୧୦ ବର୍ଷରେ ହାତୀ ଆକ୍ରମଣରେ ରାଜ୍ୟରେ ୧,୨୦୯ ଜଣଙ୍କ ମୃତ୍ୟୁ

ଭୁବନେଶ୍ୱର: ଓଡ଼ିଶା ସରକାର ମଙ୍ଗଳବାର ପ୍ରକାଶ କରିଛନ୍ତି ଯେ, ୨୦୧୪-୧୫ ରୁ ୨୦୨୪-୨୫ ଗତ ୧୦ ବର୍ଷ ମଧ୍ୟରେ ରାଜ୍ୟରେ ହାତୀ ଆକ୍ରମଣରେ ୧,୨୦୯ ଜଣଙ୍କର ମୃତ୍ୟୁ ହୋଇଛି।

ବିଜେପି ବିଧାୟକ ପ୍ରଶାନ୍ତ ଜଗଦେବଙ୍କ ଏକ ପ୍ରଶ୍ନର ଉତ୍ତରରେ, ଓଡ଼ିଶା ଜଙ୍ଗଲ ଏବଂ ପରିବେଶ ମନ୍ତ୍ରୀ ଗଣେଶ ରାମ ସିଂହ ଖୁଣ୍ଟିଆ ରାଜ୍ୟ ବିଧାନସଭାରେ ସୂଚନା ଦେଇଛନ୍ତି ଯେ, ପୀଡିତଙ୍କ ପରିବାର ପାଇଁ ସରକାରଙ୍କ ପକ୍ଷରୁ ୬ ଲକ୍ଷ ଟଙ୍କା କ୍ଷତିପୂରଣ ବ୍ୟବସ୍ଥା ରହିଛି।

ସେହିପରି, ହାତୀ ଆକ୍ରମଣରେ ଧାନ ଫସଲ କ୍ଷତି ପାଇଁ ସରକାର ଏକର ପିଛା ୨୦ ହଜାର ଟଙ୍କା ଏବଂ ନଗଦ ଫସଲ କ୍ଷତି ପାଇଁ ୨୫ ହଜାର ଟଙ୍କା  କ୍ଷତିପୂରଣ ପ୍ରଦାନ କରୁଛନ୍ତି। କୃଷି ଏବଂ କୃଷକ ସଶକ୍ତିକରଣ ବିଭାଗ ଦ୍ୱାରା କ୍ଷତିପୂରଣ ରାଶି ପ୍ରଦାନ କରାଯାଉଛି। ଏହା ୨୦୨୩ ମସିହାରୁ କାର୍ଯ୍ୟକାରୀ ହୋଇଛି ବୋଲି ମନ୍ତ୍ରୀ କହିଛନ୍ତି।

୨୦୧୪-୧୫ ବର୍ଷରେ ଶିକାର, ବିଷକ୍ରିୟା, ବିଦ୍ୟୁତ୍ ଆଘାତ, ରେଳ ଏବଂ ସଡ଼କ ଦୁର୍ଘଟଣା ଏବଂ ରୋଗ ସମେତ ବିଭିନ୍ନ କାରଣରୁ ମୋଟ ୫୪ଟି ହାତୀଙ୍କ ମୃତ୍ୟୁ ହୋଇଥିଲା। ୨୦୧୫-୧୬ ବର୍ଷରେ ହାତୀ ମୃତ୍ୟୁ ସଂଖ୍ୟା ୮୬କୁ ବୃଦ୍ଧି ପାଇଥିଲା।

ଅଧିକ ପଢ଼ନ୍ତୁ: ରାଜ୍ୟର ୫,୦୦୦ରୁ ଅଧିକ ଗାଁରେ ସବୁଦିନିଆ ରାସ୍ତା ନାହିଁ

ସେହିପରି ୨୦୧୬-୧୭ରେ ୭୬ଟି ହାତୀ, ୨୦୧୭-୧୮ରେ ୭୮ଟି, ୨୦୧୮-୧୯ରେ ୯୩ଟି ଏବଂ ୨୦୧୯-୨୦ରେ ୮୨ଟି ହାତୀଙ୍କ ମୃତ୍ୟୁ ହୋଇଥିଲା। ୨୦୨୦-୨୧ରେ ୭୭ଟି ହାତୀଙ୍କ ମୃତ୍ୟୁ ହୋଇଥିଲା।

ପରବର୍ତ୍ତୀ ୨୦୨୧-୨୨ ବର୍ଷରେ ୮୬ଟି ହାତୀଙ୍କ ମୃତ୍ୟୁ ରେକର୍ଡ କରାଯାଇଥିଲା। ୨୦୨୨-୨୩ରେ ୯୩ ହାତୀ ମୃତ୍ୟୁବରଣ କରିଥିବା ବେଳେ ୨୦୨୩-୨୪ରେ ୬୬ଟି ହାତୀଙ୍କ ମୃତ୍ୟୁ ଘଟିଥିଲା। ୨୦୨୪-୨୫ରେ ଫେବ୍ରୁଆରି ୨୮ ତାରିଖ ସୁଦ୍ଧା ସରକାର ୯୭ଟି ହାତୀ ମୃତ୍ୟୁ ରେକର୍ଡ କରିଛନ୍ତି ବୋଲି ମନ୍ତ୍ରୀ କହିଛନ୍ତି।

ଅଧିକ ପଢ଼ନ୍ତୁ: ସୁହାନା-ଆରୟନ ନିଜ କ୍ୟାରିୟର ଗଢ଼ିପାରିବେ ନାହିଁ: ଜ୍ୟୋତିଷ ସୁଶୀଲ କୁମାର ସିଂହ