କଟକ: କଟକ ଜିଲ୍ଲାରୁ ଆଜି ମୋଟ ୧୨୫ ଜଣ କରୋନା ପଜିଟିଭ ଚିହ୍ନଟ ହୋଇଛନ୍ତି । ଜିଲ୍ଲା ପ୍ରଶାସନ ତରଫରୁ ଏହି ସୂଚନା ଦିଆଯାଇଛି । କଟକ ମହାନଗର ନିଗମ (ସିଏମସି) ଅଂଚଳରୁ ୬୬ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ସେହିଭଳି ନିଶ୍ଚିତକୋଇଲିରୁ ୧୭ ସରକାରୀ କର୍ମଚାରୀଙ୍କ ସମେତ ୨୪ ଜଣ, ବାଙ୍କୀରୁ ୧୩ ଜଣ, ଡମପଡ଼ାରୁ ୧୨ ଜଣ, ବଡ଼ମ୍ବାରୁ ୪ ଜଣ, ମାହାଙ୍ଗା, ନରସିଂହପୁର, କଟକ ସଦର, ଟାଙ୍ଗୀ, ଆଠଗଡ଼ ଓ ବାରଙ୍ଗ ବ୍ଲକରୁ ଜଣେ ଲେଖାଏଁ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ନିଶ୍ଚିନ୍ତକୋଇଲିରେ ୧୭ ଜଣ ସରକାରୀ କର୍ମଚାରୀ କରୋନା ପଜିଟିଭ ଚିହ୍ନଟ ହେବା ନେଇ ବିଡିଓ କର୍ଣ୍ଣଦେବ ସମ୍ମାଦାର ସୂଚନା ଦେଇଛନ୍ତି । ସେ କହିଛନ୍ତି, ବ୍ଲକକୁ ଆସିଥିବା ଅନ୍ୟ ୭ ଜଣ ମଧ୍ୟ କରୋନା ଆକ୍ରାନ୍ତ ହୋଇଛନ୍ତି । କରୋନା ଚିହ୍ନଟ ପରେ ବ୍ଲକ କାର୍ଯ୍ୟାଳୟ ବନ୍ଦ ନିଷ୍ପତ୍ତି ହୋଇଛି । କର୍ମଚାରୀଙ୍କୁ ହୋମ ଆଇସୋଲେସନରେ ରହିବାକୁ ପରାମର୍ଶ ଦିଆଯାଇଛି ।
ସୂଚନାଯୋଗ୍ୟ, ରାଜ୍ୟ ସରକାରଙ୍କ ତଥ୍ୟ ଅନୁସାରେ କଟକ ଜିଲ୍ଲାରେ ଆଜି ପର୍ଯ୍ୟନ୍ତ ୧୬୮୯ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏଥିରୁ ୫୩୦ ଜଣ ସକ୍ରିୟ ଆକ୍ରାନ୍ତ ଥିବା ବେଳେ ୧୧୪୭ ଜଣ ସୁସ୍ଥ ହୋଇଛନ୍ତି । ଜିଲ୍ଲାରୁ ୯ ଜଣ କରୋନା ଆକ୍ରାନ୍ତଙ୍କର ମୃତ୍ୟୁ ହୋଇଛି । ସେହିଭଳି କରୋନାରୁ ସୁସ୍ଥ ହେବା ପରେ ୩ ଜଣ ଜୀବନ ହାରିଛନ୍ତି ।