି। ବର୍ତ୍ତମାନ ସୁଦ୍ଧା ୧୦ଟି ମାମଲାରୁ ୯ଟି ମାମଲାରେ ଅଭିଯୁକ୍ତମାନେ ଦୋଷୀ ସାବ୍ୟସ୍ତ ହୋଇଛନ୍ତି।
ଅଧିକାଂଶ ମାମଲା ରାମକ୍ରିଷ୍ଣା ଫାଇନାନ୍ସ କମ୍ପାନିର ରହିଥିବା ସରକାରୀ ଓକିଲ ଶ୍ରୀ ପ୍ରଧାନ ସୂଚନା ଦେଇଛନ୍ତି। ଏହି କୋର୍ଟ ଦ୍ବାରା ସର୍ବାଧିକ ୧୦ବର୍ଷ ପର୍ଯ୍ୟନ୍ତ ଦଣ୍ଡାଦେଶ ନିର୍ଦ୍ଦେଶ ହୋଇଛି। ରାମକ୍ରିଷ୍ଣା ଫାଇନାନ୍ସ କମ୍ପାନିର ମୁଖ୍ୟଙ୍କୁ ୧୦ବର୍ଷ ପର୍ଯ୍ୟନ୍ତ ଦଣ୍ଡାଦେଶ ହୋଇଥିବା ସରକାରୀ ଓକିଲ ଶ୍ରୀ ପ୍ରଧାନ କହିଛନ୍ତି। ସେହିପରି ଓସ୍କାର୍, କାଟଲୁନ୍ ଭଳି ୩ଟି ସଂସ୍ଥାର ସମ୍ପତ୍ତି ବାଜ୍ୟାପ୍ତ କରି ନିଲାମ୍ ପାଇଁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହି କୋର୍ଟରେ ଗଞ୍ଜାମ ଜିଲ୍ଲା ସମେତ ଦକ୍ଷିଣ ଓଡ଼ିଶାର ବିଭିନ୍ନ ଜିଲ୍ଲାର ମାମଲାଗୁଡ଼ିକ ବିଚାରାଧୀନ ରହିଛି। ଦକ୍ଷିଣ ଓଡ଼ିଶା ପାଇଁ ବ୍ରହ୍ମପୁରରେ ଏହି ସ୍ବତନ୍ତ୍ର ଚିଟ୍ଫଣ୍ଡ କୋର୍ଟ ପ୍ରତିଷ୍ଠା କରାଯାଇଛି।